قىرعىزستاننىڭ ىستىقكول وبلىسىندا قۇتقارۋشىلار مەن ەرىكتىلەر سەل اعىنى الىپ كەتكەن 8-سىنىپ وقۋشىسىن ىزدەستىرۋدە. وقيعا جەرگىلىكتى تۇرعىندار «نازارباەۆتىڭ ساياجايى» دەپ اتايتىن رەزيدەنتسيا ماڭىندا بولعان، دەپ حابارلايدى “ادىرنا”.
Instagram جەلىسىندەگى قولدانۋشى جانىبەك امانبەكوۆتىڭ مالىمەتىنشە، ىستىقكولدە اۋقىمدى ىزدەستىرۋ-قۇتقارۋ وپەراتسياسى جۇرگىزىلىپ جاتىر. الدىن الا اقپارات بويىنشا، كۇشتى سەل جۇرگەن كەزدە ءجاسوسپىرىم كولىكتەن سەكىرىپ شىعىپ، امان قالۋعا تىرىسقان.
قايعىلى وقيعا 5 ماۋسىم كۇنى كەشكە بالىقشى – انانەۆو – قاراكول تاس جولىنىڭ 92-شاقىرىمىندا بولعان. سەل تاسقىنى جولدى باسىپ، Mercedes Sprinter جانە Ford Mondeo كولىكتەرىن زاقىمداعان.
وكىنىشكە قاراي، 2008 جىلى تۋعان تاعى ءبىر ءجاسوسپىرىمنىڭ ءمايىتى تابىلعان. قازىرگى ۋاقىتتا وقيعا ورنىندا تاۋلىك بويى 291 ادام مەن 20 ارنايى تەحنيكا جۇمىس ىستەۋدە. جولدىڭ ەكى باعىتى دا كولىك قوزعالىسىنا اشىلعانىمەن، جوعالعان بالانى ىزدەۋ جانە جولداردى تازارتۋ جۇمىستارى جالعاسىپ جاتىر.
جەرگىلىكتى باق جاريالاعان كادرلاردا وقيعا ورنى بۇرىنعى كومسومول كەنتى، قازىرگى بۋلان-سوگوتتۇ اۋىلى ەكەنى كورسەتىلگەن. ەلدى مەكەن اۆرورا ءساناتوريى ماڭىندا ورنالاسقان.
«سەيچاس KG» رەسۋرسى تاراتقان ۆيدەوداعى اۆتوردىڭ ايتۋىنشا، بۇل اۋماقتا 2024 جىلدىڭ تامىز ايىندا دا سەل جۇرگەن. سول كەزدە بۇلىنگەن قورشاۋ كەيىن قالپىنا كەلتىرىلگەنىمەن، بيىلعى سەلدەن كەيىن قايتادان جەر استىندا قالىپ قويعان.
«مۇندا بۇرىن قورشاۋ بولعان. ونى قالپىنا كەلتىرگەن ەدى، بىراق قايتادان جەر استىنا كەتىپ قالعان سياقتى. بۇل — نازارباەۆتىڭ ساياجايىنىڭ قورشاۋى. قازىر جۇمىستار جۇرگىزىلىپ جاتىر. بالكىم، قورشاۋ جەر استىنان تابىلار»، – دەيدى ۆيدەو اۆتورى.
