كىشكەنە قىز جۇدىرىقتاي جۇرەگىنىڭ وڭ جاق تۇسىندا ورنالاسقانىن دا جاقسى بىلەدى ەكەن. ويتكەنى اناسى ۇنەمى ايتىپ وتىراتىن كورىنەدى. بۇل تۋرالى "ادىرنا" ۇلتتىق پورتالى ەۋرازيا ءبىرىنشى ارناسىنا سىلتەمە جاساپ حابارلايدى.
اعلەس - وتە سەزىمتال قىز. ويى جۇيرىك، ايتقان نارسەڭدى تەز جاتتاپ، لەزدە قاعىپ الادى. ولەڭ وقۋدا ەلگەزەكتىگى بىردەن بايقالادى. ال ەسەپتەردى شىعارۋعا كەلگەندە قامشى سالدىرمايدى ەكەن. اتا-اناسى، باۋىر ەتىنىڭ ەرەكشە قاسيەتىن بوبەكجايعا بارعاندا-اق بايقاپتى. ال، كوز قۋانىشىنىڭ الاقانداي جۇرەگى وڭ جاق كەۋدەسىندە ورنالاسقانىن پەرزەنتحانادا بىلگەن. اۋەلى ەستىگىندە تاڭعالىپتى. قوبالجۋ، قورقۋ، تولقۋ بولعان. ءتىپتى، جاقىندارىنىڭ كۇمانمەن قاراعانىن دا جاسىرمادى.
"باسىندا جاقسى قابىلداعان جوق. كىشكەنە بالاعا مۇسىركەپ قاراپ، اياپ دەگەن سياقتى. كەيىن بارلىعى جاقسى ەكەنىن بىلگەننەن كەيىن ولار دا ۇيرەنىپ كەتتى. ال وعان دەيىن، ارينە، بولدى. استاناعا دەيىن بارىپ، تەكسەرۋدەن ءوتىپ كەلگەنبىز. ويتكەنى ءبىر جاسقا دەيىن كوپ اۋىردى. قازىر ءبارى ۇمىتىلدى", - دەدى اناسى ۇلجان اقجاروۆا.
دەسە دە ءار 3 اي سايىن جۇرەگى مەن بۇيرەگىن مەديتسينالىق تەكسەرۋدەن وتكىزىپ تۇراتىن كورىنەدى. دارىگەرلەر دە ۋايىمداۋعا ەش نەگىز جوق دەپ وتىر. جۇرەكتىڭ وڭ جاقتا ورنالاسۋى - ءتۋابىتتى جاراتىلىس. سيرەك كەزدەسەتىن قۇبىلىس. سول سەبەپتى قاۋىپتەنۋدىڭ قاجەتى جوق.
"مىسالى، مۇشەنىڭ كەرىسىنشە ورنالاساتىن كەزى بولادى. بۇل مۇشەنىڭ ىسىرىلۋىنا بايلانىستى. ول تۋعاننان كەيىن كەرىسىنشە وسەدى. جانە ول قاۋىپ ءتوندىرۋى مۇمكىن. ال قازىرگى ۋاقىتتا بۇل بالادا ونداي قاۋىپتىلىك جوق. ياعني، ەشقانداي مۇشە ىسىرىلىپ جاتقان جوق. ول ءوزى سولاي بىتكەن", - دەدى جەكە مەنشىك ەمحانانىڭ باس دارىگەرى سەرىك قاسىم.
جاس انانىڭ ايتۋىنشا، مۇنداي ەرەكشە جاعداي تۇقىمىندا العاش رەت كەزدەسىپ وتىر. جۇرەگى مەيلى وڭ جاعىندا نەمەسە سول جاعىندا ورنالاسسىن، ەڭ باستىسى قىزىم امان-ساۋ، باقىتتى بولسىن دەيدى.
"ادىرنا" ۇلتتىق پورتالى
