ىشكى ىستەر ءمينيسترى جاريالاعان «پروفيلاكتيكا جىلى» اياسىندا اتىراۋدا كولىك جۇرگىزۋشىلەرىنىڭ جاۋاپكەرشىلىگىن ارتتىرۋ جانە جول قوزعالىسىنداعى مادەنيەتتى ناسيحاتتاۋ ماقساتىندا رەسپۋبليكالىق «ۇلگىلى جۇرگىزۋشى – 2025» اكتسياسى ءوتتى.
ءىس-شارا بارىسىندا اتىراۋلىق پوليتسەيلەر اۆتوكولىكتەردى توقتاتىپ، ءار جۇرگىزۋشىنىڭ جۇرگىزۋشى كۋالىگىن العان كەزدەن بەرگى قۇقىقبۇزۋشىلىق تاريحىن تەكسەردى. ءتارتىپتى قاتاڭ ساقتاپ، بىردە-ءبىر جول ەرەجەسىن بۇزباعان وننان استام قالا تۇرعىنى اتىراۋ وبلىسى پوليتسيا دەپارتامەنتى باستىعىنىڭ ورىنباسارى، پوليتسيا پولكوۆنيگى ابدىعاني سەيدۋاليەۆتىڭ العىس حاتىمەن ماراپاتتالدى. 
سونداي-اق، قاسىم قايسەنوۆ اتىنداعى №33 ورتا مەكتەبىنىڭ «ساقشىلار» جاس جول ينسپەكتورلارى «كولىك تىزگىنىندە اباي بول!» تاقىرىبىندا سالعان سۋرەتتەرىن جۇرگىزۋشىلەرگە سىيعا تارتىپ، ارنايى دايىندالعان «ۇلگىلى جۇرگىزۋشى» جاپسىرمالارىن كولىكتەرىنە جاپسىردى.
اكتسيا سوڭىندا پوليتسيا قىزمەتكەرلەرى جۇرگىزۋشىلەردى جولدا بارىنشا مۇقيات بولۋعا، بەلگىلەنگەن جىلدامدىق رەجيمىن ساقتاۋعا، قولايسىز اۋا رايىندا اسا ساق جۇرۋگە جانە كىشكەنتاي جاياۋ جۇرگىنشىلەردىڭ قاۋىپسىزدىگىن ەستەن شىعارماۋعا شاقىردى.
