مادەنيەت جانە اقپارات ءمينيسترى ايدا بالاەۆا "قازاقفيلم" جانە وتاندىق كينويندۋستريا باعىتىندا تۋىنداعان ماسەلەلەرگە قاتىستى ۆيدەوۇندەۋ جاريالادى، دەپ حابارلايدى "ادىرنا" پورتالى.
ايدا عالىمقىزى ءوز سوزىندە "قازاقفيلمنىڭ" بولاشاعى ماڭىزدى ءرول اتقاراتىنىن اتاي كەتىپ، مينسترلىك بىرقاتار شارالاردى قولعا العانىن ايتتى:
"قۇرمەتتى دوستار، بۇگىن مەن اتى اڭىزعا اينالعان شاكەن ايمانوۆ اتىنداعى «قازاقفيلم» كينوستۋدياسىنىڭ اينالاسىندا تۋىنداعان كەيبىر ماسەلەلەردىڭ باسىن اشىپ، توقتالىپ وتكەندى ءجون كوردىم. بۇل ەڭ الدىمەن، قارجىلىق، ەكونوميكالىق، اكىمشىلىك، ينفراقۇرىلىمدىق سيپاتتاعى جىلدار بويى جينالعان كۇردەلى پروبلەمالار. وعان بىردەن ءبىر سەبەپ وسى ۋاقىتقا دەيىن كينوستۋديانىڭ ءوزىن ءوزى قامتاماسىز ەتۋگە، تابىس تابۋعا زاڭدىق تۇرعىدا مۇمكىندىگىنىڭ بولماۋى. وزدەرىڭىزگە ءمالىم، 2019 جىلدان بەرى ەلىمىزدەگى كينو ءتۇسىرۋ قۇزىرەتى زاڭدى تۇردە ۇلتتىق كينونى قولداۋ ورتالىعىنا بەرىلگەن. ءوز كەزەگىندە «قازاقفيلم» وسى ورتالىق قارجىلاندىراتىن جوبالارعا كوپپەن بىرگە، جالپى ەرەجەگە سايكەس قاتىسىپ كەلدى. ناتيجەسىندە، بايقاۋ تالاپتارىنا ساي بولىنگەن قاراجات كينوستۋديانىڭ تەك شىعارماشىلىق شىعىندارىنا عانا جۇمسالىپ، ونىڭ باسقا شارۋاشىلىق ماسەلەلەرى نازاردان تىس قالىپ وتىردى. ءسوز جوق، «قازاقفيلمنىڭ» بولاشاعى - بۇل بۇكىل وتاندىق كينويندۋستريانىڭ بولاشاعى. سوندىقتان دا وسى ماسەلەنى شەشۋ ءۇشىن مادەنيەت جانە اقپارات مينيسترلىگى قازىرگى تاڭدا ناقتى شارالار قابىلداۋدا", - دەدى ايدا بالاەۆا.
بىرىنشىدەن، پيتچينگتارداعى كوميسسيا جۇمىسىنىڭ تيىمدىلىگى مەن اشىقتىعى، باسەكەگە قابىلەتتىلىگىن ارتتىرۋ كوزدەلەدى.
"ەگەر بۇرىندارى جوبالار مەملەكەتتىك تاپسىرىس ارقىلى تۇسىرىلگەن بولسا، قازىر ءتۇرلى تاقىرىپتاعى ستسەناريلەر بايقاۋىن جاريالادىق. ەگەر بۇرىن بارلىق جوبالاردى ەكسپەرتتىك ءبىر توپ سارالايتىن بولسا، ەندى ءاربىر كينو، دەرەكتى فيلم، انيماتسيا بويىنشا قاتىسۋشىلاردىڭ وتىنىشتەرىن جەكە ساراپشىلار توبى باعالايدى. ەكىنشى قادام، كينو تۋرالى زاڭعا تۇزەتۋلەر ەنگىزۋ. اتاپ ايتقاندا، «قازاقفيلمگە» فيلمدەر ءتۇسىرۋ، فەستيۆالدار ۇيىمداستىرۋ، دۋبلياج جاساۋ قۇقىعىن جانە باسقا دا جاڭا مۇمكىندىكتەردى زاڭدى تۇردە بەكىتۋ كەرەك", - دەدى ايدا بالاەۆا.
ۇشىنشىدەن، ينفراقۇرىلىم ماسەلەلەرىن شەشۋدى ەرتەڭگە قالدىرماي بۇگىن باستاۋ كەرەك.
"قازىر ەكى ءتۇسىرىلىم پاۆيلونىن جاڭارتۋ بويىنشا كونكۋرستىق راسىمدەر جاسالدى. ەندىگى جەردە كينوستۋديا ينفراقۇرىلىمى مەن جابدىقتارىن جوندەۋگە قاراجات سالاتىن ينۆەستور تارتۋ. ونىڭ مىندەتىنە نىساندى تولىعىمەن رەتكە كەلتىرىپ، كوركەيتۋ سىندى كەشەندى جۇمىستار كىرەدى. ال ەندى قوعامدىق رەزونانستى تۋدىرعان جەر تەلىمىنە كەلسەك، جەر تەلىمى مەملەكەت مەنشىگىندە. ەشكىمگە، ەشقانداي جاعدايدا، ەشقانداي ماقساتتا بەرىلمەيدى. سوندىقتان بۇل جونىندە جالعان اقپارات تاراتۋ، قانداي دا ءبىر ارتىق ءسوز ايتۋ ورىنسىز. ارينە، «قازاقفيلمگە» قاتىستى قوعامنىڭ جاناشىرلىعى دۇرىس ءارى ورىندى. ويتكەنى، كينو ۇلتتىق يدەولوگيامىز بەن رۋحاني كەلبەتىمىزدى الەمگە ايگىلەۋدىڭ اينىماس قۇرالى. سول سەبەپتى مادەنيەت جانە اقپارات مينيسترلىگى ءۇشىن «قازاقفيلمنىڭ» ەلىمىزدە عانا ەمەس، حالىقارالىق كينويندۋسترياداعى داڭقىن قايتارۋ قاستەرلى مىندەت جانە جاۋاپتى ءىس", - دەپ تۇيىندەدى مينيستر.
ايتا كەتەيىك، بۇعان دەيىن بۇقارالىق اقپارات قۇرالدارىندا شاكەن ايمانوۆ اتىنداعى«قازاقفيلم» كينوستۋدياسىنىڭ اۋماعىندا قىتايلىق كولىكتەر قاپتاعانى ايتىلىپ، داۋ شىققان بولاتىن. اكتەر قۋاندىق دۇيسەنباەۆ وسىعان نارازىلىق ءبىلدىرىپ، ماسەلەنى كوتەردى.
پوسموترەت ەتۋ پۋبليكاتسيۋ ۆ Instagram
