اتىراۋدا مەكتەپتە 13 جاستاعى قىزعا پىشاقپەن شابۋىل جاساعان ءجاسوسپىرىم 15 جىلعا باس بوستاندىعىنان ايىرىلدى، دەپ حابارلايدى "ادىرنا" ۇلتتىق پورتالى.
سوت ونىڭ قىلمىسقا الدىن الا دايىندالعانىن جانە جابىرلەنۋشىمەن بۇعان دەيىن تانىس بولماعانىن انىقتادى.
وقيعا 13 ناۋرىزدا بولعان. قىلمىستىق ءىس القابيلەردىڭ قاتىسۋىمەن قارالدى. ۇكىمدى سۋديا زارەما حاميدۋللينا جاريالادى.
ءىس ماتەريالدارىنا سايكەس، وقيعا بولعان كۇنى ءجاسوسپىرىم سوڭعى ساباقتان كەيىن ساعات 12:30 شاماسىندا مەكتەپتەن كەتكەن. كەيىن ۇيىنە ورالىپ، ساعات 16:56-دا قايتادان وقۋ ورنىنا كەلگەن. ول كۇزەتشىگە كوزىلدىرىگىن ۇمىتىپ كەتكەنىن ايتىپ، عيماراتقا كىرگەن. بۇل كەزدە ونىڭ سومكەسى تەكسەرىلمەگەن.
مەكتەپ دالىزىندە ءۇش قىز بەن ءبىر ۇلدى كورگەن ءجاسوسپىرىم وقۋشىلاردىڭ بىرىنە شابۋىل جاساپ، پىشاقپەن بەس رەت سوققى جاساعان.
13 جاستاعى قىز شۇعىل تۇردە اتىراۋ وبلىستىق بالالار اۋرۋحاناسىنا جەتكىزىلدى. العاشىندا دارىگەرلەر ونىڭ جاعدايىن اۋىر دەپ باعالاعان. كەيىن جاعدايى تۇراقتالىپ، جانساقتاۋ بولىمىنەن حيرۋرگيا بولىمىنە اۋىستىرىلعان.
سوت وتىرىسىندا ءجاسوسپىرىم مەن جابىرلەنۋشىنىڭ بۇرىن تانىس بولماعانى جانە اراسىندا جەكە جانجال بولماعانى انىقتالدى. ايىپتاۋ تاراپى دالەل رەتىندە ونىڭ داپتەرىندەگى جازبالار مەن مەكتەپتىڭ بەينەباقىلاۋ كامەرالارىنداعى جازبالاردى ۇسىنعان. داپتەردە ءوز اتا-اناسىن ءولتىرۋ تۋرالى ويلار دا بولعان.
سوت انىقتاعانداي، بۇعان دەيىن ءجاسوسپىرىم مەكتەپ پسيحولوگىنا جۇگىنىپ، سىنىپتاستارى تاراپىنان بۋللينگكە ۇشىراعانىن ايتقان. الايدا وعان قاتىستى ۇرىپ-سوعۋ نەمەسە وزگە دە فيزيكالىق زورلىق-زومبىلىق فاكتىلەرى راستالماعان.
سونداي-اق سوت پروتسەسىندە ونىڭ تەرروريزم سيپاتىنداعى تىيىم سالىنعان ماتەريالدارعا، قاتىگەزدىك پەن زورلىق-زومبىلىق بەينەلەنگەن كونتەنتكە قىزىعۋشىلىق تانىتقانى ايتىلدى.
ايىپتالۋشى داپتەردەگى كەيبىر جازبالاردى ءوزى جازعانىن جوققا شىعارىپ، شابۋىل كەزىندە ەسىنەن اداسقانىن العا تارتقان. الايدا سوت-پسيحياتريالىق ساراپتاما ونى اقىل-ەسى دۇرىس دەپ تانىدى. ماماندار قىلمىس كەزىندە ونىڭ قاتتى ەموتسيالىق كۇيزەلىس جاعدايىندا بولماعانىن، ءوز ارەكەتتەرىنىڭ ءمانىن ءتۇسىنىپ، ولاردى باسقارا العانىن انىقتادى.
سوت ءجاسوسپىرىمنىڭ ارەكەتىن قىلمىستىق كودەكستىڭ 29-بابىنىڭ 3-بولىگى جانە 99-بابىنىڭ 3-بولىگى بويىنشا كامەلەتكە تولماعان بالانى ولتىرۋگە وقتالۋ دەپ سارالادى.
وعان كامەلەتكە تولماعاندارعا ارنالعان ورتاشا قاۋىپسىزدىك مەكەمەسىندە وتەۋ شارتىمەن 15 جىل باس بوستاندىعىنان ايىرۋ جازاسى تاعايىندالدى. ۇكىم زاڭدى كۇشىنە ەنگەنگە دەيىن قاماۋدا وتكىزگەن ءاربىر كۇنى جازا مەرزىمىنىڭ ءبىر جارىم كۇنى رەتىندە ەسەپتەلەدى.
سوت شەشىمىنە 15 تاۋلىك ىشىندە شاعىم تۇسىرۋگە بولادى.
