بۇگىن، 5 قاراشادا الماتى قالاسىنىڭ تۇركسىب اۋداندىق سوتى «Bek Air» اۋە كومپانياسىنا تيەسىلى «Fokker 100» اۋە كەمەسىنىڭ اپاتقا ۇشىراۋى تۋرالى قىلمىستىق ءىس بويىنشا ۇكىم شىعاردى، دەپ حابارلايدى «ادىرنا» ءتىلشىسى.
سوت اۋە كەمەسىنىڭ كومانديرىن جانە ەكىنشى ۇشقىشتى قازاقستان رەسپۋبليكاسى قىلمىستىق كودەكسىنىڭ 344-بابىنىڭ 3-بولىگىندە كوزدەلگەن، ادام ولىمىنە اكەپ سوققان اۋە كولىگىن پايدالانۋ قاۋىپسىزدىگى قاعيدالارىن بۇزۋ قىلمىسىن جاساعانى ءۇشىن كىنالى دەپ تانىدى. ايىپتالۋشىلاردىڭ قايتىس بولۋىنا بايلانىستى جازا تاعايىندالمادى.
سوت ۇشۋ ەكيپاجى تاراپىنان اۋە كەمەسىن پايدالانۋ ەرەجەلەرىن ورەسكەل بۇزۋشىلىقتارعا جول بەرىلگەنىن، بۇل ادام شىعىنىنا اكەلگەن اۋە اپاتىنا سەبەپ بولعانىن انىقتادى.
بۇعان دەيىن ۇشقىشتاردىڭ ايەلدەرى تاعىلعان ايىپقا نارازىلىق ءبىلدىرىپ، وزدەرىنىڭ جابىرلەنۋشى ەكەندەرىن ايتقان ەدى. ۇشقىش مارات مۇراتباەۆتىڭ جۇبايى كۇيەۋىنىڭ بارلىق مەديتسينالىق تەكسەرۋدەن جانە ۇشۋ الدىنداعى كوميسسيادان ءساتتى وتكەنىن، تاجىريبەلى ءارى جاۋاپتى ۇشقىش بولعانىن، ەكيپاج بەن جولاۋشىلاردىڭ ءومىرى ءۇشىن سوڭىنا دەيىن كۇرەسكەنىن جەتكىزدى.
ەسكە سالا كەتسەك، 2019 جىلدىڭ 27 جەلتوقسانىندا الماتىدا Fokker 100 ۇشاعى اپاتقا ۇشىراعان ەدى. ۇشاق بورتىندا بارلىعى 98 ادام بولعان. اپات سالدارىنان 11 جولاۋشى مەن اۋە كەمەسىنىڭ كومانديرى قازا تاپتى. ەكىنشى ۇشقىش مەديتسينالىق مەكەمەدەن شىققاننان كەيىن كوز جۇمدى.
