ەلىمىزدەگى تۇرعىن ءۇي باعاسى 10 پروتسەنتكە دەيىن ارزانداۋى مۇمكىن. بۇل تۋرالى جىلجىمايتىن مۇلىك نارىعى بويىنشا ساراپشى انەل مۇقاتوۆا حابارلادى. بىراق قازىردىڭ وزىندە باعانى قولجەتىمدى دەۋ قيىن. قازان ايىندا جاڭا ۇيلەردىڭ ورتاشا قۇنى شارشى مەترى ءۇشىن 305 مىڭ تەڭگەدەن استى. وتكەن ايدا ەلوردادا جاسالعان 5000-عا تارتا كەلىسىمنىڭ جارتىسىنان كوبى يپوتەكالىق باعدارلامالار ارقىلى راسىمدەلگەن.
اتام قازاق ء"ۇيى جوقتىڭ كۇيى جوق" دەگەن ءسوزدى بۇگىنگى زاماندى بولجاپ ايتقانداي. پاندەميامەن قاباتتاسا كەلگەن ەكونوميكالىق قيىندىقتار قوعامدى تەڭسەلتىپ تۇر. وسىعان وراي مەملەكەت باسشىسى ءبىراز شارالاردى قابىلدادى. تۇرعىن ءۇي ماسەلەسىمەن باسى اۋرعان جۇرتتىڭ نازارى ارينە، جوعارى جاقتا.
ءبىزدىڭ ەلدە جىلجىمايتىن مۇلىك اگەنتتىگى ارقىلى كەلىسسوزدەر نەگىزىنەن ەكىنشى نارىقتاعى ۇيلەرگە بايلانىستى جاسالدى. كوپشىلىك مۇنداي ۇيلەردى 11 پروتسەنتكە قىمبات الۋعا ءماجبۇر بولدى. سول سەبەپتى بولار كەلىسىمدەر الدىڭعى ايعا قاراعاندا 9 پروتسەنتكە از راسىمدەلگەن. ايتا كەتەيىن، كەلەسى جىلى باس قالادا 10 مىڭ الەۋمەتتىك پاتەر پايدالانۋعا بەرىلەدى.
جىلجىمايتىن مۇلىك نارىعىنىڭ ساراپشىسى انەل مۇقاتوۆانىڭ ايتۋىنشا: "ەلوردادا وتكەن ايدا جىلجىمايتىن مۇلىك بويىنشا 4780 ساتۋ-ساتىپ الۋ كەلىسىمى جاسالدى. ۇلتتىق ستاتيستيكا بيۋروسىنىڭ دەرەگىنشە، بۇل الدىڭعى ايمەن سالىستىرعاندا 9,6 پروتسەنتكە از" دەيدى.
ەلىمىزدە ەڭ باستى پروبلەمالاردىڭ ءبىرى - باسپانا ماسەلەسى ەكەنى بەلگىلى.
سونىمەن قاتار، "دەسە دە، اگەنتتىك كورسەتەتەتىن قىزمەتتەر ۇلەسى ارتقان. ونىڭ 60 پروتسەنتى يپوتەكالىق كەلىسىمدەر بولدى. يپوتەكالىق نەسيەلەۋ نەگىزىنەن ەكىنشى نارىقتاعى ۇيلەرگە تيەسىلى", دەيدى انەل مۇقاتوۆا.
تۇرعىن ءۇي باعاسى ارزانداسا، اي سايىن پاتەرگە تولەپ، قالتاسى قاعىلعان جۇرتتىڭ ءبىرازى قونىس تويىن تويلاۋعا مۇمكىندىك بولار ەدى.
ۇلاربەك دالەيۇلى
سۋرەت ينتەرنەت جەلىسىنەن
