ورال قالاسىندا جاڭا زاماناۋي سپورت كەشەنى ەل يگىلىگىنە بەرىلدى. جوبانى جۇزەگە اسىرۋعا Freedom Holding Corp كومپانياسى قولداۋ كورسەتتى.
سالتاناتتى اشىلۋ راسىمىنە باتىس قازاقستان وبلىسىنىڭ اكىمى ناريمان تورەعاليەۆ پەن Freedom Holding Corp كومپانياسىنىڭ باسشىسى تيمۋر تۋرلوۆ قاتىسىپ، بۇل الەۋمەتتىك باستامانىڭ ماڭىزدىلىعىنا توقتالدى.
– مەملەكەت باسشىسى قاسىم-جومارت كەمەلۇلى توقاەۆ ءوز سوزىندە: «كاسىپكەرلەردىڭ الەۋمەتتىك جاۋاپكەرشىلىگى دە، جەرگىلىكتى قاۋىمداستىقتارمەن ۇزاق مەرزىمگە ارنالعان سەرىكتەستىك قاتىناس ورناتۋعا دەگەن قۇلشىنىسى دا زور. بۇل – قۋانارلىق جاعداي. مەملەكەت پەن بيزنەستىڭ ىقپالداستىعى ارقىلى كوپتەگەن الەۋمەتتىك ماسەلە شەشىمىن تاۋىپ جاتىر»، – دەپ اتاپ وتكەن ەدى. ءبىزدىڭ بۇگىنگى جاڭا سپورت نىسانىنىڭ اشىلۋى دا پرەزيدەنت ءسوزىنىڭ جارقىن كورىنىسى، ايقىن دالەلىنىڭ ءبىرى دەر ەدىم. بۇل نىسان – ينكليۋزيۆتى قوعام قۇرۋعا باعىتتالعان ناقتى قادام، مەملەكەتىمىزدىڭ الەۋمەتتىك جاۋاپكەرشىلىگىنىڭ جەمىسى – دەدى وبلىس اكىمى.
عيماراتتىڭ جالپى اۋماعى – 2 025 شارشى مەتر. نىساندا سپورتتىق ويىندارعا ارنالعان جاتتىعۋ زالدارى، كۇرەس جانە ۇستەل تەننيسىنە ارنالعان ارنايى ورىندار بار. سونىمەن قاتار جالپى جانە ارنايى دەنە دايىندىعىنا ارنالعان زاماناۋي سپورتتىق قۇرال-جابدىقتارمەن تولىق قامتىلعان.
جاڭا كەشەندە سپورتتىڭ 20 تۇرىنەن 250-دەن استام سپورتشى جاتتىعادى.
