پرەزيدەنت قاسىم-جومارت توقاەۆ «روسسيسكايا گازەتا» باسىلىمىندا استانا مەن ماسكەۋدىڭ اراسىنداعى قاتىناستار تۋرالى ماقالاسىن جاريالادى، دەپ حابارلايدى "ادىرنا" ۇلتتىق پورتالى.
ماقالادا مەملەكەت باسشىسى ەكى ەل اراسىنداعى ستراتەگيالىق سەرىكتەستىك پەن وداقتاستىقتىڭ ماڭىزدىلىعىنا توقتالىپ، «ماڭگىلىك دوستىق – حالقىمىز ءۇشىن جول كورسەتكىش» دەپ اتادى.
پرەزيدەنت اتاپ وتكەندەي، قازاق پەن ورىس حالىقتارى عاسىرلار بويى قاتار ءومىر ءسۇرىپ، قۋانىش پەن قيىندىقتى بىرگە ءبولىسىپ، ەۋرازيانىڭ ءبىرتۇتاس مادەني كەڭىستىگىن قالىپتاستىرعان.
ء«بىزدىڭ حالقىمىزدى ورتاق ءداستۇرلى قۇندىلىقتار، زاماناۋي ومىرگە ۇقساس كوزقاراستار جانە باۋىرلاس حالىقتاردىڭ ءال-اۋقاتىن قامتاماسىز ەتۋگە بىرلەسكەن جۇمىس بىرىكتىرەدى»، – دەيدى قاسىم-جومارت توقاەۆ.
ماقالادا قازاقستان تاۋەلسىزدىك العاننان بەرى رەسەيمەن دوستىق قاتىناستاردى دامىتۋعا ەرەكشە ءمان بەرگەنى، 1992 جىلى جاسالعان «ماڭگىلىك دوستىق، ىنتىماقتاستىق جانە ءوزارا كومەك تۋرالى كەلىسىم» ەكى ەل اراسىنداعى سەنىمدى نەگىز قالاعانى ايتىلعان. بۇل كەلىسىمنىڭ باستى يدەياسى – «ماڭگىلىك دوستىق» قازىرگى كەزدە دە وزەكتىلىگىن جوعالتپاعان.
پرەزيدەنت ستراتەگيالىق سەرىكتەستىك پەن وداقتاستىقتىڭ ەكى ەلدىڭ قاۋىپسىزدىگى مەن تۇراقتىلىعى ءۇشىن ماڭىزدى ەكەنىن اتاپ ءوتتى. سونىمەن قاتار، قازاقستان پرەزيدەنتى قاسىم-جومارت توقاەۆ رەسەي پرەزيدەنتى ۆلاديمير ءپۋتيننىڭ حالىقارالىق ارەناداعى ءرولىن جوعارى باعالاپ، وتكەن جىلعى مەملەكەتتىك ساپاردىڭ تاريحي ماڭىزىن اتاپ ءوتتى.
ەكونوميكالىق ىنتىماقتاستىق تا ەرەكشە نازاردا: ەكى ەلدىڭ تاۋار اينالىمى 30 ملرد دوللارعا جاقىنداپ، ينۆەستيتسيالىق بايلانىستار بەلسەندى دامىپ كەلەدى. 170-تەن استام بىرلەسكەن جوبا جۇزەگە اسىرىلىپ، قازاقستاندا رەسەي كاپيتالى بار 20 مىڭنان استام كومپانيا جۇمىس ىستەيدى. ەنەرگەتيكا، اتوم ەلەكتر ستانتسياسىن سالۋ، كولىك-لوگيستيكا سالالارى دا ماڭىزدى.
ماقالادا مادەنيەت، ءبىلىم، عىلىم جانە گۋمانيتارلىق سالاداعى بايلانىستارعا ەرەكشە كوڭىل بولىنگەن. قازاقستاندا توعىز رەسەيلىك ۋنيۆەرسيتەتتىڭ فيليالى جۇمىس ىستەيدى، مگيمو فيليالى اشىلعان، ومسكىدەگى قازۇۋ فيليالى رەسەيدە ءبىلىم بەرۋدىڭ ۇلگىسى بولىپ وتىر. سونداي-اق، «اللەيا ماڭگىلىك دوستىعى» جانە «قازاقستان-رەسەي دوستىعى سكۆەرى» سياقتى جوبالار حالىقتار اراسىنداعى بايلانىستاردى نىعايتادى.
11-12 قاراشادا پرەزيدەنت قاسىم-جومارت توقاەۆ رەسەيگە مەملەكەتتىك ساپارمەن بارادى.
ساپار بارىسىندا ۆلاديمير پۋتينمەن كەلىسسوزدەر جۇرگىزىلىپ، XXI قازاقستان مەن رەسەيدىڭ ايماقارالىق ىنتىماقتاستىق فورۋمىندا ءسوز سويلەيدى. سونىمەن قاتار بىرقاتار ماڭىزدى ەكىجاقتى قۇجاتتارعا قول قويۋ جوسپارلانعان.
