استانادا نارازىلىققا شىققان جاڭاوزەن مۇنايشىلارى ۇستالعاننان كەيىن سوبر قىزمەتكەرلەرى ولارعا كۇش قولدانىپ، دەنە جاراقاتىن سالعانىن ايتتى. بۇل تۋرالى جەلىدە ەلوردادا قالعان جۇمىسشىلاردىڭ "قازمۇنايگاز" ۇلتتىق كومپانياسىنىڭ وكىلدەرىمەن كەلىسسوزدەرى كەزىندە تۇسىرىلگەن ۆيدەو پايدا بولدى، دەپ حابارلايدى “ادىرنا” ۇلتتىق پورتالى.
ۆيدەوعا جاڭاوزەندىكتەر قۇقىق قورعاۋ ورگاندارى ارىپتەستەرىن ۇردى دەپ ايتقانى تۇسكەن.
"قازىر پويىزبەن قايتىپ بارا جاتقان جىگىتتەردىڭ ءبىرى قانسىراپ جاتىر. ەكىنشىسىن بۇيرەكتەن تەپكەن، ءۇشىنشىسى گەماتومادان كوزىن اشا المايدى", - دەدى جۇمىسشىلاردىڭ ءبىرى.
مۇنايشىلار ەكى جىلدان بەرى ادىلەتتىلىككە قول جەتكىزە الماي كەلە جاتقاندارىن ايتتى.
ەسكە سالايىق، 10 ءساۋىر جاڭاوزەندەگى «بەرالى ماڭعىستاۋ Company» مەكەمەسىنىڭ جۇمىستان قىسقارعان 80-گە تارتا جۇمىسشىسى استاناعا كەلىپ، ەنەرگەتيكا مينيسترلىگى عيماراتىنىڭ الدىنا نارازىلىق ءبىلدىردى. ولاردىڭ ءبارى «وزەنمۇنايگاز» كومپانياسىنان جۇمىس تالاپ ەتتى. جۇمىسسىز قالعان جاڭاوزەندىكتەر ماسەلەمىز شەشىلمەي مينيسترلىك الدىنان كەتپەيمىز دەدى. ولار تاڭدى سول جەردە اتىردى.
ەنەرگەتيكا ءمينيسترى الماسادام ساتقاليەۆ مۇنايشىلاردىڭ تالابى ءالى ايقىن ەمەستىگىن ايتقان.
ال پرەمەر-ءمينيستردىڭ ورىنباسارى التاي كولگىنوۆ جاڭاوزەندىك جۇمىسشىلاردىڭ تەندەردەن ۇتىلعان كومپانيانىڭ قايتادان ۇتىپ شىعۋىن تالاپ ەتۋى دۇرىس ەمەستىگىن مالىمدەدى.
كەيىننەن جۇمىسشىلار «قازمۇنايگاز» ۇك اق باسشىلىعى ۇسىنعان جۇمىس ورىندارىنان باس تارتقانى حابارلاندى.
11 ءساۋىر كۇنى كەشكە پيكەت ۇيىمداستىرعان جاڭاوزەن مۇنايشىلارىن قاۋىپسىزدىك قىزمەتكەرلەرى ۇستاپ اكەتتى. جەرلەستەرىنىڭ ۇستالعانىن ەستىگەن بويدا جاڭاوزەندە جەرگىلىكتى كاسىپورىنداردىڭ قىزمەتكەرلەرى قاسىم-جومارت توقاەۆقا ۇندەۋ جاساپ، استانادا ۇستالعان جۇمىسشىلاردى بوساتۋدى تالاپ ەتتى.
كوپ ۇزاماي جاڭاوزەن قالاسىنىڭ اكىمى جينالعاندارعا بەينەوتىنىش جاساپ، ماسەلەنى ءتۇسىندىردى، سابىرلىققا شاقىردى.
12 ءساۋىر كۇنى تاڭەرتەڭ جاڭاوزەندىك مۇنايشىلار ۇيلەرىنە قايتىپ بارا جاتقاندارىن مالىمدەپ، جەرلەستەرىنە العىس ايتتى.
باس پروكۋراتۋرانىڭ دەرەگىنشە، استانادا جاڭاوزەننەن كەلگەن 126 ادام ۇستالعان. ولاردىڭ بەسەۋى “بەيبىت جيىن وتكىزۋ ءتارتىبىن بۇزۋ” بابى بويىنشا ەسكەرتۋ تۇرىندە جازا تاعايىندالعان.
