شىمكەنت قالاسى، Eldorado ءدامحاناسىنىڭ قىزمەتكەرلەرى قازاقشا جازىلعان ءمازىردى تالاپ ەتكەن قوعام بەلسەندىسى اسان اناربايعا "دايارشى ءمازىردى قازاقشا تۇسىندىرگەنى ءۇشىن سىزدەن 10% وبسلۋجيۆانيە الىنادى" دەپ جاۋاپ بەرگەن. قوعام بەلسەندىسى ءدامحانا قىزمەتكەرىنىڭ بۇل ارەكەتىن انىق قازاق ءتىلىن شەتتەتۋ، قازاق ءتىلدى قوعامنىڭ قۇقىعىن تاپتاۋ دەپ ساناپ وتىر، دەپ حابارلايدى "ادىرنا" ۇلتتىق پورتالى.
- بۇگىن بالا-شاعامەن ويناپ بولعان سوڭ، ويىن-ساۋىق ورتالىعىنا جاقىن جەرگە تاماقتانۋعا باردىق. Eldorado ءدامحاناسى. شىمكەنت قالاسى بايدىبەك بي داڭعىلى 25 «ا» ۇيدە ورنالاسقان. اس ءمازىرىن قازاقشا سۇراپ ەدىم قاباعىن تىرجيتتى. داياشى جىگىت «قازاقشاسى جوق» دەپ كەسىپ ايتتى. اكىمشىسىن شاقىرتۋىن ءوتىندىم. ءبىر ۋاقىتتا كەلىپ، سۇراۋىمىزدى جەتكىزگەنىن، ەسىگىنىڭ سىرتىنا «Staff only» دەگەن جازۋ ىلىنگەن بولمەدە وتىرعانىن ايتتى. تاپسىرىس بەردىك. پيتستسا-ميتستسا، سۋ-پۋ اكەلىندى. الدەن ۋاقىت بولدى. الگى «قۇپيا ەسىككە» كىرىپ-شىققانداردان اكىمشىنى سۇرايمىن. ءبىرى ىشتە وتىر دەسە، ءبىرى شىعىپ كەتكەن دەيدى.
قازاق ءتىلدى ازماتتىڭ ساۋالىنا جاۋاپ بەرۋدەن اشىق باس تارتقان ءدامحانا باسشىلىعى نە قىزمەتكەرلەرىمەن بايلانىسۋ ءۇشىن اسان انارباي الەۋمەتتىك جەلىلەردەگى پاراقشالارىنا جۇگىنگەن. ونداعى بايلانىس نومىرلەرىنەن دە ماردىمدى جاۋاپ الا الماعان. ول جايلا اۆتور تومەندەگىدەي جازدى:
تەلەفوندى اقتارىپ جىبەردىك. https://eldoradopizza.kz سايتىنان بايلانىس اقپاراتىن تاۋىپ (سايتى، Instgram, TikTok پاراقتارى دا ورىسشا), +77070011717 نومىرىنە حابارلاستىم. ساعات 18:50 كەتكەندە تۇتقانى كوتەرگەن ايەل ادام ءسوزىمدى شارت كەسىپ «بىزدە قازاقشاسى جوق» دەدى دە 71 سەكۋندتا تاستاي سالدى. ال كەرەك بولسا... بۇعىپ قالاتىن مەن ەمەس. تاعى قوڭىراۋلاتتىم. سونداعى ايتقانى نۇر.كز جازاتىنداي «جاعا ۇستاتتى». زاڭ كۇشىنە ەنگەلى ءبىر جىلدان اسسا دا ەندى قازاقشالانىپ جاتىر دەدى. «جاعا ۇستاتقانى» مىناۋ:
«ەگەر دە مەنيۋداعى تاعامنىڭ تۇرلەرى تۇسىنىكسىز بولسا، داياشى قوسپاسىن، بارلىعىن قازاق تىلىندە ءتۇسىندىرىپ بەرەدى. تۇسىندىرگەنى ءۇشىن 10%-تىك وبسلۋجيۆانيە الىنادى» دەيدى. قازاقشا ساپالى ءارى تولىمدى قىزمەت سۇراپ تۇرعان تۇتىنۋشىنى مازاق قىلعانى ما الدە... ايتەۋىر تۇسىنە المادىم. كومپانيانىڭ كەلبەتى سانالاتىن وپەراتوردىڭ ەكى ءسوزىنىڭ ءبىرى ورىسشا، - دەپ قايىردى ازامات.
اسان انارباي Eldorado ءدامحاناسىنا قاراستى بايلانىس قىزمەتكەرىنىڭ ۇلتتىق ءتىلدىڭ ءوزىن شۇبارلاپ، تىلدىك ديسكريميناتسياعا باستاماشى بولىپ وتىرعاندىعىن ايىپتايدى. ونىڭ قازاق تىلىندە ساپالى قىزمەت الۋىنىڭ ءوزى مۇڭعا اينالعانىنا قاپالانادى.
- ەڭ قاسىرەتتىسى – «ورىسشا ءمازىردى قازاقشالاپ تۇسىندىرگەنى 10%-دىق قىزمەت اقىعا كىرەدى» ەكەن. بۇرىن-سوڭدى تىلدىك ديسكريميناتسيانىڭ مۇنداي اۋىر تۇرىنە ۇشىراسىپ كورمەگەم. قاتتى ءتيدى. 102-گە تەرە بەرگەندە الگى «سىرتقا شىقپايتىن اكىمشىنىڭ ەسىگىنەن» بىرەۋ شىعىپ، ۇستەلىمىزگە كەلدى. كەزەكشى پوليتسەيگە قاجەت بولسا، كەيىنىرەك حابارلاسام دەدىم. ءوزىن وسى كافەنىڭ قوجايىنى، اتى نۇرجان دەپ تانىستىرعان ەر ادام ءسوزىنىڭ اراسىندا قايتا-قايتا قازاق ءتىلىنىڭ پاتريوتى ەكەنىن ايتا بەردى، - دەدى ءتىل جاناشىرى.
كەيىننەن وتكىر شىندىقتى ارقاۋ ەتكەن جازبا اۆتورى قازاق ءتىلدى قوعامدى قورسىنۋدىڭ رەسپۋبليكالىق دەڭگەيدە "كەڭ سيپات" العانىن اشىق ايتادى. ءتىپتى، قازاق كينوونەرىنىڭ ءوزى قازىرگى تاڭدا ايىر تىلدە تۇسىرىلەتىن بولىپ جۇرگەنىن سىنعا الادى. كاسىپتىڭ باسىندا جۇرگەندەر، حالىق يگىلىگى ءۇشىن ءتۇرلى ونەر تۋىندىسىن جاساپ جاتقاندار، ەل العىسى مەن حالىق ىقىلاسىنا بولەنگەنگەن قازاق ءتىلىن ساناسىنا ءسىڭىرىپ، ونىڭ قۇدىرەتىن تۇسىنۋگە شاقىرادى. ونى ءتىل مايدانىنىڭ كۇرەسكەرى بىلايشا سۋرەتتەيدى:
- «وتكەندە «تۇنگى ستۋديادا» نۇرلان قويانباەۆ «بيزنەس پو كازاحسكي»دى نەگە ورىسشا ارالاس تۇسىرگەنىن ايتتى. سوندا تەك قازاقشا تۇسىرسە كوپشىلىككە وتپەيتىن ەدى دەيدى...» بلا-بلا-بلا... ءۋاجىنىڭ ءتۇرى.
توقەتەرى، قازاقشا اس ءمازىرى ءسوز باسىندا 3 كۇندە، ءسوز سوڭىندا 2 اپتادا دايىن بولادىعا كەلدى.قازاقى ءوڭىر دەگەن جوق. قىلمىس، زاڭسىزدىق مەكەن دە، ادام دا تالعامايدى. بۇل جاعدايدى تاپىشتەپ جازىپ وتىرعانىم – بار كاسىپكەر، ازامات، تۇرعىن «قازاق ءتىلىنىڭ» جىلىن سانا-سەزىمىمەن ءتۇيسىنىپ، ارەكەت ەتسە دەگەن تىلەك، - دەپ جازدى قوعام بەلسەندىسى بۇعان قاتىستى.
"ادىرنا" ۇلتتىق پورتالى
