استانادان شىققان جولاۋشىلار پويىزىندا جۇرەگىنە وتا جاساتقان ەر ادام كوز جۇمدى، دەپ حابارلايدى “ادىرنا” ۇلتتىق پورتالى.
بۇل اقپارات جەلىدە تاراعان.
استانا–قوستاناي باعىتىندا قاتىنايتىن «سارى-ارقا كومپانيا» جشس-نە تيەسىلى پويىزدا جولاۋشىنىڭ قايتىس بولعانى تۋرالى اقپارات راستالدى.
تاسىمالداۋشىنىڭ مالىمەتىنشە، وقيعا 14 ماۋسىم كۇنى كەشكى ۋاقىتتا «نۇرلى جول – ورال» باعىتىنداعى №57 جولاۋشىلار پويىزىندا بولعان. بۋراباي كۋرورتى ستانتسياسىنا جاقىنداعان ساتتە №19 ۆاگوندا وتىرعان جولاۋشىنىڭ دەنساۋلىعى كەنەتتەن ناشارلاعان.
جولسەرىك جاعداي تۋرالى پويىز باستىعىنا حابارلاپ، لوكوموتيۆ ءماشينيسى ارقىلى جەدەل مەديتسينالىق كومەك شاقىرىلعان.
كومپانيانىڭ حابارلاۋىنشا، ەر ادام ساپارعا 54 جاستاعى جۇبايىمەن بىرگە شىققان. ايەلىنىڭ ايتۋىنشا، كۇيەۋى جۇرەگىنە جاسالعان وپەراتسيادان كەيىن كلينيكادان ۇيىنە قايتىپ كەلە جاتقان.
جەدەل جاردەم قىزمەتكەرلەرى بۋراباي كۋرورتى ستانتسياسىندا ساعات 23:49-دا پويىزعا كوتەرىلىپ، ناۋقاسقا العاشقى مەديتسينالىق كومەك كورسەتكەن. الايدا كوپ ۇزاماي ەر ادام ەسىنەن تانىپ قالعان. دارىگەرلەر ساعات 00:30-دا ونىڭ قايتىس بولعانىن تىركەدى. مارقۇم 23 ماۋسىم كۇنى 56 جاسقا تولۋى ءتيىس بولعان.
قازىر ءولىمنىڭ ناقتى سەبەبى جاريالانعان جوق. الەۋمەتتىك جەلىلەردە جۇرەك تالماسى تۋرالى ءتۇرلى بولجامدار ايتىلعانىمەن، تاسىمالداۋشى كومپانيا بۇل اقپاراتتى راستاعان جوق.
وقيعادان كەيىن مارقۇمنىڭ دەنەسى سوت-مەديتسينالىق ساراپتاما جۇرگىزۋ ءۇشىن كوكشەتاۋ ستانتسياسىندا پويىزدان ءتۇسىرىلدى. كومپانيا مالىمەتىنشە، وقيعاعا بايلانىستى ءتيىستى اكت تولتىرىلىپ، جاۋاپتى قىزمەتكەرلەردەن تۇسىنىكتەمەلەر الىنعان.
مەديتسينالىق جانە تەرگەۋ شارالارىنا بايلانىستى پويىز كەستەدەن 43 مينۋتقا كەشىگىپ قوزعالعان. ءولىمنىڭ ناقتى سەبەبى ساراپتاما قورىتىندىسى شىققاننان كەيىن بەلگىلى بولادى.
