مادەنيەت جانە اقپارات ءمينيسترى ايدا بالاەۆا الەۋمەتتىك جەلىدە اقپارات تاراتاتىندارعا ۇندەۋ جاسادى. بۇل تۋرالى ول پاراقشاسىندا جازدى، دەپ حابارلايدى “ادىرنا” ۇلتتىق پورتالى.
مينيستر ونلاين-پلاتفورمالاردا زاڭعا قايشى، شىندىققا جاناسپايتىن اقپارات ءجيى تارالاتىنىنا نارازى. ول وسىعان بايلانىستى جەلىلىك رەسۋرستاردىڭ اكىمشىلەرىن جاڭالىقتار اعىنىن مۇقيات قاداعالاۋعا، راستالماعان اقپاراتتىڭ تارالۋىنا جول بەرمەۋگە شاقىردى. مينيستر الەۋمەتتىك جەلى قولدانۋشىلارىنا دا جازبالار مەن پىكىرلەرىن زاڭ تالابىنا ساي جازۋدى ۇسىندى.
«ستاتيستيكاعا سۇيەنسەك، 2023 جىلدان 2024 جىلعا دەيىنگى ارالىقتا قازاقستان ينتەرنەت سەگمەنتىندە انىقتالعان زاڭعا قايشى كونتەنت كولەمى ەكى ەسە ءوسىپ، 116 354 ماتەريالعا جەتتى. ەڭ كوپ تارالعان زاڭبۇزۋشىلىقتار قاتارىندا – تەرروريزمدى، ءدىني ەكسترەميزمدى جانە ەسىرتكى قۇرالدارىن ناسيحاتتاۋ، ونلاين-كازينو مەن قارجى پيراميدالارىن جارنامالاۋ بار. وتكەن جىلى ونلاين-پلاتفورمالاردا 78 539 زاڭعا قايشى ماتەريال انىقتالىپ، ونىڭ 24,3%-ى جويىلدى»، - دەدى ايدا بالاەۆا.
ەسكە سالايىق، بۇعان دەيىن Qaznews2024 پابليگىنىڭ اكىمشىسى تەمىرلان ەڭسەبەك 2 اي مەرزىمگە قاماۋعا الىنعانىن حابارلاعان ەدىك. وعان تاعىلعان 174-باپ تەك ارازدىق قوزدىرۋ عانا ەمەس، سونداي-اق وسى ساناتقا جاتاتىن ماتەريالداردى تاراتۋ بويىنشا دا جاۋاپكەرشىلىك جۇكتەيدى.
