2025 جىلدىڭ 30 قاراشاسىندا الەمگە تانىمال قازاقستاندىق ءانشى ديماش قۇدايبەرگەن مىسىردىڭ گيزا قالاسىندا وتەتىن The Pyramids Echo اتتى حالىقارالىق فەستيۆالدە ونەر كورسەتەدى. ءىس-شارا ايگىلى Pyramids Panorama الاڭىندا وتەدى، دەپ حابارلايدى "ادىرنا".
The Pyramids Echo — الەمنىڭ تۇكپىر-تۇكپىرىنەن كەلگەن ارتىستەردى، وركەسترلەر مەن زاماناۋي ورىنداۋشىلاردى بىرىكتىرەتىن ونەر مەرەكەسى. فەستيۆال باعدارلاماسى تەك مۋزىكالىق باعىتپەن شەكتەلمەي، مادەنيەت پەن ونەردىڭ ءارتۇرلى تۇرلەرىن قامتيدى.
ۇيىمداستىرۋشىلاردىڭ ايتۋىنشا، فەستيۆالدىڭ باستى ماقساتى — جاس بۋىندى شابىتتاندىرۋ، ولاردىڭ ونەرگە دەگەن قىزىعۋشىلىعىن ارتتىرۋ جانە مۋزىكانىڭ ادامزات تاريحىنداعى ءرولىن ەسكە سالۋ.
ەسكە سالايىق، قازان ايىنىڭ ورتاسىندا ديماش قۇدايبەرگەن مەكسيكادا ەكى بىردەي انشلاگ كونتسەرت وتكىزگەن بولاتىن. ءانشى ونەر كورسەتكەن Palacio de los Deportes ارەناسىندا 15 مىڭ كورەرمەن جينالدى.
ودان كەيىن يسپانياداعى كونتسەرتىنە ارنالعان جارنامالىق ناۋقان بارسەلونا كوشەلەرىندە ەرەكشە فورماتتا ءوتتى — قالا كوشەلەرىندە ديماشتىڭ سۋرەتى بەينەلەنگەن اۆتوبۋستار ءجۇرىپ، الداعى كونتسەرتى جايلى حابارلادى.
مەكسيكا مەن يسپانياداعى گاسترولدەردەن كەيىن ديماش قىتايعا جول تارتپاس بۇرىن الماتىداعى جاڭا زاماناۋي مۋزەيگە باردى.
