بۇگىن الاشتىڭ اسا كورنەكتى قايراتكەرى، جازۋشى-جۋرناليست، ۇلت ۇرانىنىڭ اۆتورى مىرجاقىپ دۋلاتۇلىنىڭ تۋعان كۇنى، تۋرا 140 جىل تولدى. ءبارىمىز ارۋاعىن تەربەتىپ، ەسىمىن اتاپ ەسكە الىپ جاتىرمىز، دۇرىس-اق. بىراق ءبىزدى مىنا ءبىر جايت الاڭداتىپ وتىر.
1917 جىلعى ءىى جالپى قازاق-قىرعىز قۇرىلتايى جيىنىنان سوڭ، ەلدى بۇلىنشىلىكتەن قورعاۋ ءۇشىن جەر-جەردە اسكەرگە جىگىت جيناۋ ءىسى باستالدى. مىرجاقىپ دۋلاتۇلى جانىندا اتاقتى زاڭگەر ايدارحان تۇرلىبايۇلى بار ەكەۋى قىزىلجار ماڭىنداعى اققۇساق دەگەن جەردە توتەنشە جيىن اشادى. شىلدەدە وتكەن بۇل جيىندا ەل-جۇرتقا الاش يدەياسى ءتۇسىندىرىلىپ، حالىقتى قورعاۋ تۋرالى ءسوز بولادى.
107 جىل وتكەندە وسى اۋماققا (جامبىل اۋدانىنىڭ پەتروۆكا اۋىلىنىڭ ماڭى) مەملەكەتتىك بيۋدجەتكە قول سالماي، جەكەلەگەن كاسىپكەرلەردىڭ كومەگىمەن مەموريالدىق كەشەن تۇرعىزىلادى.
قازىرگى زامانعى ينجەنەرلىك-ارحيتەكتۋرالىق تالاپتارعا ساي جاسالعان، بيىكتىگى 28 مەتر بولاتىن ەڭسەلى ەسكەرتكىش 27 قىركۇيەكتە اشىلۋى ءتيىس بولعان، ۋاقىت جاقىنداعاندا ۇيىمداستىرۋشىلار قاساقانا قيراتىلعان، بۇلىنگەن كەزىنە تاپ بولادى.
جاعا ۇستاتار بۇل سوراقىلىقتى كىم جاسادى؟ ۆانداليزممەن جاقسى دۇنيەنى بۇلدىرگەندەر كىمدەر؟
كەشەندى جاساۋشىلاردىڭ ايتۋىنشا، سولتۇستىك قازاقستان وبلىسىنىڭ اكىمدىگى تەحنيكا، كراندار، جۇمىسشىلار جىبەرىپ، كەشەندى تالقانداۋدى باستاعان. توبەدەگى قىراننىڭ سيمۆولدىق بەينەسىن، اينالاسىنداعى شام باعاندارىن، مەموريالدىق تاقتا سىندىرىپ، بۇزىپ كەتەدى.
نە ءۇشىن؟ قانداي ماقساتتا ورىندالدى؟ وبلىس اكىمى عاۋەز نۇرمۇحامبەتوۆ پەن ونىڭ ايتقانىن ەكى ەتپەيتىن ورىنباسارى ءجۇسىپ جۇماعۇلوۆ باسقاراتىن اكىمدىكتىڭ ويىنشا، «الاش» پارتياسىنا، الاش وردا ۇكىمەتىنە جانە ونىڭ كوسەمدەرىنە 28 مەترلىك مۇنداي كەرەمەت ەسكەرتكىش ورناتۋعا بولمايدى-مىس. سولتۇستىك قازاقستان گازەتى راس پا؟
كەشەندى تولىق قيراتۋعا داتتەرى جەتپەگەن سياقتى. الاشتىڭ اسىل ازاماتتارىنىڭ رۋحى باستى ما، الدە وزگە ءبىر سەبەپ بار ما، وبلىس اتقامىنەرلەرى مۇلدەم جويىپ جىبەرە الماپتى.
ەندى نە بولماق؟ مۇقىم قازاق ەلىنىڭ الدىندا قارابەت بولمايىن دەسە، وبلىس اكىمدىگى جىبەرگەن كەمشىلىكتى تۇزەپ، ەسكەرتكىشتى قالپىنا كەلتىرۋى ءتيىس. كەشەننىڭ اشىلۋىن دۇرىستاپ ۇيىمداستىرىپ، ەل-جۇرتقا پاش ەتىپ، مىرجاقىپ دۋلاتۇلىنداي ۇلى قايراتكەرگە لايىقتى قۇرمەت پەن تاعزىمدى اسىرۋى كەرەك. قر مادەنيەت جانە اقپارات مينيسترلىگى نە دەيسىزدەر؟ بۇل كەشەن تەك مىرجاقىپقا عانا قاتىستى ەمەس، وسى ولكەگە عانا تيەسىلى ەمەس، ءاليحان، احمەت، جاھانشا، مۇحامەدجان، سماعۇل سىندى تاۋ تۇلعالارعا قۇرمەت دەپ ەسەپتەلەدى.
