اتىراۋداعى سۇلتان بەيبارىس الاڭىندا وتكەن اۋقىمدى «كىتاپ FEST» فەستيۆالىنە 8000-نان استام ادام جينالدى. كىتاپ وقۋدى ناسيحاتتايتىن مۇنداي كەڭ كولەمدەگى ءىس-شارا وڭىردە العاش رەت ۇيىمداستىرىلىپ وتىر.
كىتاپ جارمەڭكەسىنە 5000-نان استام كىتاپ قويىلدى. وعان ەلىمىزدىڭ سەگىز باسپاسى مەن وبلىس اۋداندارىنداعى كىتاپ جەلىلەرى قاتىستى. فەستيۆال قورىتىندىسى بويىنشا 4000-عا جۋىق كىتاپ ساتىلىپ، تۇرعىنداردىڭ كىتاپ وقۋعا دەگەن قىزىعۋشىلىعىنىڭ جوعارى ەكەنىن بايقاتتى.
وبلىس اكىمى سەرىك شاپكەنوۆ فەستيۆالگە قاتىسۋشىلاردى ۇلتتىق كىتاپ كۇنىمەن قۇتتىقتاپ، ءوڭىردىڭ ەڭ بەلسەندى وقىرماندارىن ماراپاتتادى.
ايماق باسشىسى ءوز سوزىندە مەملەكەت باسشىسىنىڭ «وقيتىن ۇلتقا اينالۋ» ماقساتى جاي ۇران ەمەس، قوعامدى رۋحاني دامۋعا باستايتىن ماڭىزدى باعىت ەكەنىن اتاپ ءوتتى.
– 16–23 ءساۋىر ارالىعىندا ۇلتتىق كىتاپ كۇنىنە وراي وبلىستا كوپتەگەن ءىس-شارا ۇيىمداستىرىلدى. بۇل كىتاپقا دەگەن قىزىعۋشىلىقتىڭ ارتىپ كەلە جاتقانىن كورسەتەدى. بۇگىنگى فەستيۆال اقىن-جازۋشىلاردى، ادەبيەت وكىلدەرىن مەن باسپاگەرلەردى ءبىر الاڭعا توعىستىردى. سىزدەر ءسوز ارقىلى قوعامدىق سانانى قالىپتاستىرىپ، جاس ۇرپاققا باعىت-باعدار بەرىپ كەلەسىزدەر. ۇلتتىڭ رۋحاني قازىناسىنا بالاناتىن ەڭبەكتەرىڭىزگە شىنايى العىسىمدى ايتامىن. سونداي-اق كىتاپحانا قىزمەتكەرلەرىنە ءوز ريزاشىلىعىمدى بىلدىرەمىن، – دەدى س. شاپكەنوۆ.
فەستيۆال مازمۇندى مادەني باعدارلامامەن جالعاستى. بالالارعا ارنالعان ميۋزيكل مەن اتىراۋلىق كورنەكتى اقىنداردىڭ شىعارماشىلىعىنا نەگىزدەلگەن تەاترلاندىرىلعان قويىلىم كوپتىڭ كوڭىلىنەن شىقتى. «كىتاپ FEST» قازاقستاندىق ەسترادا جۇلدىزدارى مەن جەرگىلىكتى ونەرپازداردىڭ قاتىسۋىمەن وتكەن كونتسەرتپەن قورىتىندىلاندى.
