بۇگىن الاشوردا قايراتكەرى مۇحامەتجان تىنىشبايۇلىنىڭ تۋعان كۇنى، دەپ حابارلايدى "ادىرنا" ۇلتتىق پورتالى.
قازاقتىڭ كورنەكتى ساياسي جانە قوعام قايراتكەرى، الاش قوزعالىسىنىڭ نەگىزىن سالۋشىلاردىڭ ءبىرى، الاشتىڭ ءىرى قوعام جانە مەملەكەت قايراتكەرى، تاريحشى، اعارتۋشى، تۇڭعىش تەمىر جول ينجەنەرى مۇحامەدجان تىنىشباەۆ 1879 جىلى 12 مامىردا جەتىسۋ وبلىسىندا تۋعان.
اۋىل مولداسىنان حات تانىعان قاراپايىم قازاق بالاسى رەسەيدە ينستيتۋتقا ءتۇسىپ، ونى تامامداعان. مۇحامەدجان تىنىشباەۆ 1905 جىلى قازاق سىندى شەت ۇلتتاردى بيلەۋدە وكىمەتتىڭ اسكەري تارتىپتەن ارىلىپ، ازاماتتىق جولعا ءتۇسۋىن ۇسىنعان دالەلدى حاتىن مينيسترلەر كوميتەتىنىڭ توراعاسىنا جولداعان. سول جىلى ينجەنەر «قازاقتار ءجاش ازاتتىق قوزعالىسى» اتتى بايانداما جاساپ، قازاقتىڭ قازىرگى جاعدايى مەن ومىرگە قاجەتتى سۇرانىمىنىڭ جالپى سيپاتتاماسىن اتاعان.
ينجەنەر تىنىشباەۆ 1906 جىلى ەلگە كەلىپ، ءبىراز ۋاقىت جەتىسۋ تەمىرجولىن جوبالاۋ ىسىنە قاتىسقان.
1907 جىلى ول تۇركىستان گەنەرال-گۋبەرناتورلىعى قاراماعىنداعى ايماقتىڭ تەمىرجول قۇرىلىسىنا ينجەنەر رەتىندە اتسالىسادى. 1907- 1914 جىلدار ارالىعىندا ءامۋداريا ۇستىنە سالىنعان كوپىر قۇرىلىسىنا، ۇرسات (ۋرساتەۆسك) - ءاندىجان تەمىرجول قۇرىلىسىنا جەتەكشى مامان، باس ينجەنەر ەسەبىندە قاتىسادى. تەمىرجول سالاسىنا بايلانىستى ەڭبەگىن عانا پارىقتاعاننىڭ وزىندە مۇحامەدجان تىنىشباەۆ - كىندىك ازيا كولەمىندە ەلەنۋگە لايىقتى ينجەنەر-تەمىرجولشى اتانعان.
1915 جىلى تۇركسىب جوباسىنىڭ اۆتورى، ينجەنەر مۇحامەدجان تىنىشباەۆ تەمىرجول باسىندا جۇرگەندە وعان تاشكەنت مۇعالىمدەر ينستيتۋتىنا وقۋعا بارماق بولىپ قارجىدان قىسىلىپ جۇرگەن تۇرار رىسقۇلوۆ ۇشىراسادى. ول قازاق بالاسىنىڭ زەيىنىن اشۋ ماقساتىندا قولما-قول اقشا ۇسىنىپ جانە اداعى ۋاقىتتا كەرەكتى قاراجاتىن ادرەسىنە سالىپ تۇراتىنىن ايتادى.
ەكى ازاماتتىڭ وسى رياسىز كوڭىلى ادال باۋىرلاستىققا ۇلاسادى.
