الماتىدا الەۋمەتتىك جەلىدە جارىلىس جاسايمىن دەپ قورقىتقان ەر ادام ۇستالدى. بۇل تۋرالى Polisia.kz جازدى، دەپ حابارلايدى "ادىرنا".
الەۋمەتتىك جەلىدەگى ءدىني بىرلەستىكتەردىڭ قىزمەتىنە قاتىستى جاريالانىم استىنا بەلگىسىز قولدانۋشى جارىلىس جاساۋ تۋرالى قورقىتۋ سيپاتىنداعى پىكىر قالدىرعان. اتالعان دەرەك بويىنشا "102" پۋلتىنە حابارلاما ءتۇسىپ، الماتى قالاسى پوليتسيا دەپارتامەنتىنىڭ ەكسترەميزمگە قارسى كۇرەس باسقارماسى جەدەل شارا قولداندى.
"جەدەل-ىزدەستىرۋ ءىس-شارالارىنىڭ ناتيجەسىندە پىكىر اۆتورىنىڭ جەكە باسى انىقتالدى. ول – 1 جاستاعى الماتى قالاسىنىڭ تۇرعىنى بولىپ شىقتى. ەر ادام ۇستالىپ، پوليتسيا بولىمشەسىنە جەتكىزىلدى. ينتەرنەتكە جازىلعان بولسا دا، كەز كەلگەن قورقىتۋ پوليتسيا تاراپىنان قوعامدىق قاۋىپسىزدىككە ناقتى قاتەر رەتىندە قارالادى. مۇنداي "ازىلدەردىڭ" سالدارى اۋىر بولۋى مۇمكىن. ءاربىر حابارلاما مۇقيات تەكسەرىلىپ، كىنالىلەر زاڭ اياسىندا جاۋاپقا تارتىلادى", – دەدى الماتى قالاسى پد ەكسترەميزمگە قارسى كۇرەس باسقارماسىنىڭ باستىعى اسحات داۋلەتياروۆ.
الماتى پوليتسياسى ازاماتتاردى الەۋمەتتىك جەلىلەردى قولدانۋدا جاۋاپكەرشىلىك تانىتۋعا، قورقىتۋ نەمەسە قۇقىققا قايشى مازمۇنداعى اقپاراتتاردى جاريالاماۋعا جانە تاراتپاۋعا شاقىرادى.
