اتىراۋداعى №90 سايلاۋ ۋچاسكەسىندە داۋىس بەرۋ پروتسەسى جالعاسۋدا. ۋچاسكەلىك سايلاۋ كوميسسياسىنىڭ توراعاسى گۇلمارجان بيسەمباەۆانىڭ ايتۋىنشا، مۇندا بارلىعى 2300 سايلاۋشى تىركەلگەن.
ولاردىڭ اراسىندا بيىل العاش رەت داۋىس بەرىپ وتىرعان 18 جاسقا تولعان 18 ازامات بار. ال ەڭ ۇلكەن سايلاۋشى – 81 جاستاعى ەر ادام. سونىمەن قاتار 5 ازامات ۇيدەن داۋىس بەرەدى.
ساعات 13:00-دەگى مالىمەت بويىنشا، №90 ۋچاسكەگە 800-گە جۋىق ادام كەلىپ، ءوز تاڭداۋىن جاساعان. كوميسسيا توراعاسىنىڭ ايتۋىنشا، ۋچاسكەدەگى احۋال تۇراقتى، داۋىس بەرۋ پروتسەسى قالىپتى ءوتىپ جاتىر.
سايلاۋعا بەلسەندى قاتىسۋشىلاردىڭ قاتارىندا اتىراۋ وبلىسىنىڭ ىسكەر ايەلدەر قاۋىمداستىعىنىڭ وكىلدەرى دە بار. №90 ۋچاسكەگە 30-دان استام كاسىپكەر ايەل كەلىپ، ءوز تاڭداۋلارىن جاسادى. قازىرگى تاڭدا قاۋىمداستىق قۇرامىندا 70-تەن استام كاسىپكەر ايەل بار.
«بۇگىن اتىراۋ وبلىسىنىڭ ىسكەر ايەلدەرى رەتىندە ەلىمىز ءۇشىن ماڭىزدى تاريحي كۇنگە قاتىسىپ وتىرمىز. ءبىزدىڭ ماقساتىمىز – ەلىمىزدىڭ بۇگىنى مەن بولاشاعى ءۇشىن ءوز تاڭداۋىمىزدى جاساۋ. سوندىقتان ءار ازاماتتىڭ داۋىس بەرىپ، ءوز ازاماتتىق ۇستانىمىن ءبىلدىرۋى ماڭىزدى»، – دەدى اتىراۋ وبلىسىنىڭ ىسكەر ايەلدەر قاۋىمداستىعىنىڭ ءتورايىمى ارداق جاۋىروۆا.
كاسىپكەر ايەلدەر سايلاۋ ۋچاسكەسىنە ەرەكشە وبرازدارىمەن كەلىپ، داۋىس بەرۋ راسىمىنە بەلسەندى قاتىستى. ولار بۇل كۇننىڭ ماڭىزدىلىعىن اتاپ ءوتىپ، ازاماتتىق جاۋاپكەرشىلىكتىڭ ءار ادام ءۇشىن ماڭىزدى ەكەنىن جەتكىزدى.
