"تولىق ەمەس وتباسى" ساناتى بويىنشا جەڭىلدەتىلگەن يپوتەكالىق نەسيە الۋ ءۇشىن قازاقستاندا جالعان اجىراسۋ كوبەيۋدە.بۇل تۋرالى "وتباسى بانك" اق باسقارما ءتورايىمى ءلاززات يبراگيموۆا ايتتى، دەپ حابارلايدى “ادىرنا” ۇلتتىق پورتالى.
ونىڭ ايتۋىنشا، بانك نەسيە بەرۋ بويىنشا ءۇش جىلدىق كەزەڭنىڭ قورىتىندىسىنا تالداۋ جۇرگىزگەن. ساراپتاماعا سايكەس، "تولىق ەمەس وتباسىلار" ساناتى سوڭعى ءتورت جىلدا جىلدام قارقىنمەن ءوسىپ كەلەدى.
"قازاقستاندا 2017 جىلى 54 626 اجىراسۋ تىركەلگەن. 2018 جىلى ولاردىڭ سانى 54 797-گە دەيىن ءوستى. 2019 جىلى - بەس مىڭعا ارتىق جانە 59 796-عا جەتتى. كوروناۆيرۋس تارالعان كەزەڭدە، اجىراسۋعا ءوتىنىش بەرۋ كۇردەلەنە تۇسكەندە كورسەتكىش 48 مىڭعا دەيىن ازايدى. 2021 جىلى قايتا ءوسىپ، 48 239 (اجىراسقان وتباسىلار) بولدى. ءبىز جالعان اجىراسۋ سەبەپتەرىنىڭ ءبىرى - ادامداردىڭ كەزەككە تۇرعىسى كەلۋىندە دەپ سانايمىز (يپوتەكاعا پاتەر ساتىپ الۋ ءۇشىن - ەسك.). "تولىق ەمەس وتباسى" باعىتى بويىنشا اجىراسۋ تۋرالى كۋالىك جەتكىلىكتى", - دەيدى يبراگيموۆا.
سونداي-اق، ول 23 قىركۇيەكتە ۇكىمەت قاۋلىسى اياسىندا تولىق ەمەس وتباسىلارعا "شاڭىراق – 5-10-20" باعدارلاماسى بويىنشا نەسيە بەرىلەدى دەگەن ۇسىنىس قولداۋ تاپقانىن ايتتى.
"بۇلار بالا تاربيەلەپ وتىرعان، بىراق جۇمىس ىستەيتىن ادامدار. ولار "شاڭىراق - 5-10-20" باعدارلاماسى بويىنشا الادى. ايىرماشىلىق تەك ەڭبەكاقى مولشەرلەمەسى بويىنشا. بىراق ءار وتباسى دەڭگەيىندە 30 000 تەڭگە شاماسىندا", - دەپ قوستى ءلاززات يبراگيموۆا.
