Kaspi Bank-ءتىڭ استاناداعى بولىمشەسىنىڭ ءبىرىن باسىپ العان قارۋلى ەر ادام ۇستالدى. بۇل تۋرالى ىىم ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
مالىمەت بويىنشا، تۇتقىنعا الىنعان بانك قىزمەتكەرلەرىنىڭ بارلىعى بوساتىلدى.
Kaspi bank عيماراتىندا كۇشتىك وپەراتسيا ءساتتى جۇرگىزىلدى. بارلىق كەپىلگە الىنعاندار بوساتىلدى! كەپىلگە الىنعاندار پوليتسيا شتۋرمىنان كەيىن بوساتىلدى. بارلىق قىزمەتكەرلەر شىعارىلدى. باسىپ الۋشى قاۋىپتى ەمەس! بارلىعىن دارىگەرلەر تەكسەردى. كەپىلگە الىنعاندار دا، باسقىنشى دا زارداپ شەككەن جوق. باسقىنشىمەن كەلىسسوزدى ىشكى ىستەر ءمينيسترى م. احمەتجانوۆ جۇرگىزدى. ول سونداي-اق كۇشتىك وپەراتسيانى باسقاردى، – دەلىنگەن ءىىم ءباسپاسوز حابارلاماسىندا.«Kaspi Bank» اق ءباسپاسوز قىزمەتىنىڭ مالىمەتىنشە، قازىر بولىمشەدە تەك بانك قىزمەتكەرلەرى عانا، كليەنتتەر جوق.
ءتارتىپ ساقشىلارى قىزمەتكەرلەردى قورقىتقان ەر اداممەن كەلىسسوز جۇرگىزىپ جاتىر. پوليتسيا مەن بانكتىڭ بارلىق كۇشى ەشكىمنىڭ زارداپ شەكپەۋىن قامتاماسىز ەتۋگە باعىتتالعان. كەز كەلگەن اقپاراتتى تاراتۋعا جاۋاپكەرشىلىكپەن قاراۋعا جانە قۇقىق قورعاۋ ورگاندارىنىڭ جۇمىسىنا كەدەرگى كەلتىرمەۋدى سۇرايمىز. كەز كەلگەن قاتە اقپارات جاعدايدىڭ شيەلەنىسۋىنە اكەلۋى مۇمكىن، – دەلىنگەن حابارلامادا.بەلگىلى بولعانداي،باسقىنشى جامبىل وبلىسىندا دۇنيەگە كەلگەن 1993 جىلعى ءاليحان مۇرادوۆ اتتى ەر ادام ول استانانىڭ قاق ورتاسىندا ورنالاسقان كاسپي بانكىنىڭ فيليالىنا باسىپ كىرگەن. 7 ادامدى قاماۋعا الىپ، بانكتەگى بارلىق قاراجاتتى كەدەي-كەپشىك پەن مۇگەدەكتەرگە تاراتىپ بەرۋدى تالاپ ەتكەن. اتالعان فاكتى بويىنشا قىلمىستىق كودەكستىڭ 261-بابى 2-بولىگىنىڭ 4 جانە 8-تارماقتارى بويىنشا (كەپىلگە الۋ) سوتقا دەيىنگى تەرگەۋ باستالدى. كەيبىر مالىمەتتەرگە قاراعاندا، 2013 جىلدان بەرى باسقىنشى ناركولوگيالىق ديسپانسەردە ەسەپتە تۇرادى. قىلمىستىق ىستەر بويىنشا ەكى رەت سوتتالعان. ەسكە سالايىق، بۇعان دەيىن استانادا قارۋلانعان ەر ادام بانكتەردىڭ بىرىندە كەلۋشىلەردى كەپىلدىككە العانىن حابارلادىق. ول 7 ادامدى كەپىلگە الىپ، تالابى ورىندالماسا، ءۇش ساعاتتان كەيىن ءبىرىنشىسىن ولتىرەتىنىن ەسكەرتكەن.
ۇقساس جاڭالىقتار
