ۋكراينا قازاقستاننىڭ كاسپي قۇبىر كونسورتسيۋمىنا جاسالعان شابۋىلعا بايلانىستى جولداعان نارازىلىعىنا جاۋاپ بەردى، دەپ حابارلايدى «ادىرنا» ءتىلشىسى.
ەلدىڭ سىرتقى ىستەر مينيسترلىگى ءوز ارەكەتتەرىنىڭ ەشقايسىسى «قازاقستانعا نەمەسە باسقا دا ءۇشىنشى تاراپتارعا قارسى باعىتتالماعانىن» اتاپ ءوتتى.
«ۋكراينا كاسپي قۇبىر كونسورتسيۋمىنىڭ ينفراقۇرىلىمىنا قاتىستى قازاقستاننىڭ ۇندەۋىن نازارعا الدى. ۋكراينا تاراپىنان جاسالعان ەشبىر ارەكەت قازاقستان رەسپۋبليكاسىنا نەمەسە وزگە ءۇشىنشى تۇلعالارعا قارسى ەمەس ەكەنىن ەرەكشە اتاپ وتەمىز. ءبىزدىڭ بارلىق كۇش-جىگەرىمىز تولىق ماسشتابتى رەسەي اگرەسسياسىنا قارسى تۇرۋعا، ءوزىمىزدىڭ ءوزىن-ءوزى قورعاۋ قۇقىعىن جۇزەگە اسىرۋعا باعىتتالعان. تاعى دا اتاپ وتكىمىز كەلەدى، قاراتەڭىز ايماعىنداعى جانە ونىڭ شەگىنەن تىس وڭىرلەردەگى تۇراقسىزدىققا سەبەپ بولىپ وتىرعان جالعىز فاكتور – رەسەي اگرەسسياسى»، – دەلىنگەن حابارلامادا.
سونداي-اق كيەۆ قازاقستان تاراپىنان رەسەي فەدەراتسياسىنىڭ ۋكرايناداعى بەيبىت حالىققا، تۇرعىن ۇيلەرگە، ازاماتتىق ينفراقۇرىلىمعا جانە ەنەرگەتيكالىق جۇيەگە، سونىڭ ىشىندە ۋكراين اەس-تەرىنىڭ قوسالقى ستانتسيالارىنا جاساعان سوققىلارىن ايىپتاعان مالىمدەمەلەردىڭ بولماعانىنا نازار اۋداردى.
ء«بىز بارلىق تاراپتى مەملەكەتىمىز بەن حالقىمىزعا قارسى قىلمىستىق سوعىستى مۇمكىندىگىنشە تەزىرەك توقتاتۋ ءۇشىن اگرەسسوردى ماجبۇرلەۋگە كۇش سالۋعا شاقىرامىز. سوڭىندا ءبىز قازاقستان حالقىنا دەگەن قۇرمەتىمىزدى جەتكىزىپ، ەكى ەل اراسىنداعى دوستىق جانە پراگماتيكالىق قارىم-قاتىناستى دامىتۋعا نيەتتى ەكەنىمىزدى راستايمىز»، – دەپ قوستى ۋكراينا ءسىم.
ەسكە سالساق، 29 قاراشادا ۋكراينانىڭ ەكيپاجسىز كاتەرلەرى نوۆوروسسيسكىدەگى كاسپي قۇبىر كونسورتسيۋمىنىڭ (كتك) تەڭىز تەرمينالىنىڭ ايلاق قۇرىلعىسىن ىستەن شىعارعان بولاتىن. سونىڭ سالدارىنان مۇناي تيەۋ توقتاتىلعان ەدى. وسى قۇبىر ارقىلى مۇنايىنىڭ باسىم بولىگىن حالىقارالىق نارىققا شىعاراتىن قازاقستان ءبىر كۇن بۇرىن "مۇناي تاسىمالداۋدىڭ بالاما باعىتتارىن" قاراستىرادى دەگەن. ال 30 قاراشادا قازاقستان سىرتقى ىستەر مينيسترلىگىنىڭ نارازىلىق نوتاسى جاريالاندى.
