قازاقستان حالقى اسسامبلەياسىنىڭ XXXIV سەسسياسىنىڭ پلەنارلىق وتىرىسىندا پرەزيدەنت قاسىم-جومارت توقاەۆ مەملەكەتتىك ءتىلدىڭ مارتەبەسى جايلى ءسوز قوزعادى. بۇل تۋرالى اقوردا جازدى، دەپ حابارلايدى “ادىرنا” ۇلتتىق پورتالى.
«بۇگىندە تۇلەكتەردىڭ 80 پايىزعا جۋىعى ۇلتتىق بىرىڭعاي تەستىلەۋدى مەملەكەتتىك تىلدە تاپسىرادى. بيىل العاش رەت مەكتەپكە باراتىن بالالاردىڭ 70 پايىزدان استامى قازاق تىلىندە وقيتىن بولادى. ارينە، ەلىمىزدە ازاماتتار ءبىر-ءبىرىن نەمەسە مىنبەردە سويلەپ تۇرعان ادامدى «مىنا تىلدە سويلە» دەپ ماجبۇرلەمەۋگە ءتيىس. ءتىل ماسەلەسىن تۋ ەتىپ قوعامدا الاۋىزدىق تۋعىزعىسى كەلەتىن، ەل ىشىندەگى جاعدايدى شيەلەنىستىرۋگە ۇمتىلاتىن ءاربىر ارەكەتكە توسقاۋىل قويىلىپ، زاڭ جۇزىندە جازالانادى. بۇل رەتتە ءۇي ىشىندەگى عانا ەمەس، شەتەلدە وتىرىپ الدەبىر ۇيىمداردىڭ اقشاسى مەن تاپسىرماسىنا دەسترۋكتيۆتى ارەكەتپەن اينالىساتىن ارانداتۋشىلار تۋرالى دا ايتىپ وتىرمىز»، - دەدى توقاەۆ.
ونىڭ ايتۋىنشا، بىلتىر ۇلتتىق قۇرىلتاي وتىرىسىندا بىرلىك، وتانشىلدىق، تاۋەلسىزدىك جانە كەلىسىم مەملەكەتىمىزدىڭ نەگىزگى قۇندىلىقتارى رەتىندە اتالعان ەدى.
«ءبارى دە وسى قۇندىلىقتاردان باستالادى. سوندىقتان وسى جەردە تاعى دا قايتالاپ ايتقىم كەلەدى: حالقىمىزدىڭ تاتۋلىعىن بۇزىپ، ەل ىشىنە ىرىتكى سالعىسى كەلەتىندەر زاڭعا سايكەس قاتاڭ تۇردە جاۋاپقا تارتىلادى، ءتيىستى جازاسىن الادى. ال ىنتىماق پەن بىرلىكتى نىعايتۋعا ۇلەس قوسقان ازاماتتار ءاردايىم زور قۇرمەتكە يە بولادى»، - دەدى ول.
