شىمبۇلاقتاعى تاۋ-شاڭعى كۋرورتىندا ورنالاسقان Gusto مەيرامحاناسى اكىمشىلىگىنىڭ قازاق تىلىندە قىزمەت كورسەتۋدەن باس تارتۋى قوعامدا قىزۋ تالقىلانىپ جاتىر، دەپ حابارلايدى «ادىرنا» ءتىلشىسى.
قازاقستاندىق ازامات Threads جەلىسىندە مەيرامحانا قىزمەتكەرىنىڭ قازاق تىلىندە قىزمەت كورسەتۋگە كەلىسپەگەنىن ايتىپ، ۆيدەو جاريالادى. بەينەجازبادا مەكەمە قىزمەتكەرىنىڭ مەملەكەتتىك تىلدە سويلەۋدى تالاپ ەتكەن وتىنىشكە ورەسكەل جاۋاپ بەرىپ، قازاق ءتىلىن مەڭگەرۋگە مىندەتتى ەمەس ەكەنىن ايتقانى كورىنەدى.
«مەن شامامەن ءۇش ساعات ۋاقىتىمدى جوعالتتىم، ال تۋريستەرىم سۋىقتا كۇتىپ قالدى. وقيعانى راستايتىن ۆيدەو جانە كۋاگەر بار. بۇل جاعداي ەلىمىزدىڭ تۋريستىك بەدەلى قالىپتاساتىن ايماقتا بولدى. مەملەكەتتىك ءتىلدى قورلاۋ – جەكە پىكىر ەمەس، مۇندايعا كوز جۇما قاراۋعا بولمايدى»، – دەپ جازدى ول.
ال ەلەنا Threads جەلىسىندە ءوز نۇسقاسىن جاريالاپ، ەر ادامنىڭ جالا جاۋىپ وتىر دەپ مالىمدەدى.
«بۇل جىگىت نە جازىپ وتىرعانىن كوردىڭىزدەر مە؟ ءوزىن اقتاپ وتىر، بىراق مەنى ۇرعانىن، قورقىتقانىن جانە الەۋمەتتىك جەلىگە سالامىن دەپ قوقان-لوققى جاساعانىن ايتپايدى. مەنىڭ ەڭ جاقىن قۇربىم – قازاق، 20 جىلدان بەرى دوسپىز. سونىمەن قاتار قازاق ءتىلىن ازداپ تۇسىنەمىن ءارى سويلەي الامىن»، – دەدى ول.
وقيعا Gusto كافەسىنىڭ بەدەلىنە دە اسەر ەتتى. ءبىر كۇننىڭ ىشىندە 2GIS قوسىمشاسىندا مەكەمە پاراقشاسىنا قازاق ءتىلىن بىلمەيتىن قىزمەتكەرلەرگە قاتىستى شاعىمدار مەن ەلەنانى جۇمىستان شىعارۋدى تالاپ ەتكەن 27 500-دەن استام پىكىر قالدىرىلعان.
كەيىن Gusto مەيرامحاناسى رەسمي مالىمدەمە جاسادى.
«تەكسەرۋ ناتيجەسى بويىنشا سەرۆيس ستاندارتتارى مەن كورپوراتيۆتىك كوممۋنيكاتسيا تالاپتارىنا سايكەس مەيرامحانا اكىمشىسىنىڭ قىزمەتىن توقتاتۋ تۋرالى باسقارۋشىلىق شەشىم قابىلداندى. اتالعان شەشىم تەك ىشكى شارا بولىپ تابىلادى جانە وقيعاعا قاتىسقان تۇلعالاردىڭ ارەكەتتەرىنە قۇقىقتىق باعا بەرۋدى كوزدەمەيدى. وقيعاعا بايلانىستى ودان ءارى قاراۋ زاڭنامادا بەلگىلەنگەن تارتىپپەن تاراپتاردىڭ ءوزارا قاتىسۋىمەن جۇزەگە اسىرىلۋدا. Gusto مەيرامحاناسى قوناقتارمەن ءاردايىم سىيلاستىق پەن ادەپتى قارىم-قاتىناس قاعيداتتارىن ۇستانادى.
قانداي جاعداي بولماسىن، دورەكى نەمەسە ورىنسىز سويلەۋ تاسىلىنە جول بەرىلمەيدى جانە بۇل ءبىزدىڭ سەرۆيس ستاندارتتارىمىزعا قايشى كەلەدى. وسىعان بايلانىستى ءبىز ىشكى رەگلامەنتتەردى كۇشەيتىپ، قىزمەتكەرلەرمەن قوسىمشا جۇمىس جۇرگىزۋدى قولعا الدىق. Gusto مەيرامحاناسى قازاقستان رەسپۋبليكاسىنىڭ مەملەكەتتىك ءتىلىن قۇرمەتتەيدى جانە قوناقتارعا قازاق، ورىس جانە اعىلشىن تىلدەرىندە قىزمەت كورسەتەدى. ورىن العان جاعدايدىڭ قوعامدا تەرىس پىكىر تۋدىرعانىنا وكىنىش بىلدىرەمىز جانە كورسەتكەن تۇسىنىستىك پەن كەرى بايلانىس ءۇشىن قوناقتارىمىزعا العىس ايتامىز»،-دەلىنگەن حابارلامادا.
