ماڭعىستاۋدا وقۋ-جاتتىعۋ بارىسىندا قازا بولعان 12 اسكەري قىزمەتشىنىڭ اتى-ءجونى جاريالاندى، دەپ حابارلايدى "ادىرنا".
قازاقستان رەسپۋبليكاسىنىڭ قورعانىس مينيسترلىگى مەن قارۋلى كۇشتەردىڭ جەكە قۇرامى قازا بولعان اسكەري قىزمەتشىلەردىڭ وتباسى مەن جاقىندارىنا كوڭىل ايتتى.
وقۋ-جاتتىعۋ كەزىندە قازا بولعان اسكەري قىزمەتشىلەر:
* اعا لەيتەنانت ولجاس مۇحتارۇلى;
* م/ق ماتروس سەرجان تالعاتۇلى اياپبەرگەن;
* م/ق ماتروس ومىربەك ءومىربولاتۇلى ومىرزاق;
* م/ق ماتروس الماس ءجۇسىپۇلى كوبەنوۆ;
* م/ق ماتروس اقىلبەك قابدەنۇلى تولەگەن;
* م/ق ماتروس جەڭىس تىلەۋۇلى تەمىرعاليەۆ;
* م/ق ماتروس مەيرامبەك ەرمۇحانۇلى بەردىحانوۆ;
* م/ق ماتروس اسەت ساماتۇلى جاڭاباي;
* م/ق ماتروس ازامات بولاتبەكۇلى ءمادىحان;
* م/ق ماتروس داستان نۇربولۇلى بەگەي;
* م/ق ماتروس اقجايىق بولاتبەكۇلى گيلاج;
* م/ق ماتروس ولجاس ءتاجىبايۇلى ديحانباەۆ.
ولاردىڭ قازا بولۋىنا بايلانىستى اسكەري ۆەدومستۆو مارقۇمداردىڭ تۋعان-تۋىستارى مەن جاقىندارىنا قايعىرىپ كوڭىل ايتتى.
بۇدان الدىن حابارلانعانداي كاسپي تەڭىزىنىڭ جاعالاۋىندا وقۋ-جاۋىنگەرلىك مىندەتتەردى ورىنداۋ كەزىندە اۋا رايىنىڭ كۇرت ناشارلاپ، جەلدىڭ كۇشەيۋى سالدارىنان اسكەري قىزمەتشىلەردى تەڭىز الىپ كەتكەن. اۋەلدە اعىپ كەتكەن ساربازداردىڭ سانى 19 ادام دەپ جاريالانعانىمەن، سوڭىنان 17 ادام جايلى ايتىلدى. ءۇش اسكەري قىزمەتكەر قۇتقارىلىپ، ولاردىڭ بىرەۋى اۋرۋحاناعا جەتكىزىلگەن. قالعان اسكەري قىزمەتكەرلەردى ىزدەستىرۋ جۇمىستارى جالعاسىپ جاتىر.
وقيعا ورنىنا قۇتقارۋ قىزمەتتەرىنىڭ كۇشتەرى مەن قۇرالدارى جەدەل جىبەرىلدى. ىزدەستىرۋ-قۇتقارۋ وپەراتسياسىنا اسكەري-تەڭىز كۇشتەرى، توتەنشە جاعدايلار مينيسترلىگى بولىمشەلەرى، اۆياتسيا جانە وزگە دە ءتيىستى قىزمەتتەر جۇمىلدىرىلعان.
وقيعا ورنىندا پرەمتەر-ءمينيستردىڭ ورىنباسارى قانات بوزىمباەۆتىڭ جەتەكشىلىگىمەن ۇكىمەتتىك كوميسسيا جۇمىس ىستەپ جاتىر. پرەزيدەنت قاسىم-جومارت توقاەۆ قايعىلى وقيعاعا بايلانىستى مارقۇمدارىنا جانۇياسىنا كوڭىل ايتىپ، 25 قىركۇيەكتى جالپىۇلتتىق ازا كۇنى رەتىندە جاريالادى.
كاسپيدەگى وقۋ-جاتتىعۋ "حازار قورعانى - 2026" دەگەن اتپەن وتكىزىلگەن. جاتتىعۋ قورعانىس مينيسترلىگىنىڭ وقۋ-جاتتىعۋدىڭ ستراتەگيالىق كوماندالىق-شتابتىق بىرىڭعاي جوسپار اياسىندا كاسپي تەڭىزىنىڭ قازاقستاندىق سەكتورىندا وتكەن. وعان قازاقستان قارۋلى كۇشتەرى اسكەري-تەڭىز كۇشتەرىنىڭ باس قولباسشىسى، 1-دارەجەلى كاپيتان قانات نيازبەكوۆ جەتەكشىلىك ەتكەن. وقۋ-جاتتىعۋعا اسكەري-تەڭىز كۇشتەرى مەن ولارعا باعىنىستى بولىمشەلەردىڭ 500-دەن استام اسكەري قىزمەتكەر، اسكەري كەمەلەردىڭ ەكيپاجدارى مەن جاعالاۋ بولىمشەلەرى قاتىسقان. ماشىقتانۋعا ۇقك شەكارا قىزمەتىنىڭ ماڭعىستاۋ وبلىسى بويىنشا جاعالاۋ كۇزەتى مەن اۋە قورعانىسى كۇشتەرىنىڭ كۇشتەرى مەن قۇرالدارى تارتىلعان.
