ۇلت رۋحانياتىنىڭ تاعى ءبىر جارىق جۇلدىزى كۇلاش احمەتوۆا قايتىس بولدى. مادەنيەت جانە اقپارات ءمينيسترى ايدا بالاەۆا اقىننىڭ وتباسى مەن تۋعان-تۋىستارىنا، بارشا قازاققا قايعىرا كوڭىل ايتتى، دەپ حابارلايدى "ادىرنا" ۇلتتىق پورتالى.
بۇل تۋرالى مينيستر جەلىدەگى پاراقشاسىندا جازدى.
مينيستر اتاپ وتكەندەي، كۇلاش دىلداقىزى ۇلتتىق پوەزياعا وزگەشە لەپ اكەلگەن قالامگەر ەدى. ونىڭ ولەڭدەرى شۋاقتى، قالامى قۋاتتى، ادەبيەتىمىزدىڭ شوقتىعى بيىك شىعارمالارى بولىپ، وقىرمان جۇرەگىنە جەتىپ، تەرەڭ سەزىمگە جەتەلەيتىن تۋىندىلار قالدىردى.
"اقىننىڭ وتباسى مەن تۋعان-تۋىستارىنا، بارشا اعايىنعا قايعىرا كوڭىل ايتامىن!
كۇلاش دىلداقىزى ۇلتتىق پوەزياعا وزگەشە لەپ اكەلگەن قالامى قۋاتتى، ولەڭى شۋاقتى، ادەبيەتىمىزدىڭ شوقتىعى بيىك قالامگەرى ەدى.
ابىز ءابىش كەكىلبايۇلى ايتقانداي، «جىرى كۇننىڭ نۇرىنداي، گۇلدىڭ ارىندەي، ءسۇتتىڭ وڭىندەي، بوبەكتىڭ يىسىندەي» اقىن بولاتىن.
ونىڭ قالامىنان تۋعان ەل مەن جەرگە دەگەن سۇيىسپەنشىلىككە تولى تۋىندىلار وقىرمان جۇرەگىنە جەتىپ، تەرەڭ سەزىمگە جەتەلەدى. اقىن ولەڭدەرىنەن بيىك بولمىسى، ءور رۋحى، ادام جانىن ءدال تانىپ، ىشكى الەمىن كوركەم دە قۋاتتى تىلمەن اشاتىن ەرەكشە شەبەرلىگى ايقىن اڭعارىلادى.
قالامگەر عيبراتتى عۇمىرىندا ءمولدىر جىرىمەن، كوركەم جۇزىمەن قازاق پوەزياسىنىڭ اق گۇلى اتانىپ، حالقىنىڭ ىستىق ىقىلاسىنا بولەندى.
ول نازىك تە سىرشىل، ومىرشەڭ ولەڭدەرىندە بارشا قازاق قىزدارىنىڭ جان سەزىمىن، جۇرەك ءۇنىن كوركەم كەستەلەدى.
كۇلاش اپامىزدىڭ جارقىن بەينەسى مەن ونەگەلى ءومىر جولى جۇرتشىلىقتىڭ جادىندا ماڭگى ساقتالادى دەپ سەنەمىن.
اللا تاعالا اپامىزدىڭ جاتقان جەرىن جارىق، توپىراعىن تورقا ەتسىن!
باقۇل بولىڭىز، اپا", - دەپ جازىلعان كوڭىل ايتۋ جازباسىندا.
اقىننىڭ ءار جىلدارى «اق گۇلىم مەنىڭ»، «سەن مەنىڭ باقىتىمسىڭ»، «بۇلاقتاعى جۇلدىزدار»، «مەيىرىم»، «جاپىراق – جازدىڭ جۇرەگى»،"قۇت", "باق" اتتى ولەڭدەر جيناعى جارىق كورىپ، وقىرمان تاراپىنان لايىقتى باعاسىن الدى. ونىڭ شىعارمالارى الەمنىڭ كوپتەگەن تىلدەرىنە اۋدارىلعان.
