قازاقستاننىڭ ەڭبەك سىڭىرگەن ءارتىسى، ءانشى ءارى مادەنيەت قايراتكەرى سۆەتلانا ايتباەۆا ۇلى ديماش قۇدايبەرگەننىڭ نيۋ-يوركتەگى اۋقىمدى كونتسەرتىنەن العاشقى كادرلاردى ءبولىستى، دەپ حابارلايدى "ادىرنا" ۇلتتىق پورتالى.
بەينەروليكتەردى ول ءوز Instagram پاراقشاسىندا جاريالاعان. وندا ديماشتى جانكۇيەرلەرگە لىق تولى زال قارسى العان ءسات پەن قازاقستاننىڭ ءانۇرانىن ورىنداۋ كورىنىسى بار. «اللاعا شۇكىر!» – دەپ جازدى سۆەتلانا ايتباەۆا بەينەجازبانىڭ استىنا.
ديماش قۇدايبەرگەن نيۋ-يوركتەگى اتى اڭىزعا اينالعان Madison Square Garden ساحناسىندا جەكە كونتسەرت وتكىزگەن العاشقى قازاقستاندىق ءارتىس اتاندى. 5 قازان كۇنى وتكەن شوۋ زال تولى كورەرمەننىڭ قاتىسۋىمەن ءوتىپ، ءانشىنىڭ “Stranger” اتتى الەمدىك تۋرىنىڭ باستاماسى بولدى.
Madison Square Garden — الەمدەگى ەڭ بەدەلدى ساحنالاردىڭ ءبىرى. مۇندا مايكل دجەكسون، ەلۆيس پرەسلي، بەيونسە، اندرەا بوچەللي جانە بيتلز سىندى ايگىلى ارتىستەر ونەر كورسەتكەن. بۇل — ديماشتىڭ نيۋ-يوركتەگى ەكىنشى كونتسەرتى. ول العاش رەت مۇندا 2019 جىلى “Arnau” تۋرى اياسىندا ساحناعا شىققان ەدى.
نيۋ-يوركتەگى كونتسەرت ديماشتىڭ 2022 جىلى الماتىدا باستالعان ۇلكەن تۋرىنىڭ جالعاسى بولدى. باعدارلاماعا When I’ve Got You, Smoke, Fire سياقتى جاڭا ترەكتەر جانە ساكەن سەيفۋلليننىڭ سوزىنە جازىلعان اندەر مەن حالىقارالىق كوللابوراتسيالار ەنگەن.
