گۆاردەيسك گارنيزونىنداعى اسكەري بولىمدە بولعان وقيعاعا قاتىستى كادرلىق شەشىمدەر قابىلداندى. بۇل تۋرالى بۇگىن، 18 اقپاندا قورعانىس مينيسترلىگى جازدى، دەپ حابارلايدى «ادىرنا» ءتىلشىسى.
مينيسترلىك مەرزىمدى قىزمەت ساربازىنا دەنە جاراقاتىن كەلتىرۋ فاكتىسى بويىنشا قىلمىستىق ءىس قوزعالعانىن اتاپ ءوتتى. ودان بولەك، باسقا لاۋازىمدى ادامداردىڭ ارەكەتتەرىنە قۇقىقتىق باعا بەرىلىپ، قىزمەتتىك تەكسەرۋ جۇرگىزىلگەن.
«ناقتى ايتقاندا، كادرلىق شەشىم قابىلدانىپ، باسشىلىق قۇرامىنداعى ءتورت لاۋازىمدى تۇلعا – اسكەري ءبولىم كومانديرى، ونىڭ تاربيە جانە يدەولوگيالىق جۇمىس جونىندەگى ورىنباسارى، باتالون كومانديرى جانە روتا كومانديرى قىزمەتتەرىنەن بوساتىلدى. اسكەري ءبولىم كومانديرىنىڭ ورىنباسارى – شتاب باستىعىنا، باتالون كومانديرىنىڭ ورىنباسارىنا جانە ونىڭ تاربيە جۇمىسى جونىندەگى ورىنباسارىنا قىزمەتتىك ارەكەتكە سايكەس ەمەس دەپ ەسكەرتۋ جاريالاندى. بىرقاتار وفيتسەرلەر مەن سەرجانتتارعا قاتاڭ تارتىپتىك جازالار قولدانىلدى»،-دەلىنگەن حابارلامادا.
مينيسترلىكتىڭ مالىمەتىنشە، قابىلدانعان شارالار اتقارىپ وتىرعان لاۋازىمىنا قاراماستان، دەربەس جانە بۇلتارتپاس جاۋاپكەرشىلىك قاعيداتىن كورسەتەدى.
«قازاقستان رەسپۋبليكاسىنىڭ زاڭىنا سايكەس بارلىق ءمان-جايعا تۇپكىلىكتى قورىتىندى مەن قۇقىقتىق باعا تەرگەۋ ناتيجەلەرى بويىنشا بەرىلەدى»،-دەپ قوستى ۆەدومستۆو.
ەسكە سالايىق، جامبىل وبلىسىنداعى اسكەري بولىمدەردىڭ بىرىندە مەرزىمدى قىزمەتتەگى اسكەري قىزمەتكەرلەر اراسىندا جانجال شىعىپ، ءبىر ساربازدىڭ تومەنگى جاق سۇيەگى سىنعان بولاتىن.
