شىعىس قازاقستان وبلىسىنداعى زايسان جانە تارباعاتاي اۋداندارىندا ورنالاسقان ۇيدەنە مەن قاندىسۋ سۋ قويمالارى اپاتتى جاعدايدا دەپ تانىلدى، دەپ حابارلايدى "ادىرنا" 7-ارناعا سىلتەپ.
مامانداردىڭ مالىمەتىنشە، گيدروتەحنيكالىق قۇرىلىستاردىڭ توزۋ دەڭگەيى شامامەن 70 پايىزعا جەتكەن.
اقپاراتقا سايكەس، اتالعان نىساندارعا سوڭعى 60 جىلدان استام ۋاقىت بويى كۇردەلى جوندەۋ جۇرگىزىلمەگەن. سونىڭ سالدارىنان سۋ قويمالارى شەكتەۋلى رەجيمدە پايدالانىلىپ، تەك ءىشىنارا عانا سۋمەن تولتىرىلىپ وتىر. بۇل ءوز كەزەگىندە وڭىردەگى سۋارمالى جەرلەر كولەمىنىڭ قىسقارۋىنا اسەر ەتكەن. ماماندار توتەنشە جاعدايلاردىڭ الدىن الۋ ماقساتىندا سۋ قويمالارىنىڭ تەحنيكالىق جاي-كۇيىن تۇراقتى باقىلاپ، ونداعى سۋ كولەمىن قاداعالاپ كەلەدى.
ەڭ كۇردەلى جاعداي ۇيدەنە سۋ قويماسىندا قالىپتاسقان. ونىڭ جوبالىق سىيىمدىلىعى 75 ميلليون تەكشە مەتر بولعانىمەن، قازىرگى تاڭدا قاۋىپسىزدىك تالاپتارىنا بايلانىستى تەك 46 ميلليون تەكشە مەتر سۋ جيناۋعا رۇقسات ەتىلگەن.
زايسان اۋدانى اكىمىنىڭ ورىنباسارى ەرمەك قوراباەۆتىڭ ايتۋىنشا، ۇيدەنە سۋ قويماسىن قايتا جاڭعىرتۋ جوباسى تەحنيكالىق ەسكەرتۋلەرگە بايلانىستى بىرنەشە رەت قايتا پىسىقتالعان. بۇعان دەيىن ازىرلەنگەن جوبالىق-سمەتالىق قۇجاتتاما مەملەكەتتىك ساراپتامادان تەرىس قورىتىندى العاندىقتان، جوبالاۋشى ۇيىممەن جاسالعان كەلىسىمشارت بۇزىلعان. قازىرگى ۋاقىتتا قۇجاتتامانى تۇزەتۋ جۇمىستارىن «قازسۋشار» رەسپۋبليكالىق مەملەكەتتىك كاسىپورنى ءوز كۇشىمەن جۇرگىزىپ جاتىر.
بيلىك وكىلدەرىنىڭ مالىمەتىنشە، ۇيدەنە سۋ قويماسىن قالپىنا كەلتىرۋدىڭ تۇپكىلىكتى جوباسىن بيىلعى قازان ايىنا دەيىن بەكىتۋ جوسپارلانعان. وسىدان كەيىن ونى ىسكە اسىرۋ ءۇشىن بيۋدجەتتەن قارجى ءبولۋ ماسەلەسى قارالادى. ال قاندىسۋ سۋ قويماسى بويىنشا قايتا جاڭعىرتۋدىڭ ەگجەي-تەگجەيلى جوسپارى دايىن. جوندەۋ جۇمىستارىن وسى جىلدىڭ ىشىندە باستاۋ كوزدەلىپ وتىر.
ايتا كەتەيىك، جەرگىلىكتى بيلىك بۇل ەكى سۋ قويماسىن قايتا جاڭارتۋ تۋرالى 2024 جىلى دا مالىمدەگەن. ول كەزدە جوندەۋ جۇمىستارىن ەكى-ءۇش جىل ىشىندە اياقتاۋ جوسپارلانعانىمەن، جوبا ءالى ىسكە قوسىلماعان.
