رەسەي مەن اۋعانستان يسلام امىرلىگى اسكەري-تەحنيكالىق ىنتىماقتاستىق تۋرالى كەلىسىمگە قول قويدى. قۇجاتقا ماسكەۋ وبلىسىندا وتكەن حالىقارالىق قاۋىپسىزدىك فورۋمىنىڭ اياسىندا رەسەي قاۋىپسىزدىك كەڭەسىنىڭ حاتشىسى سەرگەي شويگۋ مەن اۋعانستان قورعانىس ءمينيسترى ماۋلاۆي مۇحامماد ياكۋب مۋدجاحيد قول قويعان، دەپ حابارلايدى “ادىرنا”.
اۋعاندىق TOLOnews پورتالىنىڭ مالىمەتىنشە، كەلىسىمنىڭ ناقتى مازمۇنى ازىرگە جاريالانعان جوق. دەگەنمەن، مۇنداي قۇجاتتار ادەتتە اسكەري تەحنولوگيالار الماسۋدى، قارۋ-جاراق جەتكىزۋ ماسەلەلەرىن، ليتسەنزيالىق كەلىسىمدەر جاساۋدى جانە بىرلەسكەن جوبالاردى ىسكە اسىرۋدى قامتيدى.
ماۋلاۆي مۇحامماد ياكۋب مۋدجاحيد – «تاليبان» قوزعالىسىنىڭ نەگىزىن قالاۋشى موللا وماردىڭ ۇلى. كەلىسىمگە قول قويۋ راسىمىندە ول اۋعانستاننىڭ قىرىق جىل بويى سوعىس جاعدايىندا بولعانىن، ونىڭ جيىرما جىلىندا اقش اسكەرىنىڭ باقىلاۋىندا قالعانىن ايتىپ، رەسەيمەن اسكەري ىنتىماقتاستىقتى ودان ءارى دامىتۋعا مۇددەلى ەكەنىن جەتكىزدى.
ءوز كەزەگىندە سەرگەي شويگۋ ماسكەۋدىڭ اۋعانستانداعى قازىرگى بيلىكتىڭ تەرروريزم مەن ەسىرتكى ساۋداسىنا قارسى كۇرەس جونىندەگى ارەكەتتەرىن قولدايتىنىن مالىمدەدى. سونداي-اق رەسەيدىڭ ءبىرتۇتاس، تاۋەلسىز جانە بەيبىت اۋعانستاندى كورگىسى كەلەتىنىن اتاپ ءوتتى.
ساراپشىلار بۇل كەلىسىمدى ماسكەۋ مەن كابۋل اراسىنداعى قارىم-قاتىناستىڭ جاڭا كەزەڭى رەتىندە باعالاپ وتىر. رەسەي 2025 جىلدىڭ شىلدە ايىندا اۋعانستان يسلام امىرلىگىن رەسمي تۇردە مويىنداعان بولاتىن. سودان بەرى ەكى تاراپ ساياسي، قاۋىپسىزدىك، ساۋدا-ەكونوميكالىق جانە گۋمانيتارلىق باعىتتارداعى بايلانىستاردى نىعايتۋعا كۇش سالىپ كەلەدى.
الايدا كەيبىر ساراپشىلار كەلىسىمنىڭ پراكتيكالىق ماڭىزىنا كۇمانمەن قارايدى. ساياساتتانۋشى رۋسلان سۇلەيمانوۆتىڭ پىكىرىنشە، بۇل قۇجات قازىرگى كەزەڭدە سيمۆوليكالىق سيپاتقا يە بولۋى مۇمكىن جانە ونىڭ ناقتى ناتيجەلەرى ۋاقىت وتە كەلە بەلگىلى بولادى.
ايتا كەتەيىك، وسى جىلدىڭ مامىر ايىندا بىشكەكتە وتكەن شانحاي ىنتىماقتاستىق ۇيىمىنا مۇشە ەلدەردىڭ قاۋىپسىزدىك كەڭەستەرى حاتشىلارىنىڭ كەزدەسۋىندە سەرگەي شويگۋ ءوڭىر مەملەكەتتەرىن كابۋلمەن ىنتىماقتاستىقتى كۇشەيتۋگە شاقىرعان ەدى. سونىمەن قاتار ول اۋعانستان اۋماعىندا نەمەسە وعان كورشىلەس مەملەكەتتەردە ءۇشىنشى ەلدەردىڭ اسكەري ينفراقۇرىلىمىن ورنالاستىرۋعا قارسى ەكەنىن مالىمدەگەن بولاتىن.
