قر اقپارات جانە قوعامدىق دامۋ ءمينيسترى ايدا بالاەۆا «ەگەمەن قازاقستان» مەن «كازاحستانسكايا پراۆدا» گازەتتەرى بىرىكتىرىلىپ، دەربەس «ەگەمەن قازاقستان» اكتسيونەرلىك قوعام رەتىندە قۇرىلعانى تۋرالى جاڭالىقتى ءبولىستى. بۇل تۋرالى مينيستر Facebook جەلىسىندە جازدى، دەپ حابارلايدى «ادىرنا» ۇلتتىق پورتالى.
«بۇگىن وتاندىق اقپارات سالاسىندا تاعى ءبىر ۇلكەن جاڭالىق ورىن الىپ وتىر. ەلىمىزدىڭ ەڭ باستى باسىلىمدارى – «ەگەمەن قازاقستان» مەن «كازاحستانسكايا پراۆدا» گازەتتەرى بىرىكتىرىلىپ، دەربەس «ەگەمەن قازاقستان» اكتسيونەرلىك قوعام رەتىندە قۇرىلدى. ونىڭ باسقارما توراعاسى لاۋازىمىنا – ەلىمىزگە بەلگىلى زيالى ازامات دارحان قۋاندىقۇلى قىدىرالىنى تاعايىندادىم»، – دەپ جازدى بالاەۆا.
مينيستر قوس گازەتتىڭ بىرىكتىرىلۋىن وتاندىق مەديانىڭ دامۋ باعىتىنداعى كەزەكتى ماڭىزدى قادام دەپ سانايتىندىعىن دا ايتىپ ءوتتى.
«وتكەن عاسىردىڭ باسىندا ءبىر-بىرىنە قاناتتاسا، بىرىنەن سوڭ ءبىر جارىق كورگەن ءجۇز جىلدىق جىلناماسى بار قوس گازەت – حالىققا اقپار جەتكىزۋدە وزدەرىنە جۇكتەلگەن مىندەتتى ابىرويمەن اتقارا ءبىلدى. دەسە دە، بۇگىنگىدەي اقپاراتتىق تەحنولوگيا قارىشتاپ دامىعان ينتەرنەت داۋىرىندە ءداستۇرلى ءباسپاسوزدى زامان كوشىنە ساي جاڭعىرتىپ وتىرۋ – ۋاقىت تالابى. سوندىقتان ۇكىمەتتىڭ قاۋلىسىمەن قابىلدانعان بۇل وزگەرىس وتاندىق مەديانىڭ دامۋ باعىتىنداعى كەزەكتى ماڭىزدى قادام دەپ سانايمىن»، – دەدى ول.
سونىمەن قاتار مينيستر ەكى گازەتتى بىرىكتىرۋ – ونىڭ بىرەۋى ءوز جۇمىسىن توقتاتادى دەگەندى بىلدىرمەيتىندىگىن تىلگە تيەك ەتتى. «كازاحستانكايا پراۆدا» گازەتى ءوزىنىڭ قالىپتاسقان برەندتىك اتاۋىن ساقتايتىن بولادى. سونداي-اق باسىلىمدى مەملەكەتتىك اقپارات تاپسىرىسى اياسىندا قارجىلىق قولداۋ جالعاسا بەرمەك. ەڭ باستىسى بۇل جۋرناليستەردىڭ شىعارماشىلىعىنا ەشقانداي كەدەرگىسىن كەلتىرمەيدى ەكەن.
«قايتا ءبىر ورتالىققا بىرىككەن قوس باسىلىمنىڭ ەلدى اقپاراتتىق-يدەولوگيالىق تۇرعىدان قامتۋ اياسى بىرىزدەنىپ، وقىرمان الدىنداعى تارتىمدىلىعى مەن ساپالى كونتەنت ۇسىنۋ الەۋەتى ودان ارى ارتادى دەپ ويلايمىن. بىرىكتىرۋ بارىسىندا تەك اكىمشىلىك-شارۋاشىلىق رەسۋرستار قىسقارادى. ءبىرىنشى كەزەكتە ارينە قارجى ۇنەمدەلەدى. بۇل ءوز كەزەگىندە، شىعارماشىلىق ۇجىمنىڭ تابىسىن ارتتىرىپ، ساپالىق قۇرامىن كۇشەيتۋگە تىڭ مۇمكىندىك بولماق. ەڭ باستىسى، رەسپۋبليكالىق باس باسىلىمداردىڭ مازمۇن-كونتەنتى جاڭا ساپاعا كوتەرىلىپ، باسەكەگە قابىلەتى كۇشەيە تۇسەدى دەپ سانايمىن»، - دەپ جازدى مينيستر.
"ادىرنا" ۇلتتىق پورتالى
