ەكى ەل پرەزيدەنتتەرى بىرلەسكەن بريفينگ وتكىزىپ، ستراتەگيالىق سەرىكتەستىكتى نىعايتۋ تۋرالى مالىمدەدى، دەپ حابارلايدى “ادىرنا” ۇلتتىق پورتالى.
قاسىم-جومارت توقاەۆ وزبەك حالقىنا جانە پرەزيدەنت ميرزيوەۆكە قازاق دەلەگاتسياسىنا كورسەتىلگەن قوناقجايلىق پەن جىلى قابىلداۋ ءۇشىن العىس ءبىلدىردى.
مەملەكەت باسشىسى كەزدەسۋدە جاسالعان ۋاعدالاستىقتاردىڭ ەكى ەلدىڭ ۇلتتىق مۇددەلەرىنە تولىق ساي كەلەتىنىن اتاپ ءوتتى.
پرەزيدەنتتىڭ ايتۋىنشا، قازاقستان مەن وزبەكستان اراسىنداعى قاتىناستار – مىزعىماس دوستىقتىڭ، تاتۋ كورشىلىكتىڭ، ستراتەگيالىق سەرىكتەستىكتىڭ جانە وداقتاستىقتىڭ ايقىن كورىنىسى.
“قازاقستان پرەزيدەنتى رەتىندە وزبەكستانمەن كوپجوسپارلى ىنتىماقتاستىقتى دامىتۋعا باسىمدىق بەرۋ – مەنىڭ مىندەتىم. كەيبىر ساراپشىسىماقتار ايتىپ جۇرگەندەي، قازاقستان مەن وزبەكستان – باقتالاس نەمەسە باسەكەلەس ەمەس. كەرىسىنشە، وركەندەۋ جولىندا تىزە قوسىپ، قاتار كەلە جاتقان ستراتەگيالىق سەرىكتەس، سەنىمدى وداقتاس. حالىقتارىمىز ءبىر-ءبىرىن شىنايى قۇرمەتتەيتىن جاقىن باۋىرلار”، – دەدى قاسىم-جومارت توقاەۆ.
بريفينگ بارىسىندا شاۆكات ميرزيوەۆ قازاقستان پرەزيدەنتىنە وزبەكستاننىڭ ەڭ جوعارى مەملەكەتتىك ناگراداسىن تابىستادى.
