الماتىدا ەليتالىق قوناقۇيدىڭ بىرىندە جارىلعىش زات قويىلدى دەگەن اقپاراتقا بايلانىستى ادامداردى ەۆاكۋاتسيالاۋ جۇرگىزىلدى، دەپ حابارلايدى "ادىرنا" ءتىلشىسى.
الماتى پوليتسيا دەپارتامەنتىنە 3 قىركۇيەك كۇنى ساعات 23:51-دە بوستاندىق اۋدانىندا ورنالاسقان قوناقۇيلەردىڭ بىرىنە بومبا قويىلعانى تۋرالى ءانونيمدى حابارلاما تۇسكەن. جەدەل جەتكەن دەپارتامەنت قىزمەتكەرلەرى Ritz-Carlton قوناقۇيىنە تۇراقتاعان قوناقتار مەن بارلىق قىزمەتكەرلەردى ەۆاكۋاتسيالاعان.
«قالانىڭ بارلىق توتەنشە جاعدايلار قىزمەتى دەرەۋ كورسەتىلگەن نىسانعا تارتىلدى.
كەلۋشىلەر مەن قوناقۇي قىزمەتكەرلەرىن ەۆاكۋاتسيالاۋ جۇمىستارى جۇرگىزىلدى. ساپەر بولىمشەسىنىڭ كوپقاباتتى ۇيگە كوميسسيالىق تەكسەرۋى ەكى ساعاتقا جۋىق جۇرگىزىلدى. ناتيجەسىندە جارىلعىش زات تابىلمادى»، - دەپ حابارلادى قالالىق پد ءباسپاسوز قىزمەتى.
قازىر اتى-ءجونى بەلگىسىز تۇلعانىڭ جەكە باسىن انىقتاۋعا، ونى ۇستاۋعا جانە ودان ءارى قىلمىستىق جاۋاپكەرشىلىككە تارتۋعا باعىتتالعان كەشەندى جەدەل ءىس-شارالار جۇرگىزىلىپ جاتىر.
"جارىلعىش زات بار". الماتىداعى قوناقۇيگە كەلۋشىلەر مەن قىزمەتكەرلەر ەۆاكۋاتسيالاندى
04.09.2023
2131
