مەملەكەت باسشىسى قاسىم-جومارت توقاەۆ ءوڭىر ەلدەرىنىڭ ەكونوميكالىق ىنتىماقتاستىعىن نىعايتۋ، بىرلەسكەن ينفراقۇرىلىمدىق جوبالاردى ىسكە اسىرۋ ماسەلەلەرى قاۋىپسىزدىكپەن تىعىز بايلانىستى ەكەنىن ايتتى. بۇل تۋرالى ول «ورتالىق ازيا – قىتاي» فورماتىنداعى ەلدەردىڭ ىشكى ىستەر جانە قوعامدىق قاۋىپسىزدىك مينيسترلەرىن قابىلداۋ كەزىندە ايتتى، دەپ حابارلايدى "ادىرنا".
پرەزيدەنتتىڭ پىكىرىنشە، بۇگىندە ترانسكاسپي حالىقارالىق كولىك باعىتى ەۋرازيالىق لوگيستيكانىڭ ماڭىزدى ستراتەگيالىق ەلەمەنتىنە اينالىپ وتىر. الايدا ونىڭ قارقىندى دامۋى بەلگىلى ءبىر قاۋىپ-قاتەرلەردى دە قاتار الىپ كەلەدى.
"ترانسكاسپي حالىقارالىق كولىك باعىتى ەۋرازيالىق لوگيستيكانىڭ ستراتەگيالىق ەلەمەنتىنە اينالىپ كەلەدى. جاھاندىق ساۋدا تىزبەگىنىڭ ترانسفورماتسياسىنا جانە گەوساياسي قىسىمنىڭ كۇشەيۋىنە سايكەس ونىڭ ماڭىزى ەسەلەپ ارتتى. سونىمەن قاتار جۇك تاسىمالىن ۇلعايتۋدىڭ بەلگىلى ءبىر قاۋىپ-قاتەرلەرى بار. اڭگىمە ترانسۇلتتىق قىلمىس، سونىڭ ىشىندە كونتراباندا، ەسىرتكى، قارۋ-جاراق تاسىمالى تۋرالى بولىپ وتىر", – دەدى پرەزيدەنت.
مەملەكەت باسشىسى وڭىرلىك قاۋىپسىزدىكتىڭ ءتيىمدى جۇيەسىن قالىپتاستىرۋ ءۇشىن "ورتالىق ازيا – قىتاي" فورماتىنىڭ الەۋەتىن بارىنشا پايدالانۋ قاجەت ەكەنىن اتاپ ءوتتى.
وسىعان بايلانىستى پرەزيدەنت ىشكى ىستەر مينيسترلىكتەرى اراسىنداعى ءوزارا ءىس-قيمىلدى كۇشەيتىپ، قاۋىپسىزدىك پەن قوعامدىق تارتىپكە قاتىستى اقپارات الماسۋدى جۇيەلەۋ ماڭىزدى ەكەنىن جەتكىزدى.
"مەنىڭ ويىمشا، ىشكى ىستەر مينيسترلىكتەرى ءبىر-بىرىمەن ىنتىماقتاستىقتى كۇشەيتىپ، قاۋىپسىزدىك جانە قوعامدىق ءتارتىپ ماسەلەلەرىنە قاتىستى اقپاراتتارمەن بولىسۋگە ءتيىس. بۇل حالىقتارىمىزدىڭ ارمان-تىلەگىنە تولىعىمەن ساي كەلەدى. جۇرتشىلىق مەملەكەتتەر باسشىلارىنان ءوز ەلدەرىن تارتىپكە كەلتىرىپ، قالىپتى ءارى قاۋىپسىز ومىرگە قولايلى جاعداي جاساۋ ءۇشىن اسا شۇعىل، ءتيىمدى شەشىمدەر قابىلداۋدى تالاپ ەتىپ وتىر", – دەدى قاسىم-جومارت توقاەۆ.
سونداي-اق مەملەكەت باسشىسى ازاماتتاردىڭ وزدەرىن قاۋىپسىز سەزىنۋى ءۇشىن قوعامدىق ءتارتىپتى قامتاماسىز ەتۋ باعىتىنداعى ناقتى ءارى زاڭعا نەگىزدەلگەن شارالار قابىلدانۋى قاجەت ەكەنىن ايتتى.
"بالالارىمىز، جالپى حالىق ەل باسشىلارىنىڭ، ىشكى ىستەر مينيسترلەرى مەن باسقا دا ۆەدومستۆو جەتەكشىلەرىنىڭ زاڭعا سايكەس قوعامدىق ءتارتىپتى ساقتاۋ شارالارىن قابىلداپ جاتقاندارىنا كوزدەرى جەتىپ، وزدەرىن قاۋىپسىز سەزىنۋى قاجەت", – دەدى پرەزيدەنت.
قاسىم-جومارت توقاەۆ قازاقستاننىڭ قىتاي حالىق رەسپۋبليكاسىمەن جانە ورتالىق ازيا مەملەكەتتەرىمەن ءوزارا سەنىم، تاتۋ كورشىلىك، ورتاق جاۋاپكەرشىلىك نەگىزىندەگى ىنتىماقتاستىقتى ىلگەرىلەتۋگە ەرەكشە ءمان بەرەتىنىن جەتكىزدى
كەزدەسۋگە قاتىسۋشىلار ءوزارا بايلانىستاردى جولعا قويۋعا، جەدەل اقپارات الماسۋعا، كاسىبي قارىم-قاتىناستاردى دامىتۋعا جانە قۇقىق قورعاۋ ورگاندارىنىڭ قىزمەتىنە زاماناۋي تەحنولوگيالاردى ەنگىزۋگە نيەتتى ەكەندەرىن راستادى.
پرەزيدەنت اتالعان جيىننىڭ ورتالىق ازيا مەن قىتاي اۋماعىنداعى قاۋىپسىزدىكتى قامتاماسىز ەتۋ بويىنشا سەرىكتەستىك پەن ىقپالداستىققا تىڭ سەرپىن بەرەتىنىنە سەنىم ءبىلدىردى.
