حالىقپەن تىكەلەي بايلانىساتىن، كوپپشىلىكتىڭ كوڭىلىن كۇپتى ەتكەن جايلاردى شەشۋگە وكىلەتتى تۇلعاعا قويىلاتىن تالاپتار ولشەمى ۋاقىتقا ساي جاڭا ساتىعا كوتەرىلدى.
مەملەكەتتىك قىزمەتشى كەلبەتى قانداي بولۋى كەرەك، وعان قاجەتتى ادامي، كاسىبي قاسيەتتەر قانداي، مەملەكەتتىك قىزمەتشىنىڭ وڭ ءيميدجىن قالىپتاستىرۋ – مەملەكەت ءۇشىن، قوعام ءۇشىن ماڭىزدى ماسەلە. مىنە، سوندىقتان دا ەلىمىزدە مەملەكەتتىك قىزمەت حالىققا بارىنشا اشىق بولىپ، زاماناۋي تسيفرلىق تەحنولوگيالاردى قولدانۋ ارقىلى بيۋروكراتيانى بولدىرمايتىن، جاڭاشا ويلايتىن جاس مامانداردى تارتۋعا باسا نازار اۋدارىلادى. بۇل جاستاردىڭ ماقساتتى باعىتىن ايقىنداپ، مانساپتىق وسۋىنە، مەملەكەتتىك قىزمەتتىڭ وڭ ءيميدجىن قالىپتاستىرۋعا مۇمكىندىك بەرەدى.
جاڭاشىل جۇيە
مەملەكەت باسشىسىنىڭ مەملەكەتتىك قىزمەتكە قابىلداۋ كەزىندە ارتىق كەدەرگىلەر مەن توسقاۋىلداردى جويۋ، ازاماتتار ءۇشىن مەملەكەتتىك قىزمەتتىڭ بارىنشا اشىقتىعى مەن قولجەتىمدىلىگىن قامتاماسىز ەتۋ تۋرالى تاپسىرماسى بويىنشا 2022 جىلعى 30 جەلتوقساندا
«قر مەملەكەتتىك قىزمەتى تۋرالى» زاڭعا ءتيىستى تۇزەتۋلەر ەنگىزىلدى.
وسى وزگەرىستەر مەن تولىقتىرۋلار مەملەكەتتىك ورگانداردىڭ باسشىلىق لاۋازىمدارىنا اگەنتتىكپەن كەلىسىم بويىنشا كونكۋرسسىز تىكەلەي تاعايىنداۋ تەتىگىن بەلگىلەدى.
بۇل مەملەكەتتىك ورگاندارعا بىلىكتى جانە سالالىق تاجىريبەسى بار مامانداردى تارتۋعا مۇمكىندىك بەردى.
جاستارعا ۇلكەن جاۋاپكەرشىلىك ارتىلادى
بۇگىنگى كۇنى مەملەكەتتىك قىزمەت سالاسىنداعى وزگەرىستەر ازاماتتاردىڭ مەملەكەتتىك قىزمەتكە ورنالاسۋىن جەڭىلدەتۋگە، اشىقتىقتى قامتاماسىز ەتۋگە، كونكۋرستىق ۇردىستەردى قىسقارتۋعا باعىتتالعان. قازىرگى تاڭدا مەملەكەتتىك قىزمەتكە قابىلداۋدى وڭايلاتۋ ءۇشىن جاڭا مۇمكىندىكتەر جاسالدى. قازاقستان مەملەكەتتىك قىزمەتتەگى كادر ساياساتىندا پروگرەسسيۆتى كوزقاراس باعىتىن قولدايدى.
ۇزدىك تۇلەكتەردى مەملەكەتتىك قىزمەتكە تارتۋ باعىتىندا مەملەكەت باسشىسىنىڭ تاپسىرماسىن ورىنداۋ شەڭبەرىندە جوعارى ۇلگەرىمىن كورسەتكەن جانە گرانت بويىنشا ءبىلىم العان جوعارى وقۋ ورىندارىنىڭ تۇلەكتەرى مەن وقۋدى تابىستى اياقتاعان مەملەكەتتىك باسقارۋ اكادەمياسىنىڭ تۇلەكتەرى ءۇشىن «ب» كورپۋسىنىڭ جەكەلەگەن باسشىلىق لاۋازىمدارىنا كونكۋرس وتكىزىلمەستەن ورنالاسۋى زاڭمەن رەتتەلگەنىن ايتۋ قاجەت.
بۇگىنگى كۇنى مەملەكەتتىك قىزمەت سالاسىنداعى وزگەرىستەر ازاماتتاردىڭ مەملەكەتتىك قىزمەتكە ورنالاسۋىن جەڭىلدەتۋگە، اشىقتىقتى قامتاماسىز ەتۋگە، كونكۋرستىق ۇردىستەردى قىسقارتۋعا باعىتتالعان. قازىرگى تاڭدا مەملەكەتتىك قىزمەتكە قابىلداۋدى وڭايلاتۋ ءۇشىن جاڭا مۇمكىندىكتەر جاسالدى.
وتاندىق جوعارى وقۋ ورىندارىن مەملەكەتتىك گرانتپەن جوعارى ۇلگەرىممەن اياقتاعان جاستارعا كونكۋرسسىز كىرۋ مۇمكىندىگى بەرىلدى. بۇگىندە ۇزدىك تۇلەكتەر كونكۋرسسىز اۋداندىق جانە اۋىلدىق جەرلەردەگى مەملەكەتتىك قىزمەتكە قابىلدانۋدا.
ناتيجەسىندە، جاڭاشىلدىققا بايلانىستى ەلىمىزدە وقۋ كورسەتكىشى 3,33 باللدان تومەن ەمەس 752 مامان لاۋازىمدارعا كونكۋرس وتكىزىلمەستەن ورنالاستى.
كونكۋرستان تىس تاعايىندالعان تۇلەكتەردىڭ 25-ءى وبلىستىق، 437-ءى اۋداندىق جانە 270-ءى اۋىلدىق دەڭگەيدەگى لاۋازىمدارعا تاعايىندالعان.مەملەكەتتىك قىزمەت جۇيەسىنە العاش ەنگىزىلگەن ينستيتۋت بىلىكتى جاستاردى مەملەكەتتىك قىزمەتكە تارتۋعا، جاس مامانداردى ءوز اۋىلدارى مەن اۋداندارىنا قايتارۋعا، وڭىرلەردەگى كادر تاپشىلىعىن تومەندەتۋگە، سونداي-اق مەملەكەتتىك قىزمەتكە كىرۋ ءراسىمىن جەڭىلدەتۋگە ىقپال ەتتى.
بۇل جاس مامانداردىڭ وڭىرلەرگە، الىس اۋىلدارعا بارىپ، جەرگىلىكتى جەرلەردەگى قىزمەتشىلەردىڭ ساپالىق قۇرامىنىڭ ءبىلىمدى جاس كادرلارمەن تولىعۋىنا سەبەپشى بولىپ وتىر.
«جەدەلدەتىلگەن تسيفرلاندىرۋ جانە جاساندى ينتەللەكت مۇمكىندىكتەرىن بەلسەندى قولدانۋعا كوشۋ بارىسى – ىرىكتەۋدىڭ تيىمدىلىگىن ارتتىرۋدىڭ جاڭا مۇمكىندىكتەرىن اشا تۇسەدى»، – دەيدى اگەنتتىكتەگى ماماندار.
مەملەكەتتىك قىزمەتكە ىرىكتەۋ جانە قابىلداۋ ءراسىمىن تسيفرلاندىرۋ
ازاماتتار ءۇشىن مەملەكەتتىك قىزمەتتىڭ بارىنشا اشىقتىعىن جانە قولجەتىمدىلىگىن قامتاماسىز ەتۋ ماقساتىندا جاڭا ىرىكتەۋ جۇيەسى ازىرلەندى.
ول ءۇشىن مەملەكەتتىك قىزمەتكە ىرىكتەۋ جانە قابىلداۋ پروتسەسىن، ونىڭ اشىقتىعى مەن وبەكتيۆتىلىگىن تولىق تسيفرلاندىرۋدى قامتاماسىز ەتەتىن «E-Qyzmet» جۇيەسىنىڭ سىرتقى پورتالى ىسكە قوسىلدى.
جاڭا ىرىكتەۋ فورماتى ۇمىتكەرلەرگە كونكۋرسقا ءوزى قالاعان ۋاقىتتا جانە كەز-كەلگەن جەردەن قاتىسۋعا مۇمكىندىك بەردى، «ادامي فاكتوردىڭ» ىقپالىن بولدىرماۋ شارالارى جۇرگىزىلدى (ىرىكتەۋ كەزەڭدەرىنەن ءوتۋ كەزىندە جەكە دەرەكتەردى قۇپيالاندىرۋ ماقساتىندا ۇمىتكەرلەرگە ID-ءنومىر بەرىلەدى جانە تاۋەلسىز پروكتورينگ جۇيەسى قامتاماسىز ەتىلەدى), تەستىلەۋ جۇرگىزىلەتىن نورماتيۆتىك قۇقىقتىق اكتىلەردىڭ سانى ەكى ەسەگە قىسقارتىلدى (9-دان 4-كە دەيىن).
جاڭا جوبا بويىنشا ءبىر ورىنعا ۇمىتكەرلەردىڭ قاتىسۋ سانى 4,9 ادامدى قۇرادى.
بىلىكتىلىك دەڭگەيى – باستى تاقىرىپ
زاڭعا ەنگىزىلگەن وزگەرىستەرگە سايكەس، اگەنتتىككە مەملەكەتتىك ورگانداردىڭ مەملەكەتتىك قىزمەتشىلەرگە قويىلاتىن بىلىكتىلىك تالاپتارىن كەلىسۋ فۋنكتسياسى بەرىلدى.
وسىعان وراي، مەملەكەتتىك قىزمەتتىڭ جەكە جانە كۆازيمەملەكەتتىك سەكتورداعى كاسىبي ماماندارعا بارىنشا اشىق بولۋىنا مۇمكىندىك جاساۋ ماقساتىندا ۇلگىلىك بىلىكتىلىك تالاپتارى بەكىتىلدى.
جاڭادان قابىلدانعان بىلىكتىلىك تالاپتار مەن مەملەكەتتىك لاۋازىمدارداعى جانە فۋنكتسيونالدىق باعىتتار بويىنشا جالپى جۇمىس ءوتىلىن بىرگە ەسەپكە الۋ قاراستىرىلعان.
وسىلايشا، اكىمشىلىك لاۋازىمدارعا الەۋەتى ساي كەلەتىن كانديداتتاردىڭ قاتارى كەڭەيتىلىپ، ەڭبەك نارىعىنىڭ بارلىق سەكتورىنداعى ءتۇرلى جۇمىس تاجىريبەسىن ەسەپكە الۋ مۇمكىندىگى بەرىلدى.
سونىمەن قاتار، ناقتى لاۋازىمنىڭ فۋنكتسيونالدىق باعىتىنا سايكەس ءبىلىم دەڭگەيى بويىنشا جاڭا تالاپتار دا بەلگىلەندى.
سوڭعى ءۇش جىلدا مەملەكەتتىك ورگانداردىڭ 25840 بىلىكتىلىك تالابى قارالىپ، ونىڭ 11149-نا كەلىسىم بەرىلدى.
مەملەكەتتىك قىزمەتشى اتانۋ – ادامنىڭ كاسىبي ءبىلىمدى، جاۋاپكەرشىلىگى مول ءارى بىلىكتى مامان بولۋىن تالاپ ەتەدى. جانە ەڭ باستىسى وزگەگە ۇلگى بولا ءبىلۋى قاجەت. وسى باعىتتاعى يگى ىستەر جالعاسىن تابادى.
پرەزيدەنتتىك جاستار كادر رەزەرۆى – ۇلكەن مۇمكىندىك
جۋىردا عانا پرەزيدەنتتىك جاستار كادر رەزەرۆىنە ءتورتىنشى ىرىكتەۋ اياقتالدى. مىڭداعان قاتىسۋشىلاردىڭ اراسىنان ءوزىن تانىتا بىلگەن 50 ۇزدىك جاس مامان رەزەرۆكە قابىلداندى.
بۇل – جاستار ءۇشىن مەملەكەتتىك قىزمەتتە ءوز الەۋەتىن تولىق كورسەتۋگە، ءبىلىمى مەن بىلىكتىلىك دەڭگەيىنە، كاسىبي داعدىلارىنا سۇيەنە وتىرىپ ىلگەرىلەۋگە بەرىلەتىن زور مۇمكىندىك، ارتىلعان سەنىم.
مەملەكەت باسشىسى «جاستار كادر رەزەرۆى دەگەنىمىز – مەملەكەتتىڭ رەزەرۆى. ماسەلە ۇلكەن باستىق بولۋدا ەمەس، رەزەرۆ وكىلى بولۋدىڭ ءمانى – ەل ءۇشىن ايانباي ەڭبەك ەتۋدە» دەگەن بولاتىن.
پرەزيدەنتتىڭ تىكەلەي باستاماسىمەن قولعا الىنعان بۇل جوبا ەلىمىزدىڭ جاڭا فورماتسياداعى، ءبىلىمدى، جاۋاپتى ءارى وتانشىل جاستارىن مەملەكەتتىك باسقارۋ ىسىنە تارتۋعا باعىتتالعان ەرەكشە ستراتەگيالىق ماڭىزعا يە.
جوبانىڭ نەگىزگى ماقساتى – مەملەكەتتىك باسقارۋ جۇيەسىنە ءبىلىمدى، جاۋاپكەرشىلىكتى جانە جوعارى كاسىبي بىلىكتى جاستاردى تارتۋ.
نيەت بىلدىرگەن 31 مىڭنان استام ۇمىتكەردىڭ ىشىنەن 7 436 ادام ىرىكتەۋگە قاتىسۋعا جىبەرىلدى. التى كەزەڭنەن تۇراتىن ىرىكتەۋ ناتيجەسىندە رەزەرۆكە 50 ۇزدىك جاس مامان قابىلداندى. ءبىر ورىنعا 148 ادامنان كەلىپ، بۇل كورسەتكىش 2023 جىلعى ىرىكتەۋمەن سالىستىرعاندا 16%-عا جوعارى بولدى.
قاتىسۋعا نيەت بىلدىرۋشىلەر سانى ءار ىرىكتەۋ سايىن وسۋدە. 2019-2023 جىلدارى وتكەن ءۇش ىرىكتەۋ اياسىندا رەزەرۆتىڭ پورتالىنا 66 مىڭعا جۋىق ادام تىركەلسە (2019 ج. – 13 مىڭ، 2021 ج. – 22 مىڭ، 2023 ج. – 31 مىڭ), بيىل – بۇل كورسەتكىش 31 مىڭ ادامدى قۇرادى.
بۇل ەلىمىزدىڭ پروگرەسسيۆتى جاستارى تاراپىنان اتالعان باستاماعا دەگەن قىزىعۋشىلىقتىڭ ارتۋىنىڭ تاعى ءبىر دالەلى.
بيىلعى رەزەرۆكە قابىلدانعان رەزەرۆشىلەردىڭ قۇرامدىق ساپاسى كەلەسىدەي.
رەزەرۆشىلەردىڭ ورتاشا جاسى 31-دە، ال ورتاشا ەڭبەك ءوتىلى
9 جىل. رەزەرۆشىلەر اراسىندا ايەلدەردىڭ ۇلەسى 28% (14 ادام), ەرلەر – 72%-دى (36 ادام) قۇرايدى.
رەزەرۆشىلەردىڭ ىشىندە 8 ادامنىڭ جوعارى ءبىلىمى باكالاۆريات دەڭگەيىندە، 38 ماگيستراتۋرانى، ال 4-ەۋى دوكتورانتۋرا باعدارلاماسى بويىنشا وقۋىن تامامداعان. بۇل – جاستاردىڭ سول مۇمكىندىگىن، زور الەۋەتىن كورسەتەدى.
رەزەرۆكە بۇدان بۇرىن قابىلدانعان رەزەرۆشىلەر (400) تۋرالى ايتاتىن بولساق، ولاردىڭ 321-ءى (80%) ءتۇرلى سەكتورلاردا، ونىڭ ىشىندە 38 – ساياسي لاۋازىمداردا، 5 – «ا» كورپۋسىندا،
3 – پارلامەنت ءماجىلىسىنىڭ دەپۋتاتى، 1 – ءماسليحات دەپۋتاتى بولىپ جۇمىستارىن اتقارۋدا.
قر مەملەكەتتىك قىزمەت ىستەرى اگەنتتىگىنىڭ توراعاسى دارحان جازىقبايدىڭ ايتقانىنداي، جاستارىمىزدىڭ بويىنداعى تاسقىنداعان كۇش-جىگەر مەن ءبىلىمدى ەل مۇددەسىنە قىزمەت ەتۋگە باعىتتاۋ، كاسىبي مەملەكەتتىك قىزمەتشىلەردىڭ جاڭا لەگىن قالىپتاستىرۋ – اگەنتتىكتىڭ ستراتەگيالىق مىندەتتەرىنىڭ ءبىرى.
گۇلشات ساپارقىزى
