سيريا سوتى ەلدىڭ بۇرىنعى پرەزيدەنتى باشار اسادتى ادامزاتقا قارسى قىلمىستار جاساعانى ءۇشىن كىنالى دەپ تانىپ، سىرتتاي ءولىم جازاسىنا كەستى، دەپ حابارلايدى "ادىرنا" ۇلتتىق پورتالى.
ۇكىم 11 تامىزدا شىعارىلدى.
سوت شەشىمىنە سايكەس، باشار اسادقا قاساقانا كىسى ءولتىرۋ، ازاپتاۋ جانە زاڭسىز قاماۋعا الۋ سياقتى قىلمىستار بويىنشا ايىپ تاعىلعان. ءىس ونىڭ بيلىگى تۇسىندا سيريادا بولعان قاقتىعىس كەزەڭىندەگى ارەكەتتەرگە قاتىستى قارالعان.
سونداي-اق سوت بۇرىنعى پرەزيدەنتتىڭ تۋعان ءىنىسى ماحەر اساد پەن نەمەرە اعاسى اتەف نادجيبكە قاتىستى دا ءولىم جازاسى تۋرالى شەشىم شىعارعان. ماحەر اساد قاساقانا ادام ءولتىرۋ، ازاپتاۋ جانە قىلمىسقا ارانداتۋ بويىنشا كىنالى دەپ تانىلعان. ال اتەف نادجيب دەراا پروۆينتسياسىنداعى ساياسي قاۋىپسىزدىك ءبولىمىن باسقارعان كەزدە بولعان زاڭبۇزۋشىلىقتارعا بايلانىستى سوتتالعان.
باشار جانە ماحەر اساد سوت پروتسەسىنە قاتىسپاعان. باشار اساد 2024 جىلعى جەلتوقساندا بيلىكتەن كەتكەننەن كەيىن رەسەيگە كەتكەن. قازىرگى ۋاقىتتا ونىڭ رەسەيدە تۇرىپ جاتقانى حابارلاندى. اتالعان ءىس سيرياداعى بۇرىنعى بيلىك وكىلدەرىن جاۋاپقا تارتۋ باعىتىنداعى سوت پروتسەستەرىنىڭ ءبىرى سانالادى.
باشار اساد العاش رەت 2000 جىلى اكەسى حافەز اساد قايتىس بولعاننان كەيىن جوعارى بيلىككە كەلگەن. سودان بەرى رەفەرەندۋم، سايلاۋ جولدارىمەن ۇزاق ۋاقىت بيلىكتە وتىردى.
