يسپانيا 16 جاسقا دەيىنگى بالالاردىڭ الەۋمەتتىك جەلىلەرگە كىرۋىنە تىيىم سالماق. بۇل تۋرالى ەلدىڭ پرەمەر-ءمينيسترى پەدرو سانچەس ايتتى، دەپ حابارلايدى «ادىرنا» ءتىلشىسى.
ۇكىمەت باسشىسى بۇل تۋرالى 3 اقپان كۇنى دۋبايدا وتكەن دۇنيەجۇزىلىك ۇكىمەتتىك ءسامميتتىڭ پلەنارلىق وتىرىسىندا مالىمدەگەن.
«پلاتفورمالار جاس مولشەرىن تەكسەرۋدىڭ ءتيىمدى جۇيەلەرىن ەنگىزۋگە مىندەتتى بولادى. جاي عانا فورمالدى ەمەس، ناقتى جۇمىس ىستەيتىن كەدەرگىلەر بولۋى كەرەك»، — دەدى سانچەس.
ونىڭ ايتۋىنشا، يسپانيا كامەلەتكە تولماعانداردى «تسيفرلىق جابايى باتىستان» قورعاۋدى كوزدەيدى. Politico باسىلىمىنىڭ حابارلاۋىنشا، بۇل تىيىمدى يسپانيا مينيسترلەر كەڭەسى كەلەسى اپتادا ماقۇلدايدى. جاڭا تۇزەتۋ 16 جاسقا دەيىنگى پايدالانۋشىلارعا تسيفرلىق پلاتفورمالاردا تىركەلۋگە تىكەلەي تىيىم سالادى.
بۇل جاڭاشىلدىق سانچەس قاجەت دەپ سانايتىن تسيفرلىق كەڭىستىكتى «قايتا باقىلاۋعا الۋ» شارالارىنىڭ كەڭ پاكەتى اياسىندا ەنگىزىلمەك.
«ۇكىمەت ۋلى كونتەنتتىڭ تارالۋىنا كوز جۇما قاراۋدى توقتاتۋى ءتيىس»، — دەدى ول.
بالالاردىڭ سمارتفوندار مەن الەۋمەتتىك جەلىلەرگە تاۋەلدىلىگى ولاردىڭ پسيحيكالىق دەنساۋلىعىنا كەرى اسەر ەتەدى دەگەن الاڭداۋشىلىق باسقا ەلدەردە دە بار. مىسالى دانيا 15 جاسقا دەيىنگى بالالارعا الەۋمەتتىك جەلىلەردى پايدالانۋعا تىيىم سالۋدى جوسپارلاپ وتىر.
ەۋروپالىق دەڭگەيدە ەۋروكوميسسيا YouTube پەن Snapchat سياقتى پلاتفورمالاردىڭ تسيفرلىق قىزمەتتەر تۋرالى زاڭ (DSA) تالاپتارىنا سايكەس كامەلەتكە تولماعانداردى قورعاۋىن تەكسەرەتىنىن مالىمدەدى.
پاريج وسىنداي تىيىمدى ەنگىزۋدى قىركۇيەك ايىنان باستاماق. پورتۋگاليادا بيلىكتەگى سوتسيال-دەموكراتيالىق پارتيا 2 اقپاندا بالالاردىڭ 16 جاسقا دەيىن الەۋمەتتىك جەلىلەرگە كىرۋى ءۇشىن اتا-اناسىنىڭ كەلىسىمىن مىندەتتەيتىن زاڭ جوباسىن ۇسىندى.
ال اۆستراليا الەمدە العاش بولىپ 16 جاسقا تولماعاندارعا الەۋمەتتىك جەلىلەردى پايدالانۋعا تىيىم سالعان ەل اتاندى. بۇل زاڭ 2024 جىلدىڭ قاراشاسىندا قابىلدانىپ، 2025 جىلدىڭ 10 جەلتوقسانىنان باستاپ كۇشىنە ەندى.
