فوتو: podrobno.uz
وزبەكستان پرەزيدەنتى شاۆكات ميرزيوەۆ پەن رەسەي پرەزيدەنتى ۆلاديمير پۋتين جيزاق وبلىسىندا سالىناتىن اتوم ەلەكتر ستانتسياسىنىڭ (اەس) ءبىرىنشى ەنەرگوبلوگىنىڭ قۇرىلىسىنا رەسمي ستارت بەردى. جوبا سانكت-پەتەربۋرگتەن بەينەبايلانىس ارقىلى باستالىپ، وعان حالىقارالىق اتوم ەنەرگياسى اگەنتتىگىنىڭ وكىلدەرى دە قاتىستى، دەپ حابارلايدى "ادىرنا".
جيزاق وبلىسىنداعى جوبا ەرەكشە فورماتىمەن نازار اۋدارتادى: ءبىر كەشەندە قۋاتى 1000 مۆت بولاتىن ەكى ءىرى رەاكتور جانە 55 مۆت بولاتىن ەكى شاعىن رەاكتور سالىنادى. ساراپشىلاردىڭ ايتۋىنشا، مۇنداي ارالاس مودەل الەمدە العاش رەت جۇزەگە اسىپ وتىر.
ستانتسيا ىسكە قوسىلعاننان كەيىن جىلىنا شامامەن 17 ملرد كۆت·ساع ەلەكتر ەنەرگياسىن وندىرەدى دەپ كۇتىلەدى. بۇل وزبەكستاننىڭ ەلەكتر ەنەرگياسىنا دەگەن سۇرانىسىنىڭ شامامەن 15 پايىزىن جابۋعا مۇمكىندىك بەرەدى.
وزبەكستان پرەزيدەنتى شاۆكات ميرزيوەۆ جوبادا قاۋىپسىزدىك پەن ەكولوگيالىق ستاندارتتاردىڭ تولىق ساقتالاتىنىن اتاپ ءوتتى. بارلىق جۇمىستار حالىقارالىق اتوم ەنەرگياسى اگەنتتىگىنىڭ تالاپتارىنا ساي جانە حالىقارالىق باقىلاۋمەن جۇرگىزىلەدى.
«ۋزاتوم» اگەنتتىگىنىڭ توراعاسى ازيم احمەدحادجاەۆتىڭ ايتۋىنشا، جوبانىڭ بازالىق قۇنى 9,5 ملرد دوللاردى قۇرايدى. ونىڭ 85-90 پايىزى نەسيە ەسەبىنەن قارجىلاندىرىلادى. قارجىنىڭ ءبىر بولىگى بريكس قۇرامىنداعى جاڭا دامۋ بانكىمەن كەلىسسوزدەر ارقىلى تارتىلۋى مۇمكىن.
سونىمەن قاتار جوبا اياسىندا جەرگىلىكتى ءوندىرىس ۇلەسىن 30 پايىزعا دەيىن ارتتىرۋ جوسپارلانعان. بۇل قۇرىلىس شىعىندارىن ازايتۋعا جانە ەكونوميكالىق تيىمدىلىكتى ارتتىرۋعا ىقپال ەتپەك.
جوبا جيزاق وبلىسى فاريش اۋدانىندا، تۋزكان كولى ماڭىندا ىسكە اسىرىلادى. قۇرىلىستا شامامەن 15 مىڭ ادام جۇمىس ىستەيدى دەپ جوسپارلانعان.
ايتا كەتسەك، بۇل اەس قازاقستان-وزبەكستان شەكاراسىنان 320 كم جەردەن سالىنادى. قازىر قازاقستاندا العاشقى اتوم ەلەكتر ستانتسياسىن سالۋ جوباسى دا كەزەڭ-كەزەڭىمەن ىسكە اسىرىلىپ جاتىر. اتوم ەنەرگياسى اگەنتتىگىنىڭ مالىمەتىنشە، ەلدە العاشقى اەس قۇرىلىسىنىڭ جالپى قۇنى شامامەن 16,4 ملرد دوللاردى قۇرايدى.
