بالالارعا ارنالعان كىتاپتار قاتارى تاعى ءبىر ەنتسيكلوپەديامەن تولىقتى.
الماتى قالاسىنداعى ا. پ. چەحوۆ اتىنداعى ورتالىق قالالىق كىتاپحانادا «اتامۇرا» كورپوراتسياسىنىڭ جاڭا باسىلىمى – «ميفتەر مەن اڭىزدار تۋرالى ەنتسيكلوپەديانىڭ» كوپشىلىككە ارنالعان تانىستىرىلىمى ءوتتى. ءىس-شاراعا جازۋشى، مادەنيەتتانۋشى، ميفولوگ زيرا ناۋرىزباي ارنايى قاتىسىپ، جەتكىنشەك وقىرماندارعا جاڭا كىتاپتىڭ ەرەكشەلىگىن ميفولوگيا عىلىمى تۇرعىسىنان اڭگىمەلەپ بەردى.
«ميفتەر مەن اڭىزدار تۋرالى ەنتسيكلوپەديا» – «اتامۇرا» باسپاسى بالالارعا ارناپ شىعارىپ كەلە جاتقان كىتاپتار سەرياسىنىڭ كەزەكتى ءونىمى. كولەمدى تانىمدىق باسىلىمدا الەم حالىقتارىنىڭ ميفتەرى مەن قيال-عاجايىپ كەيىپكەرلەرى تۋرالى اڭىزدار جيناقتالعان. ءتىلى جەڭىل، تۇسىنىكتى، ادەمى بەزەندىرىلگەن كىتاپ ميفولوگيا الەمىن بالالاردىڭ جاس ەرەكشەلىگىنە ساي تارتىمدى ءارى تۇسىنىكتى تۇردە باياندايدى. اسەم يلليۋستراتسيالار مەن قىزىقتى وقيعالار بالانىڭ وي-ءورىسىن كەڭەيتىپ، قيال الەمىنە ەركىن ساياحات جاساۋعا شاقىرادى.
كىتاپ تانىستىرىلىمىن جۇرگىزگەن «اتامۇرا» كورپوراتسياسىنىڭ ۆيتسە-پرەزيدەنتى راحيما قۇل-مۇحاممەد بالالاردى ميفتەر الەمىنە ساياحات جاساۋعا شاقىرىپ، يلليۋزيونيستكە كەزەك بەردى. بالالارعا جاقسى تانىس ەرتەگىلەر كەيىپكەرلەرىن بەينەلەيتىن قىزىقتى كورىنىستەر مەن سيقىر ونەرى كىشكەنتاي وقىرمانداردىڭ كوڭىلىن كوتەرىپ، ءبىلىم الەمىنە كىرىسپە ىسپەتتى بولدى.
كىتاپ تانىستىرىلىمىنا ارنايى شاقىرىلعان جازۋشى ءارى ميفولوگ عالىم زيرا ناۋرىزباي بالالارعا ميفتىك ويلاۋ جۇيەسى، ونىڭ ادام ومىرىندەگى ءرولى تۋرالى اڭگىمەلەدى.
– كونە زاماندا عىلىم سالالارى قازىرگىدەي جەكە-جەكە ەمەس، ءبىرتۇتاس بولدى. ميف – دۇنيەنىڭ جاراتىلۋى، تابيعات قۇبىلىستارى تۋرالى اڭىز-اڭگىمەلەر. ميفتەر مەن اڭىزدار وتكەن زامانداعى ادامداردىڭ كوزقاراسىن، دۇنيەتانىمىن بىلدىرەدى. الەم حالىقتارى ميفتەرىنىڭ وزىنە ءتان كەيىپكەرلەرى بولسا، ءبىزدىڭ اتا-بابالارىمىزدان جەتكەن ميفتەردىڭ دە ءوز كەيىپكەرى بار. مىسالى، قازاق حالقىنىڭ شىعۋ تەگى تۋرالى اڭىز-اڭگىمەلەر ەلدى بىرىكتىرۋ، ءبىرىن-ءبىرى قولداۋ ءۇشىن ماڭىزدى ءرول اتقاردى. كونەدەن جەتكەن اڭىزداردا قاناتتى پىراق، ايداھار، قورقىت اتا، قىدىر اتا، ۇماي انا، جالماۋىز، جەزتىرناق، پەرى، ديۋ سياقتى ءتۇرلى ميفولوگيالىق قاھارماندار بار، – دەي كەلە، زيرا ناۋرىزباي بالالارعا قىزىقتى اڭىزداردى مىسالعا كەلتىردى.
عالىمنىڭ ايتۋىنشا، قازىر الەمدىك كينو سالاسىندا ميفتەرگە قىزىعۋشىلىق وتە جوعارى. ايگىلى ء«ھارري پوتتەر» كىتابىنىڭ اۆتورى جوان روۋلينگ تە ميفتەردى پايدالانعان. كەيىن بۇل كىتاپ نەگىزىندە فيلم تۇسىرىلگەنى بەلگىلى.
– قازاق رەجيسسەرلەرى دە تۇركى حالىقتارىنىڭ جانە قازاقتاردىڭ ميفتىك بەينەلەرىن الەمگە تانىتىپ، كوركەم فيلمدەر تۇسىرگىسى كەلەدى. ويتكەنى ميفولوگياعا نەگىزدەلگەن كينولار وتە تارتىمدى جانە كورەرمەنى كوپ. سوندىقتان دا ميفولوگيا تۋرالى كىتاپتاردى كوپ وقۋ كەرەك، زەرتتەۋ كەرەك. سەندەر كەلەشەكتە ۇلكەن جازۋشى، اتاقتى رەجيسسەر بولۋلارىڭ مۇمكىن. قازىردەن وسىنداي كىتاپتى كوپ وقىساڭدار، بىلىمدەرىڭ مول بولادى، – دەپ زيرا اپاي كىشكەنتاي جەتكىنشەكتەردى كىتاپ پەن ونەر الەمىنە جەتەلەيتىن اڭگىمەسىن تۇيىندەدى.
ايتا كەتەرلىگى، زيرا ناۋرىزباي – ميفولوگيا تاقىرىبىنداعى كوپتەگەن كىتاپتاردىڭ اۆتورى، جازۋشى، ولاردىڭ ىشىندە «باتۋ جانە ونىڭ دوستارى» اتتى بالالارعا ارنالعان كىتاپ تا بار.
بۇدان كەيىن «ميفتەر مەن اڭىزدار تۋرالى ەنتسيكلوپەديانى» اعىلشىن تىلىنەن اۋدارعان جانار قۇل-مۇحاممەد جاس وقىرماندارعا كىتاپتىڭ ەرەكشەلىگى جونىندە ايتتى.
– بۇل ەنتسيكلوپەديانى مەن وزدەرىڭ سياقتى كىشكەنتاي بالالارىم دا وقىسىن دەپ اۋداردىم. ول بالانىڭ قيالىن دامىتىپ، وقۋعا قىزىقتىرادى. مۇندا جاس وقىرماندار الەم حالىقتارىنىڭ ەجەلگى حيكايالارى، ونىڭ ىشىندە ايداھار، فەنيكس قۇسى، پەگاس جانە باسقا جاراتىلىستار، مۇحيتقا قاتىستى اڭىزدار، ميف كەيىپكەرلەرى جانە اڭىزعا اينالعان اڭگىمەلەرمەن تانىسادى. ەجەلگى وركەنيەتتەردىڭ قاھارمان باتىرلارى مەن ولاردىڭ شايقاسى تۋرالى بىلەدى، تابيعات قۇبىلىستارى مەن تىلسىم كۇشتەر تۋرالى ءبىلىم الادى. بۇل كىتاپ ءبىلىمپاز بالالارعا ارنالعان، سوندىقتان سۋرەتتەرمەن بەزەندىرىپ، ەرەكشە ەتىپ شىعاردىق، – دەدى جانار مۇحتارقىزى.
جاڭا كىتاپتىڭ تۇساۋكەسەر ءراسىمىن زيرا ناۋرىزباي، «اتامۇرا» كورپوراتسياسىنىڭ ۆيتسە-پرەزيدەنتى راحيما قۇل-مۇحاممەد جانە ا. پ. چەحوۆ اتىنداعى ورتالىق قالالىق كىتاپحانا ديرەكتورىنىڭ كەڭەسشىسى باقىتجامال وسپانوۆا جاسادى.
الماتىداعى №206 مەكتەپتىڭ 2–3 سىنىپ وقۋشىلارىن باستاپ كەلگەن سىنىپ جەتەكشىسى نازيگۇل مەرگەنباەۆا ءوز سوزىندە وقىرمان ازايعان قازىرگى ۋاقىتتا كىشكەنتاي بالالاردى وقۋعا قىزىقتىرىپ، ساپالى دا پايدالى كىتاپتار شىعارىپ جۇرگەن «اتامۇرا» باسپاسىنا العىسىن جەتكىزدى. «كىتاپ ادامنىڭ جانىن بايىتادى. ءبىزدىڭ ماقساتىمىز – كىتاپ وقيتىن بالالاردىڭ قاتارىن كوبەيتۋ. سىنىبىمىزدا كىتاپقۇمار بالالار بار، سوندىقتان وسىنداي ءىس-شارالاردان قالماۋعا تىرىسامىز»، – دەدى ن. مەرگەنباەۆا.
بۇدان كەيىن راحيما ابرارقىزى جاس وقىرمانداردى باسپانىڭ جاڭا كىتاپتارىمەن تانىستىردى. مىسالى، ء«بىلىمدار» سەرياسىمەن شىققان جانۋارلار دۇنيەسى، اسپان الەمى، سۋپەرقاھارماندار، اعىلشىن ءتىلىن ۇيرەتەتىن باسىلىمداردىڭ ءبارى زاماناۋي ديزاينىمەن، ايرىقشا ساپاسىمەن، تارتىمدى مازمۇنىمەن ەرەكشەلەنەدى. بۇل كىتاپتاردىڭ وقۋعا قۇمار جەتكىنشەكتەرگە بەرەرى مول. قىسقاسى، وقيتىن بالا بولسا – لايىقتى كىتاپ وتە كوپ.
ءسوزىنىڭ سوڭىندا «اتامۇرا» كورپوراتسياسىنىڭ ۆيتسە-پرەزيدەنتى راحيما قۇل-مۇحاممەد وسى كىتاپتاردىڭ كەز كەلگەنىن وقىپ، مازمۇنىن ايتا بىلەتىن جاس وقىرماندارعا كىتاپ سىيلايتىندارىن ءمالىم ەتتى. جاڭا ەنتسيكلوپەديانىڭ بىرنەشە داناسى تانىستىرىلىمعا كەلگەن وقىرماندارعا تارتۋ ەتىلدى.
