الماتى پوليتسياسى جەر سىلكىنىسى تۋرالى جالعان اقپارات تاراتۋشىلاردى ىزدەستىرۋدە، دەپ حابارلايدى “ادىرنا” ۇلتتىق پورتالى.
قۇقىق قورعاۋ ورگاندارى كەشە تۇندە قوعامدا نەگىزسىز دۇربەلەڭ مەن ۇرەي تۋدىرعان جالعان حابارلاردىڭ اۆتورلارىن انىقتاپ جاتقانىن ايتتى.
«جالعان اقپارات تاراتقانى ءۇشىن قىلمىستىق جاۋاپكەرشىلىك قاراستىرىلعان»، - دەپ ەسكەرتەدى پوليتسيا دەپارتامەنتى.
قىلمىستىق كودەكستىڭ 274-بابى «بۇقارالىق اقپارات قۇرالدارىن، تەلەكوممۋنيكاتسيا جەلىلەرىن جانە ونلاين پلاتفورمالاردى پايدالانا وتىرىپ، كورىنەۋ جالعان اقپارات تاراتۋ» بابى بويىنشا جازا 3 مىڭ اەك (11 ميلليون تەڭگە) مولشەرىندە ايىپپۇل سالۋ نەمەسە سول مولشەردە تۇزەۋ جۇمىستارى، نە سەگىز ءجۇز ساعاتقا دەيىنگى مەرزىمگە قوعامدىق جۇمىستارعا تارتۋ نەمەسە ءۇش جىلعا دەيىن باس بوستاندىعىنان ايىرۋ بولۋى مۇمكىن. بۇعان دەيىن ءتارتىپ ساقشىلارى ازاماتتاردى تەك رەسمي اقپارات كوزدەرىنەن الىنعان اقپاراتقا سەنۋگە شاقىردى.
ايتا كەتسەك، چاتتاردا ءال-فارابي داڭعىلىنداعى ەكى كوپقاباتتى ءۇيدىڭ قۇلاعانى تۋرالى جالعان حابارلاما تاراعان بولاتىن. الايدا توتەنشە جاعدايلار قىزمەتى زارداپ شەككەندەر مەن قيراۋلار جوق ەكەنىن ايتىپ، اقپاراتتى جوققا شىعاردى.
سونداي-اق الماتىلىقتاردىڭ چاتتارىندا ەڭ كوپ تاراعان حابارلاما تاڭعى بەستە تاعى دا جەر سىلكىنىسى بولادى دەگەن بەلگىسىز ەر ادامنىڭ اۋديوسى بولدى. الايدا توتەنشە جاعدايلار دەپارتامەنتىنىڭ باسشىسى نۇرلان اتىعاەۆ جويقىن جەر سىلكىنىسى تۋرالى اقپارات جالعان دەپ سەندىردى.
سونىمەن قاتار قازۇۋ-دىڭ №6 جانە №8 جاتاقحانالارىنىڭ قيراعانى تۋرالى دا جالعان اقپارات تاراپ ۇلگەردى. الايدا عىلىم جانە جوعارى ءبىلىم مينيسترلىگى بۇل اقپاراتتى جوققا شىعاردى.
“ادىرنا” ۇلتتىق پورتالى
