قازاقستاندىق ساياساتكەر ءامىرجان قوسانوۆ ءوزىنىڭ Facebook پاراقشاسىندا ۇكىمەتكە قاتىستى پىكىر ءبىلدىردى، دەپ حابارلايدى "ادىرنا" ءتىلشىسى.
«ءورت سوندىرۋشىلەر» كومانداسى ورنىندا قالدى" دەپ باستادى ول ءوز جازباسىن. وندا:
"ۇكىمەتتىڭ پرەزيدەنت قاستىسقان كەڭەيتىلگەن وتىرىسىنا قاتىستى بىرەر وي
ءبىزدىڭ ۇكىمەت «ءورت سوندىرۋشىلەر» كومانداسى سياقتى. بۇگىن پاندەميا مەن قۋاڭشىلىق. ەرتەڭ تاعى ءبىر پروبلەما پايدا بولار، سولاردىڭ سوڭىندا دالاقتاپ، حالىقتىڭ اقشاسىن سۋداي شاشىپ، جۇگىرە بەرەدى!
پاندەميانى بىلمەيمىن، بىراق جۇرتتى جالماپ بارا جاتقان سۇمدىق قىمباتشىلىقتى، ەلىمىزدىڭ تۇكپىر-تۇكپىرىندە بوپ جاتقان قۇرعاقشىلىق پەن مال ازىعىنىڭ ازايۋ مۇمكىندىگىن الدىن-الا بولجاۋعا بولاتىن ەدى عوي؟ الدە ءبىزدىڭ مينيسترلەر مونيتورينگ پەن بولجاۋ دەگەندى بىلمەي مە؟ بيلىكتىڭ ستراتەگيالىق زەرتتەۋ، بولجاۋ، كۇنى بۇرىن قامدانۋ ينستيتۋتتارى قايدا؟
وكىنىشكە وراي، جىل وتكەن سايىن پرەزيدەنت تە وسى ءۇردىستىڭ سوڭىندا كەتىپ بارادى. ياعني، قوردالانعان ماسەلەلەردى اتايدى، بىراق ونىڭ ءبارىن شەشۋدى جاعدايدى وسىنداي ماسقاراعا جەتكىزگەن سول ۇكىمەتتەن قايتادان تالاپ ەتەدى. نونسەنس!
بار كىنانى ءبىر مينيسترگە ارتتى دا، ونى جۇمىستان شىعارىپ جىبەردى. ەندى ول مينيستر كەتكەن سوڭ سۋ قايتىپ كەلە مە؟ ءداريا تولا ما؟ مالدىڭ جەمى كوبەيە مە؟ ازىق-تۇلىك باعاسى ارزانداي ما؟ قايدام...
ساياساتتانۋدا «قوعام تەمپەراتۋراسى» دەگەن ۇعىم بار. ءوزىنىڭ بولاشاعىن ويلايتىن كەز كەلگەن بيلىك سونىمەن ساناسىپ، ول تەمپەراتۋرانى سەزەتىنىن اراكىدىك ءبىلدىرىپ ءتۇرۋى ءتيىس. ايتپەسە، ساياسي بانكروت بولادى.
بۇگىنگى ۇكىمەت وتىرىسىنان مەن قوعام تەمپەراتۋراسىن سەزبەدىم.
بىراق ءبىر نارسە اڭعاردىم. ءوزى كوڭىلى تولمايتىن مينيسترلەردى وتستاۆكاعا جىبەرگىسى كەلسە دە، جىبەرە المايتىن، شاراسىز پرەزيدەنتتى كوردىم..." دەپ جازدى قوسانوۆ.
"ادىرنا" ۇلتتىق پورتالى
