فۋتبولدان قازاقستان ۇلتتىق قۇراماسى 2022 جىلعى الەم چەمپيوناتىنىڭ ىرىكتەۋ تۋرنيرىندەگى العاشقى ماتچىندا فرانتسياعا ەسە جىبەردى، دەپ حابارلايدى "ادىرنا" ءتىلشىسى.
فرانتسيا باپكەرى ديدە دەشام العاشقى مينۋتتان باستاپ كەلەسى ويىنشىلاردى ويىنعا قوسقان ەدى: لوريس، دين، لانگلەت، زۋما، ديۋبۋا، ندومبەلە، پوگبا، مارسيال، گريزمانن، لۋمار، دەمبەلە.
ال قازاقستان قۇراماسىن: موكين، بىستروۆ، ەرلانوۆ، مالىي، اليپ، ۆاليۋللين، مۋجيكوۆ، تاعىبەرگەن، ۆاسيلەۆ، نۋرگاليەۆ، فەدين الىپ شىقتى. كوماندا كاپيتانى قوستانايلىق «توبىل» كلۋبىنىڭ جارتىلاي قورعاۋشىسى - ازات نۇرعاليەۆ بولدى.
نۇر-سۇلتانداعى «استانا ارەنا» ستاديونىندا وتكەن كەزدەسۋ 2: 0 ەسەبىمەن قوناقتاردىڭ پايداسىنا ءتۇستى. 19-مينۋتتا العاشقى گولدى ايگىلى «بارسەلونانىڭ» شابۋىلشىسى ۋسمان دەمبەلە سوقتى. وعان انتوني مارتيال گولدىق پاس شىعارعان ەدى. ال 44-مينۋتتا سەرگەي مالىي ءوز قاقپاسىنا گول سوعىپ، اۆتوگول جاسادى.
ەكىنشى تايمدا كيليان مباپپە الاڭعا شىقتى. الەمنىڭ ەڭ قىمبات فۋتبولشىسى ويىنعا قوسىلا سالىسىمەن-اق شەبەرلىگىن تانىتار ەدى بىراق، كوپ مۇمكىندىكتى قالت جىبەرىپ الدى. ءتىپتى 75-مينۋتتا مباپپە پەنالتي الدى، الايدا ءبىزدىڭ قاقپاشى الەكساندر موكين ونىڭ سوققىسىن قايتارا ءبىلدى.
ىرىكتەۋدەگى ءبىرىنشى جەڭىسىنەن فرانتسيا ءتورت ۇپايعا يە بولدى. توپتا سوڭعى ورىندا تۇرعان قازاقستاننىڭ نولدىك ۇپايى بار. تالعات بايسۋفينوۆتىڭ كومانداسى كەلەسى ويىندى 31 ناۋرىزدا، تۇندە ۋكرايناعا قارسى وتكىزەدى.
"ادىرنا" ۇلتتىق پورتالى
