Ükımet otyrysynda Densaulyq saqtau vise-ministrı Timur Mūratov halyqty därılık zattarmen qamtamasyz etu turaly baiandama jasady, dep habarlaidy "Adyrna" ūlttyq portaly Ükımettıŋ baspasöz qyzmetıne sıltep.
Onyŋ aituynşa, 2025 jyldyŋ 10 aiynda 3 millionnan astam pasientke 219,7 mlrd teŋgege tegın därı-därmek berıldı. Medisinalyq ūiymdardy üzdıksız jabdyqtau üşın Bıryŋǧai distribiutor 21 mlrd teŋgege tömendetılmeitın därı-därmek qoryn qūrǧan. Būl qor onkologiia, qant diabetı jäne basqa da maŋyzdy auru türlerın emdeuge arnalǧan negızgı preparattardy qamtidy.
«Sozylmaly aurulardyŋ bır bölıgın TMKKK paketınen MÄMS-ke auystyruǧa qaramastan, barlyq memlekettık kepıldıkter tolyq saqtalady. Qarjylandyru kölemı özgermeidı, tek közı özgeredı. Qant diabetı, revmatoidty artrit, serebraldy sal auruy jäne basqa da sozylmaly aurulary bar nauqastar qajettı därılerdı tolyq kölemde aludy jalǧastyrady», – dedı Timur Mūratov.
Soŋǧy bes jylda ambulatoriialyq därı-därmekpen qamtamasyz etuge bölıngen qarjy 115 mlrd teŋgeden 262 mlrd teŋgege deiın artqan. Bügınde Qazaqstan halqyn tegın därı-därmekpen qamtamasyz etu deŋgeiı joǧary elderdıŋ qataryna kıredı — jan basyna şaqqanda 50 AQŞ dollarynan asady.
Ministrlıktıŋ mälımetınşe, generikalyq därılerdıŋ baǧasy tüpnūsqalarǧa qaraǧanda 30%-ǧa tömendedı. Būl şara därı-därmekterdıŋ ortaşa baǧasyn 2025 jyldyŋ qazan aiynda 11%-ǧa arzandatty. Al Bıryŋǧai distribiutordyŋ tiımdı satyp alu nätijesınde 70,5 mlrd teŋge ünemdelıp, qosymşa därıler satyp aluǧa baǧyttalǧan.
Sondai-aq naryqtaǧy aşyqtyqty arttyru üşın därı-därmekterdı taŋbalau jäne qadaǧalau jüiesı engızılgen, būl salyq tüsımderınıŋ 24%-ǧa ösuıne yqpal ettı.
Densaulyq saqtau ministrlıgı sifrlandyru baǧytyn küşeitude: elektrondyq resept jüiesı engızılıp, ony räsımdeu uaqyty ekı esege qysqarǧan. Aldaǧy uaqytta jasandy intellekt därı-därmek qajettılıgın boljauǧa jäne jalǧan reseptterdı anyqtauǧa qoldanylmaq.
Qazırgı taŋda Qazaqstanda 20 476 därılık zat pen medisinalyq būiym tırkelgen, onyŋ 15%-dan astamy — otandyq önım. Düniejüzılık densaulyq saqtau ūiymynyŋ ömırlık maŋyzdy därıler tızımınde qazaqstandyq preparattardyŋ ülesı 37%-dy qūraidy.
Auyldyq aimaqtarda därı-därmekke qoljetımdılıktı arttyru üşın 10 myŋnan astam därıhana jūmys ısteidı, onyŋ 2700-ı auyldyq jerlerde ornalasqan. Būǧan qosa, şalǧai aimaqtarda 11 jyljymaly därıhana punktı qyzmet körsetedı.
Premer-ministr Oljas Bektenov öz sözınde därı-därmekter men medisinalyq būiymdardy tırkeudıŋ jeŋıldetılgen tärtıbı engızılgenın atap öttı. Endı jaŋa preparatty tırkeu merzımı būrynǧy 2-5 jyl ornyna nebärı 100 jūmys künıne deiın qysqartylǧan.
Ükımet basşysy bölşek sauda naryǧynda därı-därmek baǧasynyŋ negızsız ösuıne jol bermeu jönınde naqty şaralar qabyldaudy tapsyrdy.
