29 جەلتوقسان كۇنى بانگكوكتان وڭتۇستىك كورەياعا ۇشقان Jeju Air اۋە كومپانياسىنىڭ ۇشاعى مۋان اۋەجايىنا قونۋ كەزىندە اپاتقا ۇشىرادى، دەپ حابارلايدى "ادىرنا" ۇلتتىق پورتالى Yonhap اگەنتتىگىنە سىلتەمە جاساپ.
دەرەكتەرگە سۇيەنسەك، بورتتا كەمىندە 175 ادام بولعان. ۇشاق ۇشۋ-قونۋ جولاعىنان شىعىپ، ۇلكەن جىلدامدىقپەن قورشاۋعا سوعىلعان. الدىن الا مالىمەت بويىنشا، بارلىق جولاۋشى قازا تاپقان. تەك ەكى ادام عانا امان قالعان. Reuters اگەنتتىگىنىڭ مالىمەتىنشە، ولاردىڭ ەكەۋى دە ەكيپاج مۇشەلەرى. الايدا باسقا بىرقاتار باق-تىڭ مالىمەتىنشە، امان قالعانداردىڭ ءبىرى – جولاۋشى.
"بورتىندا شامامەن 175 جولاۋشى مەن التى ەكيپاج مۇشەسى بولعان ۇشاق بانگكوكتان قايتىپ كەلە جاتقان", – دەپ حابارلايدى اگەنتتىك.
اپاتقا ۇشىراعان Jeju Air اۋە كومپانياسىنىڭ Boeing 737 ۇشاعىندا 173 وڭتۇستىك كورەيا ازاماتى جانە ەكى تايلاند ازاماتى بولعان.
امان قالعان 33 جاستاعى ستيۋاردەسسانىڭ اۋرۋحانادا جاتقانى بەلگىلى بولدى. ونىڭ ومىرىنە قاۋىپ جوق. بىراق، ول قاتتى كۇيزەلىسكە ۇشىراعان
قازىرگى ۋاقىتتا اۋەجايدا قۇتقارۋ جۇمىستارى جۇرگىزىلۋدە. ءورتتى سوندىرۋگە 80 ءورت ءسوندىرۋ توبى جۇمىلدىرىلعان. بيلىك اپاتتىڭ سەبەپتەرىن انىقتاۋدا. Yonhap اگەنتتىگىنىڭ حابارلاۋىنشا، ۇشاق ۇشۋ كەزىندە قۇستارمەن سوقتىعىسقان. بۇل ءشاسسيدىڭ ىستەن شىعۋىنا سەبەپ بولعان.
ەلدەگى ساياسي داعدارىس سالدارىنان قىزمەتىنەن شەتتەتىلگەن حان دوك سۋدان كەيىن ۋاقىتشا كوشباسشى بولىپ تاعايىندالعان وڭتۇستىك كورەيانىڭ پرەزيدەنت مىندەتىن اتقارۋشى چحۆە سان موك ءتيىستى مەملەكەتتىك مەكەمەلەرگە اپاتتان كەيىنگى قۇتقارۋ جۇمىستارىن بارىنشا ءتيىمدى جۇرگىزۋدى تاپسىردى.
Yonhap اگەنتتىگىنىڭ حابارلاۋىنشا، سەۋلدەن 288 شاقىرىم قاشىقتىقتا ورنالاسقان مۋانا اۋەجايىنداعى بارلىق ىشكى جانە حالىقارالىق رەيستەر توقتاتىلدى.
مۋانداعى اپات – Jeju Air كومپانياسىنىڭ 20 جىلدىق تاريحىنداعى العاشقى اۋە اپاتى. كومپانيا Boeing 737-800 ۇشاعىن 2017 جىلدان بەرى پايدالانعان، وعان دەيىن ۇشاق Ryanair كومپانياسىنا تيەسىلى بولعان.
ەسكە سالا كەتەيىك، 25 جەلتوقسان كۇنى AZAL اۋە كومپانياسىنىڭ Embraer 190 ۇشاعى باكۋ–گروزنىي باعىتىندا ۇشىپ بارا جاتىپ، اقتاۋ اۋەجايىنان 3 شاقىرىم جەردە اپاتقا ۇشىراعان ەدى. ۇشاق بورتىندا 67 ادام بولعان. ونىڭ 62-ءسى جولاۋشى جانە بەسەۋى ەكيپاج مۇشەسى. ولاردىڭ 38-ءى قازا تاۋىپ، 29 ادام اۋرۋحاناعا جەتكىزىلدى. ۇشاق ەكيپاجىنان 2 ادام ءتىرى قالدى.
