Şymbūlaqtaǧy tau-şaŋǧy kurortynda ornalasqan Gusto meiramhanasy äkımşılıgınıŋ qazaq tılınde qyzmet körsetuden bas tartuy qoǧamda qyzu talqylanyp jatyr, dep habarlaidy «Adyrna» tılşısı.
Qazaqstandyq azamat Threads jelısınde meiramhana qyzmetkerınıŋ qazaq tılınde qyzmet körsetuge kelıspegenın aityp, video jariialady. Beinejazbada mekeme qyzmetkerınıŋ memlekettık tılde söileudı talap etken ötınışke öreskel jauap berıp, qazaq tılın meŋgeruge mındettı emes ekenın aitqany körınedı.
«Men şamamen üş saǧat uaqytymdy joǧalttym, al turisterım suyqta kütıp qaldy. Oqiǧany rastaityn video jäne kuäger bar. Būl jaǧdai elımızdıŋ turistık bedelı qalyptasatyn aimaqta boldy. Memlekettık tıldı qorlau – jeke pıkır emes, mūndaiǧa köz jūma qarauǧa bolmaidy», – dep jazdy ol.
Al Elena Threads jelısınde öz nūsqasyn jariialap, er adamnyŋ jala jauyp otyr dep mälımdedı.
«Būl jıgıt ne jazyp otyrǧanyn kördıŋızder me? Özın aqtap otyr, bıraq menı ūrǧanyn, qorqytqanyn jäne äleumettık jelıge salamyn dep qoqan-loqqy jasaǧanyn aitpaidy. Menıŋ eŋ jaqyn qūrbym – qazaq, 20 jyldan berı dospyz. Sonymen qatar qazaq tılın azdap tüsınemın ärı söilei alamyn», – dedı ol.
Oqiǧa Gusto kafesınıŋ bedelıne de äser ettı. Bır künnıŋ ışınde 2GIS qosymşasynda mekeme paraqşasyna qazaq tılın bılmeitın qyzmetkerlerge qatysty şaǧymdar men Elenany jūmystan şyǧarudy talap etken 27 500-den astam pıkır qaldyrylǧan.
Keiın Gusto meiramhanasy resmi mälımdeme jasady.
«Tekseru nätijesı boiynşa servis standarttary men korporativtık kommunikasiia talaptaryna säikes meiramhana äkımşısınıŋ qyzmetın toqtatu turaly basqaruşylyq şeşım qabyldandy. Atalǧan şeşım tek ışkı şara bolyp tabylady jäne oqiǧaǧa qatysqan tūlǧalardyŋ äreketterıne qūqyqtyq baǧa berudı közdemeidı. Oqiǧaǧa bailanysty odan ärı qarau zaŋnamada belgılengen tärtıppen taraptardyŋ özara qatysuymen jüzege asyryluda. Gusto meiramhanasy qonaqtarmen ärdaiym syilastyq pen ädeptı qarym-qatynas qaǧidattaryn ūstanady.
Qandai jaǧdai bolmasyn, dörekı nemese orynsyz söileu täsılıne jol berılmeidı jäne būl bızdıŋ servis standarttarymyzǧa qaişy keledı. Osyǧan bailanysty bız ışkı reglamentterdı küşeitıp, qyzmetkerlermen qosymşa jūmys jürgızudı qolǧa aldyq. Gusto meiramhanasy Qazaqstan Respublikasynyŋ memlekettık tılın qūrmetteidı jäne qonaqtarǧa qazaq, orys jäne aǧylşyn tılderınde qyzmet körsetedı. Oryn alǧan jaǧdaidyŋ qoǧamda terıs pıkır tudyrǧanyna ökınış bıldıremız jäne körsetken tüsınıstık pen kerı bailanys üşın qonaqtarymyzǧa alǧys aitamyz»,-delıngen habarlamada.
