سوڭعى ۋاقىتتا قازاقستاندىق كاسىپكەرلەردىڭ ءبىر بولىگى قىرعىزستاندا زاڭدى تۇلعالار مەن جەكە كاسىپكەرلىكتى تىركەي باستاعانى بايقالادى. بيزنەس وكىلدەرى بۇل ءۇردىستى كورشى ەلدەگى سالىق سالۋ شارتتارىنىڭ اناعۇرلىم ءتيىمدى بولۋىمەن بايلانىستىرىپ وتىر، دەپ حابارلايدى "ادىرنا" ۇلتتىق پورتالى Kursiv.kz سايتىنا سىلتەپ.
سالىق ساراپشىسى ماكسيم بارىشەۆ جۋىردا بەرگەن سۇحباتىندا قازاقستاننان بيزنەستىڭ قىرعىزستان مەن وزبەكستانعا كوشۋ قاۋپىنە نازار اۋداردى. ونىڭ ايتۋىنشا، بۇعان اتالعان ەلدەردەگى ليبەرالدى سالىق زاڭناماسى ىقپال ەتىپ وتىر.
ساراپشىنىڭ دەرەگىنشە، قىرعىزستاندا جەكە كاسىپكەرلەر ءۇشىن اينالىم سالىعى 1% عانا بولسا، قوسىلعان قۇن سالىعى 12% دەڭگەيىندە ساقتالعان. سونىمەن قاتار قازاقستاندىق كومپانيالار قىرعىزستانداعى كاسىپكەرلەر كورسەتكەن قىزمەتتەردى سالىقتىق شەگەرىمگە ەنگىزە الادى. ال قازاقستاندا «جەڭىلدەتىلگەن سالىق رەجيمىمەن» جۇمىس ىستەيتىن بيزنەس سۋبەكتىلەرىمەن ءوزارا ەسەپ ايىرىسۋعا قاتىستى تالاپتار قاتاڭداتىلعان.
«قىرعىزستان مەن وزبەكستان وكىلدەرىمەن وتكەن جابىق كەزدەسۋدە ولار قازاقستاندا ەنگىزىلىپ جاتقان سالىق كودەكسىن “وتە ءتيىمدى” دەپ باعالادى. ولاردىڭ ايتۋىنشا، سوڭعى ايلاردا تاۋەلسىزدىك العاننان بەرى بولماعان دەڭگەيدە شەتەلدىك ينۆەستورلار اعىنى بايقالىپ وتىر»، - دەدى ماكسيم بارىشەۆ.
بۇل ماسەلەگە ءماجىلىس دەپۋتاتى ايتۋار قوشمامبەتوۆ تە نازار اۋداردى. ول الەۋمەتتىك جەلىلەردە قىرعىزستاندا تمد ەلدەرى ازاماتتارىنا جەكە كاسىپكەر تىركەۋدى ۇسىناتىن جارنامالار ءجيى كەزدەسە باستاعانىن جازدى. دەپۋتاتتىڭ پىكىرىنشە، مۇنداي ءۇردىس قازاقستاننان بيزنەستىڭ كەتۋى ەسەبىنەن كورشى ەلدە جاڭا كومپانيالاردىڭ كوبەيۋىنە الىپ كەلۋى مۇمكىن.
سونىمەن قاتار Threads الەۋمەتتىك جەلىسىندە بىرنەشە قازاقستاندىق كاسىپكەر قىرعىزستاندا زاڭدى تۇلعا اشۋ تاجىريبەسىمەن ءبولىستى. كەيبىرى بۇل قادامدى سالىقتىق جۇكتەمەنىڭ تومەندىگىمەن جانە اكىمشىلىك راسىمدەردىڭ جەڭىلدىگىمەن تۇسىندىرگەن.
الايدا قوعامداعى پىكىرلەر بىرجاقتى ەمەس. بىرقاتار قولدانۋشىلار بيزنەستى قىرعىزستانعا كوشىرۋ جولدارىن سۇراسا، ەندى بىرەۋلەرى مۇنداي تاجىريبەنى سىنعا الدى. سىن ايتۋشىلاردىڭ پىكىرىنشە، قازاقستاننان كەتىپ جاتقان بيزنەستىڭ ءبىر بولىگى كارگو-يمپورتپەن اينالىسىپ، تاۋارلاردى قايتا ساتۋ ارقىلى تابىس تاپقان كاسىپكەرلەر بولۋى مۇمكىن.
وسىلايشا، سالىق ساياساتى مەن رەتتەۋ تالاپتارىنداعى ايىرماشىلىقتار ءوڭىر ەلدەرى اراسىنداعى بيزنەس اعىندارىنا ىقپال ەتىپ وتىر. ساراپشىلاردىڭ پىكىرىنشە، بۇل ءۇردىس الداعى ۋاقىتتا قازاقستاننىڭ سالىق جانە ينۆەستيتسيالىق ساياساتىنا قايتا قاراۋ قاجەتتىلىگىن كۇن تارتىبىنە شىعارۋى مۇمكىن.
