فوتو: zakon.kz
قازاقستان رەسەيدى اينالىپ وتەتىن حالىقارالىق كولىك ءدالىزى — تراسەكا اياسىندا بىرىڭعاي ترانزيتتىك رۇقسات (بتر/ەتر) ەنگىزۋ تۋرالى كەلىسىمگە قول قويۋدى جوسپارلاپ وتىر. بۇل جونىندە ۇكىمەت قاۋلىسى جوباسىندا ايتىلعان، دەپ حابارلايدى "ادىرنا" پورتالى قازتاگ اگەنتتىگىنە سىلتەپ.
قۇجاتتا كورسەتىلگەندەي، كەلىسىم تاراپ مەملەكەتتەردىڭ اۋماقتارى ارقىلى اۆتوكولىكپەن جۇزەگە اسىرىلاتىن حالىقارالىق جۇك تاسىمالدارىن بىرىڭعاي ترانزيتتىك رۇقسات نەگىزىندە رەتتەۋدى كوزدەيدى. سونىمەن قاتار رۇقساتتى بەرۋ جانە پايدالانۋ ءتارتىبى، سونداي-اق تراسەكا شەڭبەرىندەگى ترانزيتكە قاتىستى وزگە دە نورمالار ايقىندالادى.
كەلىسىمنىڭ نەگىزگى ماقساتى — حالىقارالىق اۆتوكولىك تاسىمالدارىن جەڭىلدەتۋ جانە جەدەلدەتۋ، راسىمدەردىڭ اشىقتىعىن ارتتىرۋ، تسيفرلاندىرۋدى كۇشەيتۋ، سونداي-اق تراسەكا باعىتتارى بويىنشا ترانزيتتىك جۇك اعىندارىن ۇلعايتۋ.
قۇجاتقا سايكەس، العاشقى پراكتيكالىق ناتيجەلەر كەلىسىم كۇشىنە ەنگەننەن كەيىن كۇتىلەدى. ول ءۇشىن تاراپتاردان ءتورتىنشى رەسمي حابارلاما الىنعان سوڭ 30 كۇن ءوتۋى ءتيىس. بىرىڭعاي ترانزيتتىك رۇقساتتى پايدالانۋ جىل سايىن 1 قاڭتاردان كەلەسى جىلدىڭ 31 قاڭتارىنا دەيىنگى كەزەڭدى قامتيدى. بۇل تاسىمالداردى تۇراقتى جوسپارلاۋعا جانە بولجامدىلىقتى ارتتىرۋعا مۇمكىندىك بەرەدى.
سونداي-اق كەلىسىمدى ىسكە اسىرۋ قۇزىرلى مەملەكەتتىك ورگاندار اراسىنداعى ۇيلەستىرۋدى جاقسارتىپ، شەكارادان ءوتۋ ۋاقىتىن قىسقارتۋعا جانە ترانزيتتىك تاسىمالدارعا باقىلاۋ تيىمدىلىگىن ارتتىرۋعا باعىتتالعان.
ايتا كەتەيىك، تراسەكا — 1993 جىلى ەۋروپالىق وداقتىڭ باستاماسىمەن قۇرىلعان حالىقارالىق باعدارلاما. ول «ەۋروپا – كاۆكاز – ازيا» كولىك ءدالىزىن دامىتۋعا باعىتتالعان جانە قازاقستاندى قوسا العاندا 13 ەلدى بىرىكتىرەدى. باعدارلاما قارا تەڭىز، كاۆكاز جانە كاسپي تەڭىزى ارقىلى وتەتىن تەمىرجول، اۆتوموبيل، تەڭىز جانە اۋە مارشرۋتتارىن دامىتۋعا، سونداي-اق ءداستۇرلى باعىتتارعا بالاما كولىك جولدارىن قالىپتاستىرۋعا مۇمكىندىك بەرەدى.
