رەسەيلىك «پروەكت» باسىلىمى جۇرگىزگەن زەرتتەۋ ناتيجەسىندە، رەسەي پرەزيدەنتى ۆلاديمير پۋتين ءوز تۋىستارىن جانە جاقىن ادامدارىن بيلىك پەن ەكونوميكا سالاسىنداعى ىقپالدى قىزمەتتەرگە ورنالاستىرعانى انىقتالدى، دەپ حابارلايدى «ادىرنا».
باسىلىم مالىمەتىنشە، پۋتين بيلىك ەتكەن جىلدار ىشىندە كەمىندە 24 تۋىسى مەن وعان جاقىن ادامدار – قىزدارىنان باستاپ، بولجام بويىنشا سۇيىكتىلەرى مەن ولاردىڭ تۋىستارىنا دەيىن – مەملەكەتتىك قۇرىلىمدارمەن تىعىز بايلانىستى جوعارى لاۋازىمدارعا يە بولعان.
«جۇمىسقا ورنالاسقانداردىڭ» قاتارىندا ءپۋتيننىڭ قىزدارى ماريا ۆورونتسوۆا مەن ەكاتەرينا تيحونوۆانىڭ وتباسىلارى، سونداي-اق ونىڭ نەمەرە اعايىندارى ەۆگەني جانە يگور پۋتيندەر، نەمەرە قارىنداستارى ليۋبوۆ شەلوموۆا مەن ليۋبوۆ كرۋگلوۆا بار. تەرگەۋ دەرەكتەرىنە سۇيەنسەك، ولاردىڭ بارلىعى مەملەكەتتىك كومپانيالار مەن مەكەمەلەرگە تىكەلەي قاتىسى بار تابىس كوزدەرىنەن پايدا كورىپ وتىر.
سونىمەن بىرگە، پۋتينمەن كوڭىل جاراستارعان ايەلدەردىڭ – بۇرىنعى جۇبايى ليۋدميلا وچەرەتنايا، گيمناست الينا كاباەۆا، كاسىپكەر سۆەتلانا كريۆونوگيح جانە تەلەجۇرگىزۋشى اليسا حارچەۆا — تۋىستارى دا ءىرى مەملەكەتتىك قۇرىلىمدار مەن كومپانيالاردا قىزمەت ەتەتىنى بەلگىلى بولدى.
فوتودا الينا كاباەۆا
ەڭ ىقپالدى لاۋازىمدار پرەزيدەنتتىڭ نەمەرە اعاسى ەۆگەني ءپۋتيننىڭ وتباسىنا بۇيىرعان. ونىڭ قىزى اننا تسيۆيلەۆا قازىرگى تاڭدا رەسەي قورعانىس ءمينيسترىنىڭ ورىنباسارى قىزمەتىن اتقارادى، ال كۇيەۋى سەرگەي تسيۆيلەۆ – ەلدىڭ ەنەرگەتيكا ءمينيسترى. اننانىڭ اعاسى ميحايل پۋتين – «گازپروم» كومپانياسىندا جوعارى قىزمەتتە.
«پروەكت» دەرەگىنشە، تۋىستىق بايلانىس ارقىلى بيلىك پەن بايلىقتى ءبولۋ دەڭگەيى بويىنشا ۆلاديمير پۋتين رەسەي تاريحىندا رەكورد ورناتقان. بۇل كورسەتكىش رومانوۆتار داۋىرىنەن بەرى بولماعان، ال مىسالى، بوريس ەلتسين كەزىندە بار بولعانى بەس تۋىسى عانا جوعارى قىزمەتكە تاعايىندالعان.
