ەلىمىزدە تۇرعىن ءۇي تولەمدەرىن الۋشىلار ءۇشىن بىردەن ەكى تۇرعىن ءۇي باعدارلاماسى ىسكە قوسىلادى. بۇل تۋرالى «وتباسى بانكتىڭ» ءباسپاسوز قىزمەتى جازدى، دەپ حابارلايدى «ادىرنا» ءتىلشىسى.
«وتباسى بانك 2025 جىلدىڭ 17 قاراشاسىنان باستاپ تۇرعىن ءۇي تولەمدەرىن الۋشىلاردان نەسيە وتىنىمدەرىن قابىلداۋدى باستايدى. بۇلار – قورعانىس مينيسترلىگى، ۇقك، ءىىم، تجم، مەملەكەتتىك كۇزەت قىزمەتى، اسكەري پروكۋراتۋرا جانە باسقا دا مەكەمەلەردىڭ قىزمەتكەرلەرى مەن اسكەري قىزمەتشىلەر»،–دەلىنگەن حابارلامادا.
بانك مالىمەتىنشە، بولىمشەگە الدىن الا بارۋدىڭ قاجەتى جوق. نەسيە بەرۋ ۇدەرىسى ۆەدومستۆولار ۇسىناتىن دايىن تىزىمدەر بويىنشا جۇرگىزىلەدى. تىزىمدەر جاسالعاننان كەيىن عانا قىزمەتكەرلەر بانككە بارىپ، ءوز اتى-ءجونىنىڭ بازاعا ەنگەنىن تەكسەرىپ، ءوتىنىم بەرە الادى.
جاڭا تۇرعىن ءۇي العىسى كەلەتىندەر «ناۋرىز اسكەري» باعدارلاماسىنا قاتىسا الادى.
«بۇل باعدارلاما بويىنشا نەسيە مولشەرلەمەسى – 9%*. ءتىپتى باستاپقى جارناسىز دا قاتىسۋعا بولادى. ەگەر باستاپقى جارنا 0%-دان 20%-عا دەيىن بولسا، وندا نەسيە سوماسىنىڭ ەڭ جوعارى مولشەرى الماتى مەن استانا قالالارى ءۇشىن – 36 ميلليون تەڭگە، ال باسقا وڭىرلەر ءۇشىن – 30 ميلليون تەڭگە بولادى.
ەگەر باستاپقى جارنا 20%-دان 50%-عا دەيىن بولسا، بانك ەڭ جوعارى نەسيە سوماسىن 80 ميلليون تەڭگەگە دەيىن ۇلعايتۋدى جوسپارلاپ وتىر»،- دەپ جازدى بانك.
ەكىنشىلىك نارىقتان ءۇي العىسى كەلەتىندەر ءۇشىن «اسكەري باسپانا» باعدارلاماسى ۇسىنىلادى:
• نەسيە مولشەرلەمەسى – 18%;
• باستاپقى جارنا – 20–50%;
• نەسيە سوماسى – 50 ملن تگ-گە دەيىن;
• تۇرعىن ءۇيدى قاتىسۋشى ءوزى تاڭدايدى.
وتباسى بانكتىڭ مالىمەتىنشە، تۇرعىن ءۇي تولەمىن الاتىن 44 103 ازامات بانك ارقىلى باسپانالى بولعان. بۇل ماقساتقا 870,5 ملرد تەڭگە جۇمسالدى. ونىڭ ىشىندە اسكەري باعدارلامالار بويىنشا 18 مىڭ نەسيە بەرىلىپ، جالپى سوماسى 428 ملرد تەڭگەنى قۇرادى.
