باس پروكۋراتۋرا «قىلمىستىق كودەكستىڭ 274-بابى بويىنشا قوزعالعان قىلمىستىق ىستەر اياسىندا تەرگەۋ ورگاندارى ازاپتايدى» دەگەن اقپاراتتىڭ جوققا شىعاردى، دەپ حابارلايدى «ادىرنا» ءتىلشىسى.
ۆەدومستۆونىڭ مالىمەتىنشە، كەيبىر تۇلعالار قر قپك تالاپتارىنا ساي جۇرگىزىلەتىن زاڭدى تەرگەۋ ارەكەتتەرىن — جاۋاپ الۋعا قاتىسۋ، جاۋاپ الۋدى وتكىزۋ، سونداي-اق سوتتىڭ ۇيقاماق تۇرىندەگى بۇلتارتپاۋ شاراسىن تاڭداۋى سەكىلدى پروتسەسسۋالدىق شەشىمدەردى قاساقانا «ازاپتاۋ» رەتىندە كورسەتىپ، قوعامدى ادەيى اداستىرۋدا.
باس پروكۋراتۋرا قازاقستان زاڭناماسىندا «ازاپتاۋ» ۇعىمى ناقتى ايقىندالعانىن ەسكە سالدى.
«قر قك-ءنىڭ 146-بابىنا سايكەس، ازاپتاۋ — بۇل لاۋازىمدى تۇلعا تاراپىنان ءتان زاردابىن نەمەسە پسيحيكالىق زارداپتى قاساقانا كەلتىرۋ. بۇل انىقتاما ءبىزدىڭ ەلمەن راتيفيكاتسيالاعان بۇۇ-نىڭ ازاپتاۋلارعا جانە باسقا دا قاتىگەز، ادامگەرشىلىككە جاتپايتىن نەمەسە ار-نامىستى قورلايتىن ءىس-ارەكەتتەر مەن جازالاۋ تۇرلەرىنە قارسى كونۆەنتسياسىنا، سونداي-اق ىستامبۇل حاتتاماسىنىڭ نورمالارىنا تولىق سايكەس كەلەدى»،-دەلىنگەن حابارلامادا.
پروكۋراتۋرا بۇگىنگە دەيىن اتالعان ىستەر بويىنشا قاتىسۋشىلارعا قاتىستى تەرگەۋشىلەر تاراپىنان قانداي دا ءبىر زاڭسىز ارەكەتتەر مەن ازاپتاۋ فاكتىلەرىنىڭ تىركەلمەگەنىن جەتكىزدى.
بارلىق پروتسەسسۋالدىق ارەكەتتەر قر قپك-نىڭ نورمالارىن تولىق ساقتاي وتىرىپ جۇرگىزىلۋدە. سوندىقتان اتالعان تۇلعالار وزىنە ءتيىمدى قوعامدىق پىكىر قالىپتاستىرۋ، قۇقىق قورعاۋ ورگاندارىنىڭ بەدەلىن ءتۇسىرۋ جانە قىلمىستىق ىستەردى تولىق، جان-جاقتى جانە وبەكتيۆتى تەرگەۋگە كەدەرگى جاساۋ ماقساتىندا جالعان اقپارات تاراتۋدا.
وسىعان بايلانىستى باس پروكۋراتۋرا كورىنەۋ جالعان اقپارات تاراتۋ، سونداي-اق سوتقا دەيىنگى تەرگەپ-تەكسەرۋدى جۇزەگە اسىراتىن تۇلعانىڭ قىزمەتiنە قانداي دا بولماسىن تۇردە ارالاسۋ ءۇشىن قىلمىستىق جاۋاپتىلىقتىڭ كوزدەلگەنى تۋرالى الدىن-الا ەسكەرتەدى»،-دەپ تولىقتىردى قۇزىرلى ورگان.
ەسكە سالايىق، بۇعان دەيىن قازتاگ اگەنتتىگىنىڭ باس رەداكتورى ءامىر قاسەنوۆ Freedom Finance تۋرالى اگەنتتىك جاريالانىمدارىنا بايلانىستى قوزعالعان قىلمىستىق ءىس اياسىندا تەرگەۋ زاڭسىز ادىستەر قولداندى جانە الماتى پوليتسياسى تاراپىنان پسيحولوگيالىق قىسىم كورسەتىلدى دەپ مالىمدەگەن بولاتىن. ول ءىستىڭ پروتسەسسۋالدىق زاڭبۇزۋشىلىقتارمەن قوزعالعانىن، تەرگەۋ ارەكەتتەرى رەداكتسيانى ءتيىستى تۇردە حاباردار ەتپەي جۇرگىزىلگەنىن، ال وزىنە جانە باسقا دا ىسكە قاتىسى بار تۇلعالارعا جاسالعان قىسىم جۇيەلى سيپات العانىن ايتقان.
